واشنگٹن ۔ 21 مئی (اے پی پی)سابق صدراتے پاکستان پیپلزپارٹی دے شریک چئیرمین آصف علی زرداری آکھے جو دہشت گردی دے خلاف پاکستان دے عزم بارے شکوک وشبہات دا اظہارکرنڑآلے امریکی کانگریس دے رکناں کوں آپ پاکستان دا دورہ کرتے ایں لعنت کوں مکاونڑ سانگے پاکستانی عزم دا خودمشاہدہ کرنڑاں چاہیدے ۔ سابق صدر اے گالھ امریکی اخبار نیویارک ٹائمز کوں”مدیردے ناں خط ”ا چ آکھی ہے ۔ سابق صدر اے خط امریکی اخبار اچ چھپنڑآلے اداریے،جیہڑا جو پاکستان کوںایف سولہ طیاریاں دی فنانسنگ روکنڑ بارے لکھا ہئی ،دے جواب اچ لکھے۔سابق صدر آپنڑیں خط اچ ماضی دا حوالہ ڈیندے ہوئیں آکھے جو ہک ویلے اچ پاکستان سوویت یونین اتے غیرریاستی عناصر دے خلاف امریکا دا اہم سانجھے دار اتے اتحادی ریہے ۔سابق صدر آکھے جو پاکستان کوں ہنڑ وی دہشت گردی دے خطریاں دا سامنڑاں ہے اتے ملک اچ القاعدہ اتے طالبان دے حملیاں اچ قیمتی انسانی جاناں ضائع تھیندیاں پئن ، حال ہی اچ لہور اچ تھیونڑآلے ہک حملے اچ 74قیمتی جاناں دا نقصان تھئے ۔ سابق صدر آکھیا جو آونڑآلے ہفتیاں اچ امریکی محکمہ خارجہ عہدیدار پاکستان دا دورہ کریسن اتے انہاں کوں امید ہے جو ایں دوران او پاکستان کوں ایں گالھ دا یقین ڈیویسن جو او (امریکا) اساڈی سلامتی دی لوڑ کوں جانڑدا ہے ۔ انہاں آکھیا جو ایف سولہ طیاریاں دی فنانسنگ کرتے امریکا اصل اچ ٹھیک پلیٹ فارم دے ذریعے انسداد دہشت گردی دے شعبے اچ پاکستان دی حمایت کریسی ۔
