اسلام آباد ۔ 19 اگست (اے پی پی) سٹیٹ بینک آف پاکستان( ایس بی پی) تریمتاں دے کاروباری اداریں کیتے قرضے دی حد 15 لکھ توں 50 لکھ روپے تئیں ودھاڈتی اے ۔ سٹیٹ بینک آف پاکستان( ایس بی پی) تریمتاں دے کاروباراں کیتے قرضہ دی حد ری فنانس اتے کریڈٹ گارنٹی سکیم دے تحت ودھائی اے ،اے فیصلہ تریمتاں دے کاروباراں دی مالی ضرورتاں کوں پورا کرنڑ کیتے کیتا گئے کیوں جو قرضہ دی پرانڑیں حد انہاں دی مالی ضرورتاں دی تکملی اچ اوکھ تھیندی ہئی ۔ ایس بی پی ملک اچ اقتصادی سرگرمیاں دے ودھارے کیتے حکومت دی پالیسی دے تحت قرضے دی حد 50 لکھ روپے تئیں ودھاونڑ دا فیصلہ کیتے ۔ایندے توں علاوہ سٹیٹ تریمتاں سودھے معاشرہ دے سبھے طبقیں کوں مالیات تئیں سوکھی رسائی دی پالیسی تے ٹردی پئی اے ۔ واضح رہے جو مرکزی بینک اگست 2017ءاچ ری فنانس اتے کریڈٹ گارنٹی سکیم متعارف کرائی ہئی تاں جو ملک دے پرے دے اتے گھٹ ترقی آلے علاقے اچ کم کرنڑ آلیاں تریمتاں دے کاروبار دی ترقی اتے ودھارے اچ مدد ڈتی ونج سگے ۔
