اسلام آباد۔7اکتوبر (اے پی پی) کابینہ دی اقتصادی رابطہ کمیٹی (ای سی سی ) آئل اینڈگیس ریگولیٹری اتھارٹی (اوگرا) کوںآرایل این جی نال چلنڑ آلے سی این جی سٹیشناں کوں نویںلائسنس ڈیونڑ دی مشروط اجازت ڈے دتی۔اجلاس اچ ایس این جی پی ایل کوں محصولات اچ سابقہ شارٹ فال دی ریکوری اتے آندے سیالے اچ آر ایل این جی دی ڈائیورژن نال گھریلو اتے کمرشل شعباں کیتے گیس دے انتظام وانصرام دی وی اجازت ڈتی اے جڈاں جو اجلاس اچ کنڑک دی بئی خریداری کیتے کنڑک دے ملھ سانگے روس دی حکومت نال مذاکرات کیتے سیکرٹری خزانہ، سیکرٹری تجارت اتے سیکرٹری نیشنل فوڈ سیکورٹی تے مشتمل کمیٹی بنڑا ڈتی اے۔اجلاس دی صدارت کابینہ ڈویژن اچ وزیراعظم دے مشیربرائے خزانہ ومحصولات ڈاکٹرعبدالحفیظ شیخ کیتی۔اجلاس فیصلہ کیتے جو ٹریڈنگ کارپوریشن آف پاکستان ولوں درآمدتھیونڑ نال ترائے لکھ تریھ ہزار میٹرک ٹن کنڑک پاسکو،پنجاب اتے خیبرپختونخواکوں ہکو سویں بنیاداں تے(ہک لکھ 10 ہزارمیٹرک ٹن)ڈتی ویسی۔کمیٹی میسرز سوئی سدرن گیس کمپنی کیتے منگریو اتے میتھری توں بالترتیب 8 ایم ایم سی ایف ڈی اتے4 ایم ایم سی ایف ڈی گیس گھنڑ دی وی اجازت ڈتی۔اجلاس اچ آکھیا گئے جو نویں لائسنس گھنڑ آلے سی این جی سٹیشن مقامی گیس نہ گھن سگسن۔
