وزیرِاعظم دی ہدایت تے روشن ڈیجیٹل اکاؤنٹ سکیم دی غیر ملکی شہریاں تے ادارہ جاتی سرمایہ کاراں تک توسیع

اسلام آباد۔16مارچ (اے پی پی) وزیرِاعظم محمد شہباز شریف دی ہدایت تے حکومتِ پاکستان روشن ڈیجیٹل اکاؤنٹ دے دائرہ کار کوں مزید وسیع کرݨ دا فیصلہ کیتے، ہݨ غیر ملکی شہریاں دے نال نال غیر ملکی کمپنیاں تے ادارہ جاتی سرمایہ کاراں کوں وی روشن ڈیجیٹل اکاؤنٹ کھولݨ تے حکومتی سیکیورٹیز دے علاوہ نواں پاکستان سرٹیفکیٹس وچ سرمایہ کاری دی اجازت ݙتی ویسی جیندے تے انھاں کوں پرکشش منافع ݙتا ویسی۔ وفاقی وزیر خزانہ محمد اورنگزیب اتھاں اپݨے بیان وچ آکھیا جو اے اہم اقدام حکومت دے ایں عزم دی عکاسی کریندے جو پاکستان کوں عالمی مالیاتی منڈیاں دے نال مزید مضبوطی نال جوڑیا ونڄے تے ہک محفوظ تے شفاف ڈیجیٹل بینکاری نظام دے ذریعے غیر ملکی سرمایہ کاری کوں ودھارا ݙتا ونڄے۔وزیر خزانہ آکھیا جو دنیا وچ رہݨ آلے تقریباً ہک کروڑ ݙاہ لکھ پاکستانیاں تے مشتمل ساݙی اوورسیز کمیونٹی دنیا دی وݙی تے متحرک تارکینِ وطن کمیونٹیز وچ شامل اے۔ مشرقِ وسطیٰ توں گھن تے یورپ تئیں، شمالی امریکا توں گھن تے مشرقِ بعید تئیں پاکستانی ماہرین، کاروباری افراد، محنت کش تے طلبہ اپݨے میزبان ملکاں دی معیشتاں وچ اہم کردار ادا کریندے پئن تے نال ای اپݨے خانداناں تے کمیونٹیز دی پاکستان وچ مسلسل مدد وی کریندے پئن۔ انھاں آکھیا جو اوورسیز پاکستانی نہ صرف ملک دی معاشی طاقت دا اہم ذریعہ ہن بلکہ دنیا وچ پاکستان دی ثقافت، کاروباری صلاحیت تے اقدار دے سفیر وی ہن۔قومی معیشت کوں مضبوط بݨاوݨ وچ اوورسیز پاکستانیاں دے کردار کوں اجاگر کریندے محمد اورنگزیب آکھیا جو اسٹیٹ بینک آف پاکستان موجب مالی سال 2025 وچ ترسیلاتِ زر ہک تاریخی سنگِ میل عبور کیتے تے اے رقم 38.3 ارب ڈالر توں تجاوز کر ڳئی اے جیڑھی گزریل سال دے مقابلے وچ 26.6 فیصد زیادہ اے۔ انھاں مزید آکھیا جو مالی سال 2026 دے دوران ترسیلاتِ زر دے 42 ارب ڈالر تئیں پڄݨ دی توقع اے۔ اے شاندار کارکردگی ٻاہرلے ملک مقیم پاکستانیاں دے پاکستان دی معیشت تے اعتماد تے ملک دی ترقی وچ انھاں دی مسلسل حمایت دا واضح ثبوت اے۔ ترسیلاتِ زر دی مضبوط کارکردگی پاروں پاکستان ایں وقت دنیا وچ ترسیلاتِ زر وصول کرݨ الے ملکاں وچ پنجویں جݙاں جو جنوبی ایشیا وچ ݙوجھے نمبر تے اے۔وزیر خزانہ ایں ڳالھ تے زور ݙتا جو ترسیلاتِ زر پاکستان دے ٻاہرلے کھاتیں کوں مستحکم رکھݨ وچ ساریں توں اہم کردار ادا کریندیاں پئن۔ انھاں دی بدولت ملک ادائیگیاں دے توازن کوں برقرار رکھݨ تے اپݨے زرمبادلہ دے ذخیرے کوں مضبوط بݨاوݨ وچ کامیاب تھیندا پئے۔ انھاں ݙسایا جو ایں وقت اسٹیٹ بینک آف پاکستان دے کول زرمبادلہ دے ذخائر تقریباً 16.3 ارب ڈالر ہن جݙاں جو ملک دے مجموعی زرمبادلہ دے ذخائر تقریباً 21.6 ارب ڈالر ہن۔وزیر خزانہ آکھیا جو باہرلے ملک رہݨ آضے پاکستانیاں کوں پاکستان دے مالیاتی تے بینکاری نظام نال مزید جوڑݨ کیتے اسٹیٹ بینک آف پاکستان کمرشل بینکاں دے تعاون نال 10 ستمبر 2020 کوں روشن ڈیجیٹل اکاؤنٹ دا آغاز کیتا ہئی۔ ایں سکیم دا نعرہ “دور رہ کر بھی پاس” اے۔ ایں اقدام دا مقصد پاکستانیاں کوں ہک مکمل ڈیجیٹل تے آسان نظام دے ذریعے پاکستان دے بینکاری تے سرمایہ کاری دے نظام نال جوڑݨ ہئی۔ انھاں ݙسایا جو روشن ڈیجیٹل اکاؤنٹ ہک نمایاں ڈیجیٹل بینکاری سہولت اے جیندے ذریعے ٻاہرلے ملک پاکستانی گھر ٻیٹھے بینک اکاؤنٹ کھول سڳدن، حکومتی سیکیورٹیز تے نیا پاکستان سرٹیفکیٹس وچ سرمایہ کاری کر سڳدن، پاکستان سٹاک ایکسچینج تے میوچل فنڈز وچ سرمایہ کاری کر سڳدن تے پاکستان وچ جائیداد وی گھن سڳدن۔ ایندے علاوہ انھاں کوں مختلف جدید ڈیجیٹل بینکاری خدمات وی دستیاب ہوندن۔وزیر خزانہ ایں اقدام دی نمایاں کامیابیاں تے اطمینان دا اظہار کریندے آکھیا جو تقریباً ساڈھے پنج سال پہلے شروع تھیوݨ الا روشن ڈیجیٹل اکاؤنٹ پروگرام اہم سنگِ میل حاصل کر چکے۔ فروری 2026 دے اختتام تئیں 9 لکھ توں ودھ روشن ڈیجیٹل اکاؤنٹس کھولے ونڄ چکن جݙاں جوانھاں اکاؤنٹس وچ مجموعی طور تے 12 ارب ڈالر توں ودھ دی رقم آ چکی اے محمد اورنگزیب آکھیا جو روشن ڈیجیٹل اکاؤنٹ دے دائرہ کار کوں غیر ملکی شہریاں، کمپنیاں تے ادارہ جاتی سرمایہ کاراں تئیں ودھاوݨ نال پاکستان ہک پرکشش سرمایہ کاری دی منزل دے طور تے مزید مضبوط تھیسی تے ملکی مالیاتی منڈیاں کوں وی ودھارا ملسی۔ وزیر خزانہ اپݨے بیان وچ عالمی سرمایہ کاراں کوں پیغام ݙیندے آکھیا جو پاکستان سرمایہ کاری کیتے مکمل طور تے کھلئے۔ انھاں آکھیا جو حکومت دی جاری اصلاحات، مضبوط ڈیجیٹل انفراسٹرکچر تے مالیاتی نظام تک رسائی وچ وسعت عالمی سرمایہ کاراں کیتے ہک محفوظ، شفاف تے سازگار ماحول ݙیوݨ کیتے کیتی ویندی پئی اے۔ انھاں دنیا دے سرمایہ کاراں کوں دعوت ݙتی جو او پاکستان وچ موجود موقع توں فیدہ چاون تے ملک دے معاشی مستقبل دے شراکت دار بݨن۔