وفاقی وزیر داخلہ محسن نقوی تے وزیرِ اعلیٰ بلوچستان میر سرفراز بگٹی دی زیرِ صدارت امن و امان دے حوالے نال اعلیٰ سطحی اجلاس

اسلام آباد۔16مارچ(اے پی پی) وفاقی وزیر داخلہ محسن نقوی تے وزیرِاعلیٰ بلوچستان میر سرفراز بگٹی دی زیرِ صدارت امن و امان توں متعلق اعلیٰ سطحی اجلاس کوئٹہ وچ منعقد تھیا جیندے وچ وفاقی و صوبائی اداریں دے اعلیٰ حکام شرکت کیتی۔ متعلقہ حکام امن و امان، افغان مہاجرین دی واپسی، حوالہ ہنڈی تے بھتہ خوری، سمگلنگ دے خاتمے سودھے اہم امور تے تفصیلی بریفنگ ݙتی۔ چیئرمین نادرا، ڈی جی ایف آئی اے، ڈی جی این سی سی آئی تے آئی جی فیڈرل کانسٹیبلری اجلاس کوں متعلقہ امور تے انڄ انڄ بریفنگ ݙتی۔ بلوچستان وچ امن و استحکام دے قیام کیتے فیڈرل کانسٹیبلری دی خدمات حاصل کرݨ دا فیصلہ کیتا ڳئے۔ پہلے مرحلے وچ فیڈرل کانسٹیبلری دے ݙو ونگز تے مشتمل تقریباً ترائے ہزار اہلکار تعینات کیتے ویسن۔ بلوچستان وچ ایف آئی اے کوں مزید فعال بݨاوݨ تے ساری خالی آسامیاں تے مقامی لوکاں دی بھرتی کرݨ دا فیصلہ وی کیتا ڳئے۔حکومتِ بلوچستان تے وفاقی حکومت سوشل میڈیا تے ریاست مخالف سرگرمیاں دی مانیٹرنگ کوں موثر بݨاوݨ تے اتفاق کریندے ریاست دے خلاف سوشل میڈیا تے بے بنیاد پروپیگنڈیاں وچ ملوث عناصر دے خلاف کارروائیاں تکھیاں کرݨ دا فیصلہ کیتا۔ اجلاس وچ وفاقی حکومت ولوں بلوچستان حکومت کوں ہر ممکن تعاون دا یقین ݙیوایا ڳیا ۔ وزیر داخلہ محسن نقوی دا آکھݨ ہا جو بلوچستان پولیس دی پیشہ ورانہ استعداد کار وچ اضافے کیتے ہر ممکن تعاون کریسوں، بلوچستان دے حالات توں مکمل آگاہ ہیسے تے امن دے قیام کیتے ہر ممکن معاونت کریسوں۔ وزیرِاعلیٰ بلوچستان سرفراز بگٹی آکھیا جو دہشت گردی دے خاتمے کیتے پوری قوت تے عزم دے نال مقابلہ کریندے پیوں، دہشت گردی دے خلاف جنگ صرف سکیورٹی فورسز دی کائنی بلکہ پوری قوم دی مشترکہ جنگ اے۔ انھاں آکھیا جو پہلے ݙینھ توں واضح کرچکیوں ریاست دی عملداری ہر صورت یقینی بݨیسوں۔ اڄ بلوچستان دی کوئی شاہراہ احتجاج دے ناں تے بند کائنی تھیندی، بحالیِ امن کیتے وفاقی حکومت دی معاونت دی تعریف کریندوں ۔ وزیرِاعلیٰ بلوچستان آکھیا جو قومی یکجہتی نال دہشت گردی کوں شکست ݙیسوں۔