سپیکر قومی اسمبلی دا شمالی وزیرستان اچ 27 دہشت گرداں کوں جہنم واصل کرݨ تے سکیورٹی فورسز کوں خراجِ تحسین

اسلام آباد۔ 8 جون (اے پی پی) سپیکر قومی اسمبلی سردار ایاز صادق شمالی وزیرستان اچ کامیاب انٹیلی جنس بیسڈ آپریشنز دے ذریعے 27 دہشت گرداں کوں جہنم واصل کرݨ تے سکیورٹی فورسز کوں خراجِ تحسین پیش کیتے۔ آپݨے بیان اچ انہاں پاک فوج تے قانون نافذ کرݨ آلے اداریاں دی پیشہ ورانہ صلاحیتاں دی تعریف کیتی اتے اکھیا جو دہشت گرد عناصر دے خلاف کامیاب کارروائیاں سکیورٹی فورسز دے عزم تے بہادری دا منہ بولیندا ثبوت ہن۔ دہشت گردی دے خاتمے کیتے پوری قوم آپݨی سکیورٹی فورسز دے نال کھڑی اے۔ دہشت گردی دے ناسور دے خاتمے کیتے سکیورٹی فورسز دی کارروائیاں تے قوم کوں فخر اے۔ سپیکر قومی اسمبلی دہشت گردی دے خلاف ”عزمِ استحکام“ دے تحت جاری قومی مہم دی پوری حمایت دا اعادہ کیتا اتے اکھیا جو دہشت گردی دے مکمل خاتمے تے ملک اچ پائیدار امن دے قیام کیتے پوری قوم ہکو مٹھ (متحد) اے۔ سپیکر قومی اسمبلی شمالی وزیرستان سودھے ملک بھر اچ دہشت گرداں دے خلاف جاری آپریشنز دی کامیابی کیتے نیک تمناواں دا اظہار کیتا۔ انہاں اکھیا جو پاکستان دی مسلح افواج تے قانون نافذ کرݨ آلے ادارے ملک دے امن تے استحکام دے ضامن ہن اتے پوری قوم سکیورٹی فورسز دی خِدمات کوں قدر دی نگاہ نال ݙیکھدی اے۔