ہیگزویلنٹ ویکسین آلے پاسے منتقلی پاکستان دے معمول دے حفاظتی ٹیکہ جات پروگرام کیتے ایک اہم پیش رفت اے، وفاقی وزیرِ صحت مصطفیٰ کمال

اسلام آباد۔ 17 ستمبر (اے پی پی) وفاقی وزیرِ صحت مصطفیٰ کمال دی صدارت بین الادارہ جاتی رابطہ کمیٹی دا اجلاس تھیا، ڄیندے اچ پاکستان دے معمول دے حفاظتی ٹیکہ جات پروگرام اچ ہیگزویلنٹ ویکسین متعارف کرواوݨ دی منظوری ݙتی ڳئی۔ اجلاس اچ متعلقہ صوبائی حکام نال مشاورت تے گاوی دے نال اتفاقِ رائے دے بعد ہیگزویلنٹ ویکسین کوں قومی حفاظتی ٹیکہ جات پروگرام اچ شامل کرݨ دی منظوری ݙتی ڳئی۔ ایں موقع تے وفاقی وزیرِ صحت مصطفیٰ کمال آکھیا جو ہیگزویلنٹ ویکسین آلے پاسے منتقلی پاکستان دے معمول دے حفاظتی ٹیکہ جات پروگرام کیتے ہک اہم پیش رفت اے۔ انہاں آکھیا جو گزشتہ 14 مہینیاں توں گاوی تے ٻئے عالمی شراکت داراں دے نال ہیگزویلنٹ ویکسین تائیں رسائی کیتے مسلسل کوششاں جاری ہن۔ ہیگزویلنٹ ویکسین نال ٻالاں کوں چھی بیماریاں توں تحفظ ملسی جݙانجو ٻالاں کوں گھٹ انجیکشن لگسن، ڄیندے نال انہاں کوں گھٹ تکلیف ہوسی تے والدین دے اعتماد تے تعاون اچ وی بہتری آسی۔ وفاقی وزیر آکھیا جو ہیگزویلنٹ ویکسین دی شمولیت نال حفاظتی ٹیکہ جات دا نظام ٻیا مؤثر ہوسی تے ویکسین دی دور دراز علاقیاں تائیں رسائی بہتر بݨاوݨ اچ مدد ملسی۔ ایں اقدام نال ٻالاں اچ ویکسینیشن دے تحفظ دے خلا کوں گھٹ کرݨ تے ویکسینیشن کوریج بہتر بݨاوݨ اچ وی مدد ملسی۔ مصطفیٰ کمال گاوی، گلوبل فنڈ، عالمی ادارہ صحت (ڈبلیو ایچ او)، یونیسیف، گیٹس فاؤنڈیشن تے دیگر شراکت داراں دے تعاون دا شکریہ ادا کیتا۔ اجلاس اچ بریفنگ ݙیندیں ہوئیں ݙسایا ڳیا جو مجوزہ شیڈول دے مطابق ٻالاں کوں ہیگزویلنٹ ویکسین 6، 10 تے 14 ہفتیاں دی عمر اچ ݙتی ویسے۔