وزیراعظم شہباز شریف دی گلگت بلتستان اچ شفاف، پرامن تے سیاسی سرگرمیاں نال بھرپور انتخابات تے گلگت بلتستان دی عوام کوں مبارکباد

اسلام آباد۔ 8 جون (اے پی پی) وزیراعظم محمد شہباز شریف گلگت بلتستان اچ شفاف، پرامن تے سیاسی سرگرمیاں نال بھرپور الیکشن دے انعقاد تے گلگت بلتستان دی عوام کوں مبارکباد ݙتی اے ۔ سنوار کوں وزیر اعظم آفس دے میڈیا ونگ دی طرفوں جاری تھیوݨ آلے بیان دے مطابق وزیر اعظم پاکستان پیپلز پارٹی کوں مبارکباد ݙتی جیڑھی گلگت بلتستان الیکشن اچ اکثریتی سیاسی جماعت دے طور تے سامݨے آئی اے۔ وزیر اعظم ایں کامیابی تے صدر آصف علی زرداری تے بلاول بھٹو زرداری کوں مبارکباد ݙتی۔ انھاں پاکستان مسلم لیگ ن دے کامیاب امیدواراں کوں وی مبارک باد ݙتی جنھاں انتخابی میدان اچ چنگا مقابلہ کیتا۔ وزیر اعظم آکھیے جو مسلم لیگ ن دی ٹیم بھرپور محنت کیتی، انھاں کوں شاباش ݙینداں۔ وزیر اعظم آکھیے جو او گلگت بلتستان اچ سارے کامیاب امیدواراں کوں وی مبارکباد ݙیندن، سیاسی سرگرمیاں اچ بھرپور شرکت تے گلگت بلتستان دی عوام وی خصوصی تعریف دے لائق ہن۔ وزیراعظم آکھیے جو پرامن، شفاف الیکشن تے سیاسی سرگرمیاں جمہوریت دا حسن ہن، الیکشن کمیشن شفاف تے غیر جانبدار الیکشن یقینی بݨایا جیڑھا جو قابلِ ستائش اے۔ انھاں پولیس تے قانون نافذ کرݨ آلے اداریاں ولوں پرامن الیکشن دے انعقاد اچ بھرپور کردار تے شاباش ݙتی۔