نائب وزیراعظم اسحاق ڈار دی صدارت اچ اجلاس، آٹو تے آٹو پارٹس پالیسی دے مسودے کوں حتمی شکل ݙیوݨ کیتے ذیلی کمیٹی بݨا ݙتی ڳئی

اسلام آباد۔ 8 جون (اے پی پی) نائب وزیراعظم تے وزیرِ خارجہ سینیٹر محمد اسحاق ڈار ہک اعلیٰ سطحی اجلاس دی صدارت کیتی جیندے اچ آٹو تے آٹو پارٹس پالیسی دا جائزہ گھدا ڳیا، بالخصوص پاکستان اچ الیکٹرک گاݙیاں (EVs) دی منتقلی دے عمل کوں تکھا کرݨ تے توجہ مرکوز کیتی ڳئی۔ سنوار کوں نائب وزیراعظم آفس توں جاری تھیوݨ آلے بیان دے مطابق کمیٹی کوں الیکٹرک گاݙیاں (EVs) کوں فروغ ݙیوݨ، مقامی مینوفیکچرنگ کوں مضبوط بݨاوݨ، معاون حکومتی پالیسیاں دے ذریعے صنعت دی ترقی کوں آسان بݨاوݨ، روزگار دے نویں مواقع پیدا کرݨ، برآمدات ودھاوݨ تے پاکستان اچ موسمیاتی تبدیلیاں دے اثرات کوں گھٹ کرݨ دی کوششاں اچ حصہ ݙیوݨ دے اقدامات دے بارے اچ بریفنگ ݙتی ڳئی۔ نائب وزیراعظم تے وزیرِ خارجہ سینیٹر محمد اسحاق ڈار ہک ایجھے مسابقتی، جدید تے پائیدار آٹوموٹو ایکو سسٹم دی ترقی دی اہمیت تے زور ݙتے جیڑھا معاشی ترقی کوں سہارا ݙیوے، صنعتی صلاحیت کوں ودھاوے، ہنرمند ملازمتاں پیدا کرے تے مستقبل دیاں ضرورتاں نال ہم آہنگ آٹوموٹو سیکٹر دے ذریعے ماحولیاتی پائیداری کوں فروغ ݙیوے۔ ہک جامع تے مشاورتی طریقہ کار کوں یقینی بݨاوݨ کیتے سارے سٹیک ہولڈرز (فریقین) دے نال مشاورت نال جائزہ گھنݨ تے پالیسی دے مسودے کوں حتمی شکل ݙیوݨ کیتے ہک ذیلی کمیٹی بݨا ݙتی ڳئی۔ اجلاس اچ وزرائے توانائی، پٹرولیم تے موسمیاتی تبدیلی، صنعت و پیداوار کیتے وزیراعظم دے مشیر، وزرائے مملکت برائے خزانہ تے ریلوے، وزیراعظم دے معاونِ خصوصی طارق باجوہ، کامرس، صنعت تے پیداوار تے پٹرولیم دے سیکرٹریز، نیشنل کوآرڈینیٹر این سی ایم سی، متعلقہ وزارتاں دے اعلیٰ حکام تے ممتاز پالیسی ماہرین تے ماہرینِ معاشیات شریک ہن۔