اسلام اختلاف دی بجائے مکالمے، طاقت دی بجائے انصاف تے ذاتی مفاد دی بجائے اجتماعی بھلائی دا درس ݙیندے، چیئرمین سینیٹ سید یوسف رضا گیلانی دی عیدگاہ شریف دے سالانہ عرس اچ خصوصی شرکت

راولپنڈی۔ 8 جون (اے پی پی) چیئرمین سینیٹ سید یوسف رضا گیلانی آکھیے جو اسلام اختلاف دی بجائے مکالمے، طاقت دی بجائے انصاف تے ذاتی مفاد دی بجائے اجتماعی بھلائی دا درس ݙیندے۔ عیدگاہ شریف، راولپنڈی اچ منعقد تھیوݨ آلی سالانہ عرس دی بابرکت تقریب اچ انھاں خصوصی شرکت کیتی اتے مریدین، علماء کرام، مشائخ عظام تے معزز شرکاء توں خطاب کریندیں ہوئیں سیرتِ نبویؐ تے اولیائے کرام دی تعلیمات کوں عصرِ حاضر دے قومی تے عالمی چیلنجز دے حل کیتے رہنمائی دا جامع سرچشمہ قرار ݙتے۔ چیئرمین سینیٹ بانی عیدگاہ شریف شیخ المشائخ خواجگان حضرت خواجہ حافظ عبد الکریمؒ، انھاں دے جانشیناں تے موجودہ سجادہ نشین تے روحانی قیادت دی دینی، روحانی تے سماجی خدمات کوں خراجِ تحسین پیش کریندیں ہوئیں آکھیے جو عیدگاہ شریف سلسلہ عالیہ صدقیہ نقشبندیہ دی ہک عظیم روحانی درسگاہ اے جتھوں گزشتہ تقریباً ڈیڑھ صدی توں اسلام، محبت، رواداری تے انسان دوستی دا سنیھا عام کیتا ویندا پئے ۔ انھاں آکھیے جو پاکستان توں علاوہ برطانیہ، امریکہ، یورپ تے مشرقِ وسطیٰ سمیت دنیا دے مختلف خطوں اچ ایں سلسلے نال لکھاں افراد وابستہ ہن جڈانجو موجودہ سجادہ نشین دی عالمی سطح تے تبلیغی خدمات دے نتیجے اچ ٻہوں سارے افراد دائرہ اسلام اچ داخل تھئے۔انھاں آکھیے جو پاکستان کوں درپیش معاشی مشکلات، سماجی ناہمواری، بے روزگاری تے ٻئے چیلنجز دا پائیدار حل سیرتِ نبویؐ اچ موجود دیانتداری، امانت، محنت، انصاف تے خدمتِ خلق جیسے اصولاں اچ لکیا ہویا اے، جے انھاں اقدار کوں قومی ترجیحات دا حصہ بݨایا ونڄے تاں ملک کوں زیادہ مستحکم، خوشحال تے ہم آہنگ بݨایا ونڄ سڳدے۔