فیلڈ مارشل سید عاصم منیر نال لبنانی مسلح افواج دے کمانڈر انچیف دی ملاقات، علاقائی سلامتی دی صورتحال، دفاعی تعاون تے ݙو پاسے فوجی تعلقات کوں ودھاوݨ دے امکانات تے ڳالھ مہاڑ

راولپنڈی۔ 9 جون (اے پی پی) آرمی چیف و چیف آف ڈیفنس فورسز فیلڈ مارشل سید عاصم منیر لبنانی مسلح افواج دے نال دفاعی تعاون کوں ودھاوݨ کیتے پاک فوج دے عزم تے زور ݙتے۔ منگل کوں پاک فوج دے شعبہ تعلقاتِ عامہ توں جاری تھیوݨ آلے بیان دے مطابق آرمی چیف تے چیف آف ڈیفنس فورسز فیلڈ مارشل سید عاصم منیر نال لبنانی مسلح افواج دے کمانڈر انچیف جنرل روڈولف ہیکل اج جنرل ہیڈ کوارٹرز (جی ایچ کیو) اچ ملاقات کیتی۔ جی ایچ کیو پجݨ تے معزز مہمان کوں تریہے مسلح افواج دے چاق و چوبند دستے گارڈ آف آنر پیش کیتا۔ ملاقات دے دوران ݙونھیں شخصیتاں آپسی دلچسپی دے امور، علاقائی سلامتی دی صورتحال، دفاعی تعاون تے ݙو پاسے فوجی تعلقات کوں ودھاوݨ دے امکانات تے ڳالھ مہاڑ کیتی۔ ڳالھ مہاڑ اچ ݙونھیں ملکاں دی مسلح افواج وچال پیشہ ورانہ رابطیاں، تربیتی تعاون تے ادارہ جاتی روابط کوں مضبوط بݨاوݨ تے توجہ مرکوز کیتی ڳئی۔ فیلڈ مارشل سید عاصم منیر ایں ڳالھ دا اعادہ کیتے جو پاکستان لبنان دے نال آپݨے دیرینہ تے خوشگوار تعلقات کوں اہمیت ݙیندے اتے لبنانی مسلح افواج دے نال دفاعی تعاون کوں ودھاوݨ کیتے پاک فوج دے عزم تے زور ݙتے۔ جنرل روڈولف ہیکل پاکستان دی مسلح افواج دی پیشہ ورانہ تے آپریشنل مہارت کوں سراہے اتے علاقائی امن، استحکام تے بین الاقوامی امن دی کوششاں اچ انھاں دے کردار دا اعتراف کیتے۔ اے دورہ ݙونھیں مسلح افواج دے درمیان قریبی فوجی تعاون کوں فروغ ݙیوݨ دے سانجھے عزم دی عکاسی کریندے۔