وسائل تے آبادی اچ توازن پائیدار ترقی دی ضمانت اے، آبادی دی منصوبہ بندی کوں قومی ترقی، معاشی استحکام تے انسانی وسائل دی بہتری نال ہم آہنگ کرݨ دی لوڑھ اے، وزیرِ اعظم محمد شہباز شریف

اسلام آباد۔30 جون (اے پی پی) وزیرِ اعظم محمد شہباز شریف آکھیا اے جو وسائل تے آبادی اچ توازن پائیدار ترقی دی ضمانت اے، تیزی نال ودھدی ہوئی آبادی توں قومی وسائل تے دٻاو ودھدا پئے تے اے ترقی کیتے ہک وݙا چیلنج اے۔ منگل کوں وزیرِ اعظم آفس دے میڈیا ونگ توں جاری کیتے ڳئے بیان دے مطابق اے ڳالھیں انہاں بہبودِ آبادی دے حوالے نال ہک اہم اجلاس دی صدارت کریندیں ہوئیں کیتا۔ وزیرِ اعظم آکھیا جو آبادی دی منصوبہ بندی کوں قومی ترقی، معاشی استحکام تے انسانی وسائل دی بہتری نال ہم آہنگ کرݨ دی ضرورت اے۔ وزیرِ اعظم نیشنل پاپولیشن کونسل دا افتتاحی اجلاس جلد از جلد سݙاوݨ تے قومی سطح تے آبادی توں متعلق پالیسی سازی کیتے نیشنل پاپولیشن کونسل دا تنظیمی ڈھانچہ جلد از جلد مرتب کرݨ دی ہدایت کیتی، وزیرِ اعظم نیشنل پاپولیشن کونسل دی خود سربراہی کریسن۔ نیشنل پاپولیشن کونسل اچ چاریں صوبیاں دے وزرائے اعلیٰ، وزیرِ اعظم آزاد جموں تے کشمیر، وزیرِ اعلیٰ گلگت بلتستان تے ٻئے سٹیک ہولڈرز شامل تھیسن۔ اجلاس کوں ملک دی ودھدی ہوئی آبادی تے ایں کوں کنٹرول کرݨ تے بہبود دے حوالے نال اقدامات تے بریفنگ ݙتی ڳئی۔ اجلاس کوں ݙسایا ڳیا جو سماجی تحفظ دے پروگراماں کوں خاندانی منصوبہ بندی نال جوڑیا ویسے، تریمتیں  دی تعلیم تے انھاں کوں معاشی طور تے بااختیار بݨاوݨ آبادی تے قابو پاوݨ دی حکمتِ عملی دا اہم جزو تھیسی، آبادی اچ توازن تے قابو پاوݨ تے ہک موثر آگاہی مہم چلائی ویسے۔ اسلامی ممالک بنگلہ دیش، انڈونیشیا تے ایران اچ آبادی تے قابو پاوݨ دے کامیاب پروگرام چلدے پئن، قومی پاپولیشن کونسل صوبائی حکومتاں دے تعاون نال قومی سطح تے موثر مہم چلاوݨ اچ مددگار ثابت تھیسی، نیشنل پاپولیشن کونسل دا سیکریٹریٹ وزارتِ منصوبہ بندی تھیسی۔اجلاس اچ چیف آف آرمی سٹاف تے چیف آف ڈیفنس فورسز فیلڈ مارشل سید عاصم منیر، وزیرِ دفاع خواجہ محمد آصف، وفاقی وزیرِ منصوبہ بندی احسن اقبال، وفاقی وزیرِ خزانہ تے محصولات محمد اورنگزیب، وفاقی وزیرِ اطلاعات تے نشریات عطاء اللہ تارڑ، وزیرِ مملکت برائے خزانہ تے ریلوے بلال اظہر کیانی تے متعلقہ اعلیٰ سرکاری افسراں شرکت کیتی۔