اساتذہ دی پیشہ ورانہ تربیت اعلیٰ تعلیمی اداریاں کوں مضبوط بݨاوݨ اچ کلیدی کردار ادا کریندی اے، زرعی تحقیق تے جدید ٹیکنالوجی دا فروغ قومی ترقی، غذائی تحفظ تے معاشی خوشحالی کیتے ضروری اے، وفاقی وزیر اورنگزیب خان کھچی

اسلام آباد۔30 جون (اے پی پی) وفاقی وزیر برائے قومی ورثہ تے ثقافت اورنگزیب خان کھچی آکھیا جو اساتذہ دی پیشہ ورانہ تربیت اعلیٰ تعلیمی اداریاں کوں مضبوط بݨاوݨ اچ کلیدی کردار ادا کریندی اے جڈانجو زرعی تحقیق تے جدید ٹیکنالوجی دا فروغ قومی ترقی، غذائی تحفظ تے معاشی خوشحالی کیتے ضروری اے۔ او بارانی زرعی یونیورسٹی تے اقوامِ متحدہ دے ادارے (یو این او ڈی سی) دے اشتراک نال تھیوݨ آلے ’’پائیدار امن دے قیام کیتے زراعت اچ سماجی کاروباری صلاحیتاں دا فروغ‘‘ دے عنوان نال فیکلٹی ڈویلپمنٹ پروگرام دی تکمیل دی تقریب نال خطاب کریندے پئے ہن۔ وفاقی وزیر آکھیا جو تربیتی پروگرام دا مقصد اساتذہ دی پیشہ ورانہ صلاحیتاں اچ اضافہ، زرعی شعبے اچ سماجی کاروباری رجحانات کوں فروغ ݙیوݨ، نوجواناں کوں بااختیار بݨاوݨ تے پائیدار امن کیتے موثر حکمتِ عملیاں کوں فروغ ݙیوݨ اے۔ انھاں آکھیا جو اساتذہ دی معیاری تربیت نال نہ صرف تعلیمی معیار بہتر تھیندے بلکہ نویں نسل کوں قومی چیلنجز نال نبڑݨ دے قابل وی بݨایا ونڄ سڳدے۔ اورنگزیب خان کھچی آکھیا جو بارانی زرعی یونیورسٹی سمیت ملک دی زرعی جامعیاں غذائی تحفظ تے پائیدار زرعی ترقی دے حصول اچ اہم کردار ادا کریندیاں پئن۔ انھاں ایں موقع تے بارانی زرعی یونیورسٹی تے یو این او ڈی سی دے اشتراک نال فیکلٹی ڈویلپمنٹ پروگرام دے کامیاب انعقاد کوں سراہیندیں ہوئیں آکھیا جو ایجھے اقدامات تعلیمی شعبے تے قومی ترقی کیتے ٻہوں اہم ہن۔ تقریب دے دوران طلبا دی تربیت تے ثقافتی و تعلیمی تعاون دے فروغ کیتے وزارتِ قومی ورثہ تے ثقافت دے ماتحت ادارے لوک ورثہ تے بارانی زرعی یونیورسٹی وچال مفاہمتی یادداشت (ایم او یو) تے وی دستخط کیتے ڳئے۔ ایں معاہدے دے تحت طلبا دی تربیت، ثقافتی آگاہی تے عملی مہارتاں دے فروغ کیتے مشترکہ اقدامات کیتے ویسن۔