نائب وزیرِ اعظم محمد اسحاق ڈار دی صدارت اجلاس، اسلامی تعاون تنظیم دی تریمتیں توں متعلق 9 ویں وزارتی کانفرنس دے انتظامات دا جائزہ گھدا ڳیا

اسلام آباد۔1 جولائی (اے پی پی) نائب وزیرِ اعظم اتے وزیرِ خارجہ سینیٹر محمد اسحاق ڈار اسلامی تعاون تنظیم (او آئی سی) دی تریمتیں توں متعلق 9 ویں وزارتی کانفرنس کیتے قائم اعلیٰ سطح دی کمیٹی دے چھینویں اجلاس دی صدارت کیتی۔ پاکستان 12 تے 13 جولائی کوں ایں اہم کانفرنس دی میزبانی کریسی۔ بدھ کوں دفترِ خارجہ ولوں جاری بیان دے مطابق اجلاس اچ کانفرنس دی تیاریاں دے آخری مرحلے دا تفصیلی جائزہ گھدا ڳیا جئیں اچ پروگرام دے مسودے، کانفرنس دا ایجنڈا، پروٹوکول، سکیورٹی تے انتظامی تے لاجسٹک انتظامات، میڈیا تے ابلاغی حکمتِ عملی، بین الوزارتی رابطے تے ٻئے تنظیمی امور شامل ہن۔ اعلیٰ سطح دی کمیٹی ایں ڳالھ تے غور کیتا جو کانفرنس دے کامیاب تے ہموار انعقاد کوں یقینی بݨاوݨ کیتے سارے ضروری اقدامات بروقت مکمل کیتے ونڄن۔ کانفرنس اچ او آئی سی دے 57 رکن ملک شرکت کریسن جتھ تریمتیں کوں بااختیار بݨاوݨ، شمولیت دے فروغ تے پائیدار ترقی دے حوالے نال آپسی تعاون کوں ٻیا مضبوط بݨاوݨ تے ڳالھ کیتی ویسے۔ نائب وزیرِ اعظم وزارتِ انسانی حقوق ولوں کیتی ڳئی پیش رفت کوں سراہیا اتے سارے متعلقہ اداریاں کوں ہدایت کیتی جو او آپسی رابطے کوں ٻیا مؤثر بݨیندیں ہوئیں باقی ماندہ انتظامات بروقت مکمل کرن۔ اجلاس اچ وفاقی وزیرِ قانون، انصاف و انسانی حقوق سینیٹر اعظم نذیر تارڑ، وفاقی وزیر برائے آئی ٹی تے ٹیلی کمیونیکیشن شزہ فاطمہ خواجہ، وزیرِ اعظم دے معاونِ خصوصی طارق باجوہ، سیکرٹری خارجہ آمنہ بلوچ، سیکرٹری انسانی حقوق عبدالخالق شیخ تے ٻئے اعلیٰ حکام شرکت کیتی۔