اسلام آباد۔2 جولائی (اے پی پی) چیئرمین سینیٹ سید یوسف رضا گیلانی نال پاکستان اچ پرتگال دے سفیر، پاؤلو میگوئیل گوئیڈس ڈومینگیز پارلیمنٹ ہاؤس اچ ملاقات کیتی۔ ملاقات اچ چیئرمین سینیٹ پرتگال دے سفیر دا خیرمقدم کریندیں ہوئیں پاکستان تے پرتگال وچال دیرینہ، دوستانہ تے خوشگوار تعلقات کوں ٻیا مضبوط بݨاوݨ دے پاکستان دے عزم دا اعادہ کیتا۔ سینیٹ سیکرٹریٹ دے مطابق ملاقات اچ چیئرمین سینیٹ آکھیا جو ݙوہیں ممالک …
چیئرمین سینیٹ سید یوسف رضا گیلانی دا پاکستان پرتگال تعلقات کوں ٻیا مستحکم بݨاوݨ دا عزم
اسلام آباد۔2 جولائی (اے پی پی) چیئرمین سینیٹ سید یوسف رضا گیلانی نال پاکستان اچ پرتگال دے سفیر، پاؤلو میگوئیل گوئیڈس ڈومینگیز پارلیمنٹ ہاؤس اچ ملاقات کیتی۔ ملاقات اچ چیئرمین سینیٹ پرتگال دے سفیر دا خیرمقدم کریندیں ہوئیں پاکستان تے پرتگال وچال دیرینہ، دوستانہ تے خوشگوار تعلقات کوں ٻیا مضبوط بݨاوݨ دے پاکستان دے عزم دا اعادہ کیتا۔ سینیٹ سیکرٹریٹ دے مطابق ملاقات اچ چیئرمین سینیٹ آکھیا جو ݙوہیں ممالک آپسی تے کثیرالجہتی سطح تے امن، استحکام تے پائیدار ترقی دے فروغ کیتے قریبی تعاون جاری رکھے ہوئن۔ چیئرمین سینیٹ اعلیٰ سطح دے روابط کوں ٻیا فروغ ݙیوݨ دی اہمیت تے زور ݙیندیں ہوئیں ایں امید دا اظہار کیتا جو اسلام آباد اچ تھیوݨ آلے آئندہ ݙوپاسہ سیاسی مشاورتی اجلاس ݙوہائیں ممالک وچال تعاون کوں ٻیا وسعت ݙیوݨ اچ اہم کردار ادا کریسن۔ اقتصادی تعلقات دا ذکر کریندیں ہوئیں سید یوسف رضا گیلانی ݙوپاسہ تجارت اچ مسلسل اضافے دا خیرمقدم کیتا اتے تجارت، سرمایہ کاری، زراعت، انفارمیشن ٹیکنالوجی، تعلیم، ثقافت تے بلیو اکانومی سمیت مختلف شعبیاں اچ تعاون کوں فروغ ݙیوݨ دی لوڑھ تے زور ݙتا۔ انھاں جی ایس پی پلس دے حوالے نال پاکستان دی حمایت تے پرتگال دا شکریہ ادا کریندیں ہوئیں ایں ضمن اچ آئندہ وی تعاون جاری رہݨ دی امید ظاہر کیتی۔ چیئرمین سینیٹ پرتگال اچ مقیم پاکستانی برادری کوں ݙوہائیں ممالک وچال تعلقات کوں مضبوط بݨاوݨ اچ ہک مؤثر پل قرار ݙتا۔ انھاں تعلیمی تعاون، جامعات دے مابین تبادلیاں تے ہنرمند افرادی قوت دی نقل و حرکت کوں فروغ ݙیوݨ دی لوڑھ تے زور ݙیندیں ہوئیں لیبر موبیلٹی پارٹنرشپ معاہدے کوں جلد حتمی شکل ݙیوݨ دی خواہش دا اظہار کیتا۔ ملاقات دے چھیکڑ تے ݙوہیں پاسوں پاکستان تے پرتگال وچال ݙوپاسہ تعلقات کوں ٻیا مضبوط بݨاوݨ تے ݙوہیں ممالک دے عوام دے آپسی مفاد اچ مختلف شعبیاں اچ تعاون کوں ودھاوݨ دا عزم کیتا ڳیا۔
