’ہک قوم، ہک نظام‘ وژن دے تحت ملک بھر اچ ای پیڈز 2.0 دی لانچنگ دیاں تیاریاں مکمل، گزشتہ برھے دے دوران ای پیڈز دے استعمال توں انتظامی اخراجات اچ 20 ارب 52 کروڑ روپے دی بچت ریکارڈ

اسلام آباد۔2 جولائی (اے پی پی) پبلک پروکیورمنٹ ریگولیٹری اتھارٹی ’ہک قوم، ہک نظام‘ وژن دے تحت ای پاکستان ایکوزیشن اینڈ ڈسپوزل سسٹم یعنی ای پیڈز 2.0 دی لانچنگ دیاں تیاریاں مکمل کر گھدن، اے اقدام سرکاری خریداری دے نظام کوں جدید خطوط تے استوار کرݨ، شفافیت تے احتسابی عمل کوں ٻٰا مضبوط بݨاوݨ تے وزیرِ اعظم دے ڈیجیٹل پاکستان دے وژن دے مطابق نظام کوں مکمل طور تے ڈیجیٹل بݨاوݨ دے وفاقی حکومت دے عزم دا مظہر اے۔ اے ڳالھیں نیجنگ ڈائریکٹر پیپرا حسنات احمد قریشی خمیس کوں اتھاں پریس کانفرنس نال خطاب کریندیں ہوئیں کیتا۔ ایں موقع تے ڈائریکٹر جنرل لیگل پیپرا محمد اسلم وسیم تے پراجیکٹ ڈائریکٹر ای پیڈز شیخ افضل رضا وی موجود ہن۔ منیجنگ ڈائریکٹر پیپرا ݙسایا جو ای پیڈز دا نواں ورژن سرکاری خریداری تے معاہدہ جاتی نظم و نسق دا ہک جدید تے آسان نظام اے جیں کوں بین الاقوامی معیار تے مستقبل دے ڈیجیٹل تقاضیاں دے مطابق ای پیڈز ٹیم خود تیار کیتے۔ اے نظام سپلائر رجسٹریشن، بینیفیشل اونرشپ دی تصدیق، ای انوائسنگ، ڈیجیٹل ادائیگیاں، ای بولی جمع کراوݨ، نظام دے تحت بولیاں دی جانچ، مختلف اداریاں دے آپسی انضمام، نگرانی دے ڈیش بورڈز تے مالی منصوبہ بندی بہتر بݨاوݨ کیتے کمٹمنٹ اکاؤنٹنگ سویں سہولیات فراہم کریندے۔ انھاں آکھیا جو ای پیڈز دا نواں ورژن دراصل اساݙے ’ہک قوم، ہک نظام‘ دے وژن دی عملی تعبیر اے جیہڑا ہک ایجھا واحد تے مشترکہ ڈیجیٹل پلیٹ فارم فراہم کریندے جئیں توں کارکردگی، احتساب تے مالیاتی نظم و ضبط کوں فروغ ملسی جڈانجو کاروبار کرݨ دی لاگت اچ وی نمایاں ڳھٹکی امسی۔ انھاں ݙسایا جو ای پیڈز دے نویں ورژن دا اجراء ای پیڈز دے پہلے سسٹم دی کامیابیاں دا تسلسل اے جئیں دے ذریعے مالی سال 2025۔26 دے دوران 14 کھرب روپے توں ودھ مالیت دے لین دین مکمل تھئے، 10 ہزار توں ودھ سرکاری ادارے تے 51 ہزار سپلائرز رجسٹر تھئے، رواں برھے ماہِ فروری توں وفاقی حکومت اچ ای پیڈز دا نواں ورژن نافذ کیتا ڳئے جتھاں ہݨ تائیں 18 سو توں زائد سرکاری ادارے تے 19 ہزار سپلائرز رجسٹرڈ تھی چکن، نویں سسٹم دے ذریعے ست ہزار توں ودھ خریداریاں مکمل کیتیاں ڳئن۔ انھاں ݙسایا جو اے نظام ایف بی آر، نادرا، ایس ای سی پی، پاکستان انجینئرنگ کونسل، صوبائی ریونیو اتھارٹیز تے ڈریپ دے نال مکمل طور تے منسلک اے جڈانجو نگرانی دی سہولت قومی احتساب بیورو، کمپیٹیشن کمیشن تے آڈیٹر جنرل آف پاکستان کوں وی فراہم کر ݙتی ڳئی اے۔ حسنات قریشی ایں امر کوں اجاگر کیتا جو ملک اچ خریداری دے نظام کوں جدید خطوط تے استوار کرݨ اچ وزیرِ اعظم دی دلچسپی شامل رہی اے اتے مالی سال 2024-25 دے دوران ای پیڈز دے تیز رفتار نفاذ دے باعث خریداری دے انتظامی اخراجات اچ 20 ارب 52 کروڑ روپے دی نمایاں بچت ممکن تھئی۔ ایں اچ خریداری کرݨ آلے اداریاں کیتے 17 ارب 18 کروڑ روپے جڈانجو سپلائرز کیتے 3 ارب 33 کروڑ روپے دی بچت شامل اے۔ انھاں آکھیا جو اے کامیابی کارکردگی اچ بہتری، کاروبار کرݨ دی لاگت اچ ڳھٹکی تے طریقہ کار کوں آسان تے موثر بݨاوݨ دے ذریعے حاصل تھئی۔ ایم ڈی پیپرا ݙسایا جو روایتی کاغذی طریقہ کار دے بجائے ای پیڈز دے استعمال توں خریداریاں دی کانٹریکٹ لاگت اچ وی خاطر خواہ بچت دے مواقع موجود ہن۔ انھاں آکھیا جو صرف چار خریداریاں اچ ہک ارب 86 کروڑ روپے دی بچت کیتی ڳئی۔ اِنھاں اچ ہائر ایجوکیشن کمیشن پاسوں ہک لکھ لیپ ٹاپس دی خریداری، گیپکو تے پیسکو پاسوں توانائی میٹرز دی خریداری اچ مجموعی طور تے 10 کروڑ 56 لکھ روپے دی بچت، خیبرپختونخوا ٹیکسٹ بک بورڈ پاسوں کتاباں دی خریداری اچ لاگت کوں 13 ارب 39 کروڑ روپے توں ڳھٹ کر تے 12 ارب 75 کروڑ روپے تائیں گھن آوݨ، تے فیڈرل ڈائریکٹوریٹ آف امیونائزیشن دی پاسوں ٹی ڈی ویکسین دی خریداری شامل ہن۔ انھاں آکھیا جو اِنھاں اقدامات دے نتیجے اچ اوسطاً 29.8 فیصد بچت حاصل تھئی جڈانجو ایں شرح اچ 10 توں 15 فیصد تائیں اضافے دے امکانات موجود ہن۔ انھاں آکھیا جو ڈیجیٹل تبدیلی دے نال نال پیپرا وزیرِ اعظم محمد شہباز شریف دی پاسوں نومبر 2024ء اچ منظور کردہ اصلاحاتی روڈ میپ دے مطابق مختلف شعبیاں اچ اصلاحات نافذ کیتن۔ اے روڈ میپ عالمی بینک دے بین الاقوامی ماہرین دی تشخیصی رپورٹ دی بنیاد تے تیار کیتا ڳیا ہئی۔ ایم ڈی پیپرا ݙسایا جو ادارے دی تکنیکی تے قانونی استعداد ودھاوݨ تے ای پیڈز دے نویں ورژن دی از خود تیاری کیتے ماہرین دی بھرتی، وفاقی اداریاں اچ 200 توں زائد پروکیورمنٹ سیلز دے قیام، ای پیڈز کیتے خصوصی پراجیکٹ مینجمنٹ یونٹ، جدید تربیتی لیب تے 16 گھنٹے فعال ہیلپ ڈیسک دے قیام جیہڑے اقدامات دے ذریعے ادارہ جاتی اصلاحات کوں یقینی بݨایا ڳیا اے۔ ریگولیٹری اصلاحات دے ضمن اچ پیپرا آرڈیننس 2002ء اچ ترامیم، پبلک پروکیورمنٹ رولز 2025ء دی تیاری تے نویں ضوابط مرتب کرݨ جیہڑے اقدامات یقینی بݨائے ڳئے، نویں قواعد دے تحت الیکٹرانک خریداری تے ای ڈسپوزل کوں لازمی قرار ݙتا ڳئے جڈانجو شکایات دے ازالے دیاں کمیٹیاں، بلیک لسٹنگ دے موثر نظام، تھرڈ پارٹی نگرانی، فریم ورک معاہدیاں تے معاہدہ جاتی نظم و نسق جیہڑے اقدامات وی شامل کیتے ڳئن۔ انھاں آکھیا جو استعداد کار اچ اضافہ اصلاحاتی ایجنڈے دا مرکزی جزو رہیے اتے ہݨ تائیں 14,752 افسراں تے وینڈرز کوں تربیت فراہم کیتی ڳئی اے جنھاں اچ برھے 2023ء اچ ای پیڈز دے آغاز دے بعد 7,491 افراد شامل ہن، اے تربیت پی پی آر اے خود بھی فراہم کیتی جبکہ لمز، آئی بی اے، نسٹ، ایئر یونیورسٹی تے کامسیٹس جیہڑیاں جامعات دے اشتراک نال وی تربیتی پروگرام منعقد کیتے ڳئے۔ ایں موقع تے منیجنگ ڈائریکٹر پیپرا 2026-31ء تے مشتمل پنج سالیں دا اصلاحاتی روڈ میپ وی پیش کیتا جئیں دے تحت ای پیڈز دے نویں ورژن کوں ملک بھر اچ نافذ کرݨ، اوپن کانٹریکٹنگ ڈیٹا سٹینڈرڈز، مانیٹرنگ اینڈ ایویلیوایشن تے کثیر الجہتی ترقیاتی بینکاں دے مالی تعاون نال ہووݨ آلی خریداری دے ماڈیولز تے ڈیش بورڈز متعارف کراوݨ، سرکاری اداریاں کیتے خصوصی ماڈیول تیار کرݨ، معاہدہ جاتی نظم و نسق دے نظام کوں مزید مربوط بݨاوݨ، نیشنل پروکیورمنٹ سٹریٹجی تے پائیدار خریداری پالیسی تشکیل ݙیوݨ، مصنوعی ذہانت (AI) تے مبنی تجزیاتی نظام متعارف کراوݨ، پیپرا قوانین دی عدم تعمیل اچ کمی، خریداری دے عمل دے دورانیے اچ کمی تے خریداری نال وابستہ افسران و وینڈرز دی پیشہ ورانہ استعداد بہتر بݨاوݨ دے اہداف مقرر کیتے ڳئن۔