چیئرپرسن بی آئی ایس پی نال انٹرنیشنل لیبر آرگنائزیشن پاکستان دے کنٹری ڈائریکٹر گیر تھامس ٹونسٹول دی ملاقات

اسلام آباد۔2 جولائی (اے پی پی) چیئرپرسن بینظیرانکم سپورٹ پروگرام سینیٹر روبینہ خالد نال انٹرنیشنل لیبر آرگنائزیشن (آئی ایل او) پاکستان دے کنٹری ڈائریکٹر گیر تھامس ٹونسٹول اتھاں بی آئی ایس پی ہیڈکوارٹرزاچ ملاقات کیتی۔ بی آئی ایس پی دے ترجمان موجب ملاقات اچ بینظیر ہنرمند پروگرام دے تحت ݙوہیں اداریں وچال آپت دے تعاون کوں مزید ودھاوݨ دے مختلف پہلوواں تے ڳالھ مہاڑ کیتی ڳئی۔ملاقات اچ بی آئی ایس پی دی تریمت بینیفشریز اچ ہنرمندی دی تربیت، روزگار دے بہتر موقع، استعداد کار اچ ودھارے تے ادارہ جاتی رابطے کوں تکڑا بݨاوݨ کیتے مشترکہ طور تے کم کرݨ تے وی اتفاق کیتا ڳیا۔ ایں موقع تے چیئرپرسن بی آئی ایس پی سینیٹر روبینہ خالد آکھیا جو بی آئی ایس پی اچ جاری اصلاحات دے تحت مستحق تریمتاں دی مالی شمولیت، ادائیگیاں اچ شفافیت تے سہولت کوں مزید بہتر بݨاوݨ کیتے ڈیجیٹل والٹ دا نظام متعارف کرایا ویندا پئے۔ انھاں آکھیا جو عالمی بینک دی ہک تحقیق موجب بی آئی ایس پی محض ہک سماجی تحفظ دا پروگرام نئی بلکہ ایں دے مثبت اثرات مقامی معیشت تے وی نمایاں طور تے سامݨے آندے پئن۔انھاں آکھیا جو بینظیر ہنرمند پروگرام غربت توں نجات دی پاسے ہک اہم قدم اے جیں دا مقصد مستحق خانداناں کوں مارکیٹ دی لوڑھاں موجب ہنر سکھا کر انھاں کوں معاشی طور تے خودمختار بݨاوݨ تے انھاں دے معیارِ زندگی کوں بہتر بݨاوݨ اے۔ انھاں ایں ڳالھ تے زور ݙتا جو آئی ایل او دے تعاون نال مختلف شعبیں بالخصوص تریمتاں دی دستکاری، ہوٹل مینجمنٹ، سیاحت تے ٻئے ابھردے ہوئے شعبہ جات اچ ہنر مندی دی تربیت ݙتی ونڄ سڳدی اے جتھاں روزگار دی زیادہ لوڑھ تے گنجائش موجود اے۔گیر تھامس ٹونسٹول پاکستان اچ سماجی تحفظ دے نظام کوں تکڑا بݨاوݨ اچ بی آئی ایس پی دے کردار دی تعریف کیتی تے ہنر مندی، باوقار روزگار تے مستحق خانداناں کیتے پائیدار معاشی موقع پیدا کرݨ کیتے بی آئی ایس پی دے نال تعاون اچ دلچسپی دا اظہار کیتا۔ ملاقات دے اختتام تے ݙوہیں اداریں آپت دے دلچسپی دے شعبیں دی نشاندہی کیتے فوکل پرسنز نامزد کرݨ تے مشترکہ ورک پلان تیار کرݨ تے اتفاق کیتا تانجو مستقبل اچ مفاہمتی یادداشت تے دستخط دے ذریعے ایں تعاون کوں باضابطہ تے دیرپا شکل ݙتی ونڄ سڳے۔