چینی سرمایہ کار پاکستان دی بندرگاہواں، لاجسٹکس تے بحری شعبے اچ سرمایہ کاری ودھاون، وفاقی وزیر جنید انوار چوہدری

اسلام آباد۔21جولائی (اے پی پی) وفاقی وزیر بحری امور محمد جنید انوار چوہدری چینی سرمایہ کاراں تے زور ݙتے جو او پاکستان دی بندرگاہواں، لاجسٹکس تے بحری شعبے اچ سرمایہ کاری ودھاون کیوں جو حکومتِ پاکستان ملک کوں علاقائی ٹرانزٹ ٹریڈ، لاجسٹکس تے صنعتی مرکز بݨاوݨ کیتے جامع اصلاحات تے عمل کریندی پئی اے وزارت توں جاری پریس ریلیز موجب بیجنگ اچ ریجنل ٹرانزٹ ٹریڈ ہب انیشی ایٹو توں خطاب کریندیں وفاقی وزیر آکھیا جو پاکستان تے چین وچال سٹریٹجک شراکت داری ہݨ ہک نویں مرحلے اچ داخل تھی چکی اے، جتھاں رابطہ سازی، تجارتی سہولت کاری، لاجسٹکس، صنعتی ترقی تے پائیدار اقتصادی نمو کوں ودھارا ݙتا ویندا پئے۔انھاں آکھیا جو عالمی تجارت تکھے تبدیل تھیندی پئی اے، جتھاں ڈیجیٹلائزیشن، سمارٹ لاجسٹکس، مضبوط سپلائی چینز، گرین شپنگ تے ملٹی موڈل ٹرانسپورٹ مستقبل دی تجارت دا رخ متعین کریندے پئن، اِنھاں چیلنجز نال نبڑݨ تے نویں موقع توں فیدہ چاوݨ کیتے علاقائی تعاون تے جدید حکمتِ عملی ناگزیر اے۔ وفاقی وزیر آکھیا جو پاکستان دا منفرد جغرافیائی محلِ وقوع ایں کوں علاقائی تے بین الاقوامی تجارت کیتے قدرتی گیٹ وے بݨیندے۔ کراچی پورٹ ٹرسٹ، پورٹ قاسم اتھارٹی، گوادر پورٹ اتھارٹی تے پاکستان نیشنل شپنگ کارپوریشن سودھے ملکی بحری ادارے پاکستان کوں جدید میری ٹائم، لاجسٹکس تے صنعتی مرکز بݨاوݨ دے وژن تے عمل کریندے پئن، جیں توں نہ صرف پاکستان بلکہ پورا خطہ فیدہ تھیسی۔انھاں آکھیا جو ریجنل ٹرانزٹ ٹریڈ ہب دا تصور پاکستان دی قومی اقتصادی ترجیحات نال مکمل مطابقت رکھیندے تے ایں دے تحت بندرگاہواں دی جدیدکاری، ملٹی موڈل ٹرانسپورٹ کوریڈورز، لاجسٹکس پارکس، صنعتی انفراسٹرکچر، بحری خدمات، ڈیجیٹل تجارتی سہولت کاری تے ویلیو ایڈڈ لاجسٹکس پلیٹ فارمز اچ سانجھی سرمایہ کاری دے وسیع موقع موجود ہن۔ محمد جنید انوار چوہدری آکھیا جو چین پاکستان اقتصادی راہداری (سی پیک) دا فلیگ شپ منصوبہ گوادر پورٹ بندرگاہی آپریشنز، لاجسٹکس، ویئر ہاؤسنگ، فری زون ڈویلپمنٹ تے بحری صنعتاں اچ سرمایہ کاری دے غیر معمولی امکانات ݙیندے۔انھاں چینی کمپنیاں کوں اِنھاں منصوبیں اچ بھرپور شرکت دی دعوت ݙیندیں یقین ݙوایا جو حکومت سرمایہ کاراں کوں شفاف، سازگار تے کاروبار دوست ماحول ݙیوݨ کیتے پرعزم اے تاں جو ݙوہیں ملکاں کیتے طویل المدتی تے سانجھے مفاد تے مبنی شراکت داری کوں ودھارا ݙتا ونڄ سڳے۔ وفاقی وزیر ایں موقع تے جیانگ ٹون لینڈ انٹرنیشنل ہولڈنگز دا وی شکریہ ادا کیا، جنھاں علاقائی رابطے تے اقتصادی تعاون دے ودھارے کیتے حکومتی تے تجارتی رہنماواں کوں ہک پلیٹ فارم تے جمع کیتا۔ انھاں ایں عزم دا اعادہ کیتا جو پاکستان تے چین دی غیر معمولی دوستی کوں مزید مستحکم کریندیں تجارت، سرمایہ کاری تے علاقائی رابطے دے ودھارے دے ذریعے ݙوہیں ملکاں دے عوام کیتے ہک زیادہ مربوط، مستحکم تے خوشحال مستقبل دی بنیاد رکھی ویسی۔