وزیراعظم شہباز شریف دی زیرِ صدارت نیشنل ہائی وے اتھارٹی دے امور تے جائزہ اجلاس

اسلام آباد۔6 اکتوبر(اے پی پی)وزیراعظم محمد شہباز شریف نیشنل ہائی وے اتھارٹی دے جاری منصوبیاں دا تھرڈ پارٹی آڈٹ کرواوݨ اتے قومی شاہراہاں، موٹر ویز تے ایکسپریس ویز دی تعمیر کوں پبلک پرائیویٹ پارٹنرشپ دے تحت کرݨ بارے حکمتِ عملی بݨاوݨ دی ہدایت ݙیندے آکھیے جو حکومت ملک دے دور دراز علاقیاں کوں ملک دے ٻئے علاقیاں نال جوڑݨ دے حوالے نال ترجیحی بنیاداں تے کم کریندی پئی اے۔ وزیراعظم محمد شہباز شریف دی زیرِ صدارت نیشنل ہائی وے اتھارٹی دے امور تے ہک جائزہ اجلاس وزیراعظم ہاؤس اچ تھئے۔ اجلاس اچ قومی شاہراہاں، موٹر ویز اتے ایکسپریس ویز بارے جاری ترقیاتی کماں دا جائزہ ڳھدا ڳیا۔ وزیراعظم آکھیا جو آمد و رفت دے ذرائع اچ بہتری کہیں وی ملک دی ترقی اتے خوشحالی کیتے ضروری اے۔ انہاں آکھیا جو حکومت ملک دے دور دراز علاقیاں کوں ملک دے ٻئے علاقیاں نال جوڑݨ دے حوالے نال ترجیحی بنیاداں تے کم کریندی پئی اے تاں جو انہاں علاقیاں دی عوام کوں بہترین سفری سہولتاں ݙتیاں ونڄن اتے اتھاں کاروبار اتے روزگار دے ودھ مواقع نکل سڳن۔ وزیراعظم نیشنل ہائی وے اتھارٹی دے جاری منصوبیاں دا تھرڈ پارٹی آڈٹ کرواوݨ دی ہدایت کیتی جو قومی شاہراہواں، موٹر ویز اتے ایکسپریس ویز دی تعمیر کوں پبلک پرائیویٹ پارٹنرشپ دے تحت کرݨ دے حوالے نال حکمتِ عملی بݨائی ونڄے۔ اجلاس کوں نیشنل ہائی وے اتھارٹی دے جاری تے مجوزہ منصوبیاں تے بریفنگ ݙتی ڳئی۔ اجلاس اچ وفاقی وزیرِ منصوبہ بندی احسن اقبال، وفاقی وزیرِ مواصلات و پوسٹل سروسز عبدالعلیم خان، وفاقی وزیرِ اقتصادی امور احد خان، وفاقی وزیرِ اطلاعات و نشریات عطاء اللہ تارڑ، وزیراعظم دے مشیر برائے نجکاری محمد علی، وزیرِ مملکت برائے خزانہ و ریلوے بلال اظہر کیانی تے متعلقہ اعلیٰ سرکاری افسران شرکت کیتی۔