پاک چین بی ٹو بی فارماسیوٹیکل اینڈ ہیلتھ کیئر انویسٹمنٹ کانفرنس اچ فارماسیوٹیکل سیکٹر دے چھی اہم ذیلی شعبیں تے خصوصی توجہ ݙتی ڳئی، مصطفیٰ کمال

اسلام آباد۔22جولائی (اے پی پی) وفاقی وزیرِ قومی صحت سید مصطفیٰ کمال آکھیے جو پاک چین بی ٹو بی فارماسیوٹیکل اینڈ ہیلتھ کیئرانویسٹمنٹ کانفرنس اچ فارماسیوٹیکل سیکٹر دے چھی اہم ذیلی شعبیں تے خصوصی توجہ ݙتی ڳئی، جیں دا مقصد پاکستان اچ سرمایہ کاری، ٹیکنالوجی دی منتقلی تے مقامی صنعت کوں ودھارا ݙیوݨ اے۔ انھاں آکھیا جو پاکستان اچ استعمال تھیوݨ آلی 13 ویکسینز مکمل طور تے درآمد کیتیاں ویندن، تاں جو حکومت ملک دی پہلی قومی ویکسین پالیسی تیار کر ڳھدی اے، جیڑھی مقامی سطح تے ویکسین سازی دا رستہ ہموار کریسی۔ اے ڳالھ انہاں پریس کانفرنس کریندیں آکھی۔انھاں آکھیا جو صحت دا شعبہ حساس اے تے اتھاں عام نی بلکہ تجربہ کار لوکاں دی لوڑھ ہوندی اے۔ انھاں ݙسایا جو ایں ویلھے پاکستان آپݨی 85 فیصد دوائیں خود تیار کریندے، تاں جو اِنھاں دوائیں دی تیاری کیتے استعمال تھیوݨ آلا تقریباً 95 فیصد خام مال درآمد کیتا ویندے۔ مصطفیٰ کمال آکھیا جو وزارتِ صحت دی ٹیم پاکستانی تے چینی کمپنیاں وچال مؤثر ’’میچ میکنگ‘‘ دا عمل مکمل کیتا، جیں دے نتیجے اچ ݙو ݙینھ وار کانفرنس اچ 240 وفد تے 140 چینی کمپنیاں شرکت کیتی، ڄݙاں جو 340 ݙوطرفہ کاروباری ملاقاتاں تھئیاں۔ انھاں ݙسایا جو کانفرنس دے دوران 22 کمپنیاں 629.5 ملین امریکی ڈالر مالیت دے معاہدیں تے دستخط کیتے، ڄݙاں جو 800 ملین امریکی ڈالر دے مفاہمتی یادداشتاں (ایم او یوز) تے وی دستخط تھئے۔انھاں آکھیا جو ہݨ اِنھاں کمپنیاں دے نال عملی منصوبیں تے عملدرآمد کیتے باقاعدہ رابطہ تے مشاورت جاری اے۔ وفاقی وزیر آکھیا جو صحت دا شعبہ ہمیشہ ترقی کرݨ آلا شعبہ اے تے پاکستان دی آبادی 26 کروڑ توں تجاوز کر چکی اے۔ انھاں آکھیا جو پاکستان اچ ہر سال نیوزی لینڈ دی کل آبادی دے برابر نویں لوکاں دا ودھارا تھیندا پئے تے 2030 تئیں پاکستان آبادی دے لحاظ نال دنیا دا چوتھا وݙا ملک بݨ ویسی۔ مصطفیٰ کمال اسلام آباد پولیس دی خدمات دی تعریف کریندے آکھیے وفد کوں ایئرپورٹ توں استقبال، رہائش تے ٻئے انتظامات دی بہترین ذمہ واری نبھائی ڳئی، جیں تے دنیا پاکستان دے انتظامات دی تعریف کیتی۔انھاں آکھیا جو وزیراعظم دی موجودگی اچ نو اہم معاہدیں تے دستخط کروائے ڳئے، ڄݙاں جو ڈریپ دے نظام اچ وݙیاں اصلاحات کیتیاں ڳئن۔ انھاں ݙسایا جو ہک میڈیکل ڈیوائس دی رجسٹریشن، جیں اچ پہلے ڈھائی توں ترائے سال لڳدے ہن تے بدعنوانی دے الزامات سامݨے آندے ہن، ہݨ مکمل طور تے ڈیجیٹل نظام دے ذریعے انجام ݙتی ویندی پئی اے۔ وفاقی وزیر آکھیا جو پاکستان ایں ویلھے 52 ملکاں کوں دوائیں برآمد کریندا پئے تے آندے ہک سال دے اندر ڈریپ کوں سو فیصد ڈیجیٹلائز کر ݙتا ویسی۔