وفاقی وزیر تجارت جام کمال خان نال سام سنگ پاکستان دے کنٹری ہیڈ دی وفد دے رلے ملاقات

اسلام آباد۔22جولائی (اے پی پی) وفاقی وزیر تجارت جام کمال خان معروف ٹیک کمپنی سام سنگ کوں پاکستان اچ تیار تھیوݨ آلے موبائل فونز دی برآمدات ودھاوݨ تے پاکستان کوں موبائل فون مینوفیکچرنگ، ریفربشمنٹ تے برآمدات دا علاقائی مرکز بݨاوݨ دی دعوت ݙیندیں یقین ݙیوائے جو حکومت برآمدات، ویلیو ایڈیشن تے صنعتی سرمایہ کاری دے ودھارے کیتے ہر ممکن تعاون کریسی۔ وزارتِ تجارت دے ترجمان موجب وزارتِ تجارت اچ سام سنگ پاکستان دے کنٹری ہیڈ وفد دے رلے وفاقی وزیر تجارت نال ملاقات کیتی۔وفاقی وزیر سام سنگ تے زور ݙتا جو او پاکستان دی مقامی مارکیٹ تئیں محدود رہݨ دے بجائے اتھاں تیار کیتے ونڄݨ آلے اسمارٹ فونز کوں بالخصوص افریقی ملکاں تے ٻئیاں ابھردیاں منڈیاں اچ برآمد کرے۔ انھاں آکھیا جو پاکستان کوں آپݨی ودھدی مینوفیکچرنگ صلاحیت توں فیدہ چیندے عالمی سپلائی چین دا حصہ بݨݨا چاہیدے۔ جام کمال خان پاکستان اچ تصدیق شدہ موبائل فون ریفربشمنٹ مرکز بݨاوݨ دی سام سنگ دی تجویز دی وی تعریف کیتی۔جام کمال خان صنعت دی طرفوں ٹیکس متعلق تحفظات دا نوٹس گھندیں آکھیا جو انھاں دا جائزہ وسیع تر مالیاتی فریم ورک دے تحت ڳھدا ویسی، کہیں وی مراعات کوں سرمایہ کاری، مقامی پیداوار، برآمدات تے ویلیو ایڈیشن نال مشروط کیتا ویسی۔ انھاں صنعت کوں ہدایت کیتی جو تصدیق شدہ ریفربشمنٹ، برآمدی امکانات، سرمایہ کاری دے وعدیں تے بین الاقوامی بہترین طریقہ کار متعلق تفصیلی تجویزاں پیش کیتیاں ونڄن تاں جو نظرثانی شدہ موبائل ڈیوائس مینوفیکچرنگ پالیسی دی تیاری اچ انھاں کوں شامل کیتا ونڄ سڳے۔انھاں زور ݙتا جو استعمال تھئے موبائل فونز دی تجارتی درآمدات متعلق کوئی وی فیصلہ شواہد دی بنیاد تے، مرحلہ وار تے مقامی طور تے تصدیق شدہ ریفربشڈ متبادل دی دستیابی کوں سامݨے رکھیندیں کیتا ونڄے تاں جو صارفین دے مفادات دا مکمل تحفظ یقینی بݨایا ونڄ سڳے۔ وفاقی وزیر تجارت ایں عزم دا اعادہ کیتا جو حکومت صنعتی ترقی دے ودھارے کیتے پرعزم اے تے پاکستان عالمی ٹیکنالوجی کمپنیاں کیتے سرمایہ کاری دے وسیع موقع ݙیندے۔ انھاں امید ظاہر کیتی جو سام سنگ جیھے عالمی اداریں دے نال تکڑے تعاون توں سرمایہ کاری، روزگار دے موقع تے ملکی برآمدات اچ مزید ودھارا تھیسی۔