سعودی عرب تے بحیرۂ احمراچ تجارتی جہاز رانی دے خلاف حوثی ملیشیا دیاں تڑیاں قابلِ مذمت، اے علاقائی سلامتی و عالمی تجارت کیتے نقصان دہ ہن، پاکستان

اسلام آباد۔22جولائی (اے پی پی) پاکستان سعودی عرب تے بحیرۂ احمر اچ تجارتی جہاز رانی دے خلاف حوثی ملیشیا دی طرفوں جاری مسلسل تڑیاں دی مذمت کریندے آکھیے جو ایں نوعیت دی کارروائیاں علاقائی سلامتی کیتے خطرہ، جہاز رانی دی آزادی کیتے نقصان دہ، قواعد تے مبنی بحری نظام کیتے چیلنج تے عالمی تجارت دے بلا تعطل وہݨ کوں متاثر کریندن۔ ترجمان دفترِ خارجہ آپݨے بیان اچ آکھیے جو تجارتی جہاز رانی تے سعودی عرب دے نال تجارتی سرگرمیاں کوں نشانہ بݨاوݨ دیاں تڑیاں ناقابلِ قبول تے بین الاقوامی قانون دے مسلمہ اصولاں دی خلاف ورزی ہن۔بیان اچ آکھیا ڳئے جو پاکستان کوں بالخصوص انھاں اطلاعات تے تشویش اے جنھاں موجب سعودی عرب دے نال قانونی تجارتی سرگرمیاں اچ مصروف جہازاں کوں تڑیاں ݙتیاں ویندیاں پئن۔ بیان اچ پاکستان دے ایں عزم دا اعادہ کیتا ڳیا جو پاکستانی پرچم بردار جہازاں یا پاکستان دے بحری مفادات دے خلاف کہیں بوھی قسم دی جارحانہ کارروائی کوں پاکستان دی قومی سلامتی تے خودمختار مفادات کیتے سنگین خطرہ تصورکیتا ویسی۔ بیان موجب پاکستان اقوامِ متحدہ دے منشور تے بین الاقوامی قانون موجب آپݨے بحری اثاثیں تے قومی مفادات دے تحفظ کیتے حقِ دفاع دے تحت سارے ضروری اقدامات بشمول قانون موجب طاقت دے استعمال دا حق محفوظ رکھیندے۔پاکستان مشرقِ وسطیٰ دے جھیڑے اچ سعودی عرب کوں گھیلݨ دیاں کوششاں تے وی تشویش کریندیں بھرا ملک سعودی عرب دی سلامتی، خودمختاری، علاقائی سالمیت تے خوشحالی کیتے آپݨی غیر متزلزل حمایت دا اعادہ کیتا۔ دفترِ خارجہ آپݨے بیان اچ آکھیا جو پاکستان ڳالھ مہاڑ ، سفارت کاری تے خطے اچ کشیدگی مکاوݨ کیتے آپݨے پکے عزم تے قائم رہندیں سارے فریقاں تے زور ݙیندے جو او بین الاقوامی قانون دا احترام کرن تے بین الاقوامی بحری جہاز رانی دے تحفظ تے سلامتی کوں یقینی بݨاون۔