وفاقی وزیر قومی غذائی تحفظ و تحقیق نال سی ای او فامسن گروپ دی قیادت اچ وفد دی ملاقات

اسلام آباد۔22جولائی(اے پی پی) وفاقی وزیر قومی غذائی تحفظ و تحقیق رانا تنویرحسین نال فامسن (FAMSUN) گروپ دے چیف ایگزیکٹو افسر جیک چن دی قیادت اچ وفد ملاقات کیتی، جیں اچ پاکستان اچ زرعی شعبے دی جدید خطوط تے ترقی، اناج ذخیرہ کرݨ دے جدید نظام، ٹیکنالوجی دی منتقلی تے سرمایہ کاری دے ودھارے متعلق مختلف امور تے ڳالھ مہاڑ کیتی ڳئی ۔ وزارت دے ترجمان موجب وفاقی وزیر وفد دا خیرمقدم کریندیں آکھیا جو پاکستان چین دے نال آپݨی پراݨی تے مثالی دوستی کوں اہمیت ݙیندے تے پاکستان دی معیشت تے زرعی شعبے تے چینی کمپنیاں دے اعتماد کوں خوش آئند سمجھدے۔ انھاں آکھیا جو پاک چین تعاون ہݨ ہک نویں مرحلے اچ داخل تھی چکے جتھاں بنیادی ڈھانچے دی تعمیر دے نال نال زرعی ترقی، صنعت کاری، ٹیکنالوجی دی منتقلی، جدت تے ویلیو ایڈیشن تے خصوصی توجہ ݙتی ویندی پئی اے۔وفاقی وزیر پاکستان دے زرعی و غذائی شعبے اچ فامسن گروپ دی گزریل ݙو ݙہاکیں تے محیط خدمات دی تعریف کریندے آکھیے جو کمپنی فیڈ ملنگ، اناج دی ہینڈلنگ تے فوڈ پروسیسنگ دے شعبیں دی ترقی اچ قابلِ قدر کردار ادا کیتے۔ انھاں کمپنی کوں پاکستان اچ آپݨی سرمایہ کاری تے تعاون کوں مزید وسعت ݙیوݨ دی دعوت ݙتی۔ وفاقی وزیرملک اچ جدید سائنسی بنیاداں تے اناج ذخیرہ کرݨ دی سہولتاں دی لوڑھ تے زور ݙیندے فامسن گروپ کوں پاکستان اچ جدید ہائی ٹیک سائلوز (Grain Silos) دے قیام اچ تعاون دی دعوت ݙتی۔ انھاں آکھیا جو جدید ذخیرہ گاہواں دے قیام توں فصلاں دے بعد تھیوݨ آلا ضیان گھٹ تھیسی ، غذائی تحفظ تکڑا تھیسی، زرعی سپلائی چین مزید موثر بݨسی تے اناج کوں محفوظ انداز اچ ذخیرہ کرݨ ممکن ہوسی۔انھاں آکھیا جو پاکستان ایجھا دیرتئیں اشتراک چاہندے جو صرف بنیادی ڈھانچے دی تعمیر تئیں محدود نہ ہووے بلکہ ٹیکنالوجی دی منتقلی، مقامی سطح تے زرعی مشینری دی تیاری، استعداد کار اچ ودھارا ، تحقیق تے روزگار دے نویں موقع پیدا کرݨ تے وی مشتمل ہووے۔ انھاں فامسن گروپ کوں پاکستان اچ جدید زرعی مشینری تے آلات دی مقامی مینوفیکچرنگ تے اسمبلی دے امکانات دا جائزہ گھنݨ دی وی دعوت ݙتی۔ ملاقات اچ پاکستان ایگریکلچرل ریسرچ کونسل (PARC) اچ جدید سائلو دے ہک پائلٹ ڈیمانسٹریشن منصوبے دے قیام دی تجویز وی زیرِ غور آئی۔ وفاقی وزیر آکھیا جو اے منصوبہ جدید ٹیکنالوجی دے عملی مظاہرے، تحقیقی سرگرمیاں تے ماہرین و محققین دی تربیت کیتے ہک مثالی مرکز ثابت تھی سڳدے۔ وفاقی وزیر فامسن گروپ توں درخواست کیتی جو او آپݨی تکنیکی ٹیم پاکستان ایگریکلچرل ریسرچ کونسل (PARC) دا دورہ کراوے، اتھاں موجود تحقیقی سہولتاں دا جائزہ گھنے تے مستقبل اچ تحقیق تے تکنیکی تعاون کوں مزید موثر بݨاوݨ کیتے سفارشات پیش کرے۔وفاقی وزیر آکھیا جو اے ملاقات پاکستان تے چین وچال زرعی تعاون کوں مزید تکڑا بݨاوݨ اچ اہم سنگِ میل ثابت تھیسی تے ݙوہیں ملکاں وچال شراکت داری کوں نویں جہت ݙیسی۔ فامسن گروپ دے وفد پاکستان اچ زرعی شعبے دی ترقی تے سرمایہ کاری دے ودھارے کیتے حکومت دے عزم دی تعریف کیتی تے جدید زرعی ٹیکنالوجی، سمارٹ ایگریکلچر تے اناج ذخیرہ کرݨ دے شعبیں اچ آپݨے عالمی تجربیں دا ݙسایا ۔ وفد پاکستان دے نال سانجھے مفاد دے شعبیں اچ تعاون کوں مزید ودھارا ݙیوݨ اچ دلچسپی ڳھدی۔