وزیراعظم دا روبوٹکس، اٹانومس سسٹمز دی ترقی کیتے سپارک اینڈ ایلیویٹ پروگرام دی شوعات تے 20 ملین ڈالر دا پاکستان وینچر فنڈ ٻݨاوݨ دا اعلان

اسلام آباد۔22جولائی(اے پی پی)وزیراعظم محمد شہباز شریف ملکی خودمختاری دے تحفظ اتے دفاع کوں مضبوط ٻݨاوݨ کیتے جدید ٹیکنالوجی دے استعمال دا عزم دوہریندے روبوٹکس اتے اٹانومس سسٹمز دی ترقی کیتے سپارک اینڈ ایلیویٹ پروگرام دی شروعات تے 20 ملین ڈالر دا پاکستان وینچر فنڈ ٻݨاوݨ دا اعلان کیتے اتے آکھیے جو پاکستان دفاع اتے سکیورٹی دے شعبے اچ ملکی صلاحیتاں کوں ودھاوݨ اچ نمایاں کامیابیاں حاصل کیتن، معرکہ حق اچ افواج جدید آٹونومس سسٹمز اتے سائبر سکیورٹی دے ذریعے سرحداں دا دفاع کیتے، ٹیکنالوجی دا انقلاب کڄھ جدید معیشتاں، وݙیای کارپوریشنز اتے وݙے شہراں تئیں محدود نئیں رہݨا چاہیدا ٻھل ہر کہیں کیتے مساوی ترقی ہووݨی چاہیدی اے، جدت کوں قابلِ عمل حل اچ بدل تے عوام دا ڄیوݨ سوکھا ٻݨیسوں، انتھک محنت نال آندیاں نسلاں کیتے روشن اتے خوشحال پاکستان ٻݨیسوں۔ انہاں اے ڳالھ انڈس راس روبوٹکس اینڈ اٹانومس سسٹمز ایکسپو دی تقریب نال خطاب کریندے آکھی۔ تقریب اچ چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر، وفاقی وزراء اتے ٻیاں وی شرکت کیتی۔ وزیراعظم آکھیا جو انڈس راس روبوٹکس اینڈ اٹانومس سسٹمز ایکسپو اچ شرکت میݙے کیتے باعثِ مسرت اے، ایں توں ٹیکنالوجی دے شعبے اچ صفِ اول دا کردار ادا کرݨ دے حوالے نال پاکستان دے عزم دی عکاسی ہوندی اے، اے نمائش اتے اینڄھے اقدامات پاکستان کوں 21 ویں صدی دی جدید ٹیکنالوجی اچ صفِ اول دا ملک ٻݨیسن۔ وزیراعظم آکھیا جو ایں سال دے اوائل اچ پاکستان انڈس اے آئی سمٹ دی وی میزبانی کیتی جیںدے نال مصنوعی ذہانت دے دور اچ پاکستان دے سفر کوں اڳو تے ودھاوݨ کیتے حکومتی نمائنداں، ٹیکنالوجی لیڈرز اتے محققین، کاروباری افراد کوں مل ٻہݨ دا موقع ملیے، اڄ انڈس راس ایکسپو توں ایں وژن کوں عملی شکل ݙیوݨ دا موقع ملیے جو کیویں جدت کوں فعال سلوشنز اچ تبدیل کروں، روبوٹکس اتے ڈرونز دی جدت توں معیشت مضبوط، سلامتی بہتر اتے عوام دی زندگی سوکھی ہوسی، ایں جہت اکیڈمیا، انڈسٹری، سٹارٹ اپس اتے پالیسی سازاں کوں ہک پلیٹ فارم تے کٹھا کیتے۔ وزیراعظم آکھیا جو میݙے بچپن اچ ٹیکنالوجی دی جدت بلیک اینڈ وائٹ ٹیلی ویژن دی آمد ہئی اتے خاندان دے سارے لوک ’’اچے برج لاہور دے‘‘ جھئیں پاکستان ٹیلی ویژن دی کلاسک نشریات کوں مل تے ݙیھدے ہن ٻھل اڄ دی دنیا ٹیکنالوجی دے میدان اچ ٻہوں اڳو تے ودھ ڳئی اے اتے اساں تاریخ دے ہک غیر معمولی دور اچ ہیں، زرعی پیداوار کیتے پاݨی اتے ٻئے بنیادی عوامل دی ضرورت، موسمیاتی تبدیلی اتے ٻئے چیلنجاں نال نمٹݨ کیتے جدید ٹیکنالوجی دا استعمال ݙاݙھا اہم اے، اڄ ٹیکنالوجی دی جدید شکل اساݙے سامݨے موجود اے، مشیناں محسوس کر تے تیزی نال فیصلے اتے انھاں تے عملدرآمد کریندن جیڑھا کݙائیں خواب لڳدا ہئی اڄ حقیقت ٻݨ تے اساݙے سامݨے موجود اے۔ پاکستان دفاع اتے سکیورٹی دے شعبے اچ ملکی صلاحیتاں کوں ودھاوݨ اچ نمایاں کامیابیاں ڳھدن، سلامتی دے شعبے اچ ٹیکنالوجی دا استعمال ماݨ دی ڳالھ اے، فیلڈ مارشل سیّد عاصم منیر دی قیادت اچ مسلح افواج جدید ٹیکنالوجی اپنائی، سیمولیٹرز سو فیصد پاکستان اچ تیار تھیندے پئن، ڈرونز دی 60 فیصد توں زائد مقامی تیاری حاصل کر گھدی ڳئی اے، معرکہ حق اچ مسلح افواج جدید آٹونومس سسٹمز تے سائبر سکیورٹی دے ذریعے سرحداں دا دفاع کیتے، معرکہ حق اچ فیلڈ مارشل دی سربراہی اچ ایئر چیف مارشل ظہیر احمد بابر اتے نیول چیف ایڈمرل نوید اشرف دی معاونت شاندار رہی اتے اساݙی مسلح افواج ملکی خودمختاری دے تحفظ کیتے آہنی عزم نال ملکی صلاحیتاں، ٹیکنالوجی دی ترقی اتے آپریشنل مہارت ݙکھائی، دفاعی شعبے اچ شاندار کامیابیاں مادرِ وطن دے قومی دفاع دا لازمی جزو ہن، ایںدے نال اساݙا سکیورٹی دا نظام مضبوط تھیسی، دفاع مزید ناقابلِ تسخیر تھی ویسی اتے ابھردے اتے مستقبل دے خطرات نال نمٹݨ کیتے صلاحیت ودھسی۔ انھاں آکھیا جو پاکستان آپݨی خودمختاری دے تحفظ اتے دفاع کوں مضبوط بݨاوݨ کیتے جدید ٹیکنالوجی استعمال کریسی، دفاع اچ آٹونومس صلاحیتاں دی ترقی اچ نمایاں پیش رفت تھئی اے۔ انھاں آکھیا جو ٹیکنالوجی دا انقلاب کڄھ جدید معیشتاں، وݙیاں کارپوریشنز اتے وݙے شہراں تئیں محدود نئیں رہݨا چاہیدا ٻھل ہر کہیں کیتے مساوی ترقی ہووݨی چاہیدی اے، کساناں دی حالت بہتر ہووے، چھوٹے کاروبار ودھن، کاروبار کرݨ آلیاں تریمتیں کوں سہولیات ملن اتے کمزور طبقات کوں فائدہ پڄے۔ محفوظ اتے شفاف آٹونومس سسٹمز کیتے واضح قانون سازی اتے اخلاقی فریم ورک ٻݨاوݨا چاہیدے۔ وزیراعظم پاکستان اچ روبوٹکس اتے اٹانومس سسٹمز دی ترقی کیتے سپارک اینڈ ایلیویٹ پروگرام دے آغاز دا اعلان کیتے جیندے نال پاکستان اچ عالمی معیار دی ٹیکنالوجیز کیتے تحقیق کوں ودھارا ݙتا ویسی ایںدے نال کاروبار دی ترقی اتے ملازمتاں دے مواقع ودھسن۔

وزیراعظم 20 ملین ڈالر دا پاکستان وینچر فنڈ قائم کرݨ دا وی اعلان کیتے۔ وزیراعظم آکھیا جو تحقیق کوں عالمی معیار دی ٹیکنالوجی اتے اعلیٰ روزگار اچ بدلیسوں، ٻئے ممالک دی ٹیکنالوجی دے محتاج نئیں ٻھل آپݨی تقدیر آپ لکھسوں، انتھک محنت نال آئندہ نسلاں کیتے روشن اتے خوشحال پاکستان ٻݨیسوں۔ تقریب نال وفاقی وزیر انفارمیشن ٹیکنالوجی شزا فاطمہ خواجہ وی خطاب کیتے۔ ایں توں پہلے وزیراعظم کوں جامع بریفنگ ݙتی ڳئی اتے راس انڈس ایکسپو بارے مستند دستاویزی فلم وی ݙکھائی ڳئی۔