ساوݨ مینھ اچ شدت پاروں لوکاں دے جان و مال دے تحفظ، ریسکیو تے امدادی اقدامات تکھے کیتے ونڄن ونڄے، صدر مملکت دی وفاقی، صوبائی تے مقامی حکام کوں ہدایت

اسلام آباد۔23جولائی (اے پی پی) صدر مملکت آصف علی زرداری ملک اچ ساوݨ مینھ اچ شدت پاروں وفاقی، صوبائی تے مقامی حکام کوں ہدایت کیتی اے جو لوکاں دے جان و مال دے تحفظ کیتے مربوط تیاریاں، ریسکیو تے امدادی اقدامات کوں مزید موثر تے تکھا کیتا ونڄے کیوں جو ودھدے مینھ پاروں حساس علاقیں اچ اچانک آوݨ آلی چھل ، بادل پھٹݨ، گلیشیائی جھیلاں دے پھٹݨ نال آوݨ آلی چھل (گلوف)، لینڈ سلائیڈنگ، دریاواں اچ طغیانی تے شہری چھل دا خطرہ ودھدا پئے۔ایوانِ صدر دے پریس ونگ توں جاری بیان موجب صدرمملکت اڄوکے مینھ تے انہاں دے نتیجے اچ قیمتی انسانی جاں دے ضیان تے گھراں، بنیادی ڈھانچے تے املاک کوں پُڄݨ آلے ضیان تے ݙکھ تے افسوس کیتے ۔ انھاں جاں بحق لوکاں دے گھرآلیں نال تعزیت کیتی تے متاثرہ خانداناں نال یکجہتی کیتی اے۔صدرمملکت نیشنل ڈیزاسٹر مینجمنٹ اتھارٹی (این ڈی ایم اے)، صوبائی ڈیزاسٹر مینجمنٹ اتھارٹیز (پی ڈی ایم ایز)، صوبائی حکومتاں تے مقامی انتظامیہ کوں ہدایت کیتی جو وہ سانجھے رابطے کوں ہر ممکن حد تئیں موثر بݨاون تے وقتی ابتدائی چاوݨی یقینی بݨاون۔ انھاں مینھ، دریاواں دے وہݨ تے اتلے آبی ذخیرے اچ پاݨی دی سطح دی مسلسل نگرانی دی ضرورت تے زور ݙتا تے خصوصاً گلگت بلتستان تے آزاد جموں و کشمیر تے تلویں علاقیں کوں ممکنہ چھل نال نبڑݨ کیتے پیشگی تیاریاں مکمل رکھݨ دی ہدایت کیتی۔صدر مملکت متعلقہ اداریں کوں ہدایت کیتی جو ریسکیو تے امدادی وسائل پہلے توں حساس جہیں تے دستیاب رکھئے ونڄن، کمزور تے خطرے نال ݙوچار آبادیاں تے اہم بنیادی ڈھانچے دے تحفظ کوں یقینی بݨاوݨ دے نال نال اچانک چھل، گلیشیائی جھیلاں پھٹݨ نال آوݨ آلی چھل (گلوف) تے لینڈ سلائیڈنگ دے خطرے آلے علاقیں اچ سیاحواں تے ٻئے لوکاں دی حفاظت کیتے ضروری اقدامات کیتے ونڄن۔صدر آصف علی زرداری ایں ڳالھ دی وی ہدایت کیتی جو سارے متعلقہ ادارے ہرویلھے چوکس رہن تے جتھاں وی کہیں انسانی جاناں یا املاک کوں خطرہ لاحق ہووے اتھاں وقتی موثر کارروائی یقینی بݨاون۔ انھاں عوام تے زور ݙتا جو وہ سرکاری ہدایات تے عمل کرن تے زور دے مینھ ،اچانک چھل، لینڈ سلائیڈنگ یا موسم متعلق ٻئے خطرات دی وارننگ آلے علاقیں دا غیر ضروری سفر کرݨ توں گریز کرن۔ صدر مملکت امدادی کارروائیاں اچ مصروف ریسکیو اہلکاراں تے ہنگامی خدمات انجام ݙیوݨ آلے عملے دیاں کوششاں دی تعریف کریندے ملک دے عوام دی سلامتی کیتے دعا کیتی۔