آبادی اچ توازن ہی پائیدار قومی ترقی دی ضمانت اے، ودھدی آبادی تے قابو پاوݨ کیتے اقدامات تے بہبودِ آبادی کوں قومی فریضہ سمجھیا ونڄݨا چاہیدے، وزیراعظم شہباز شریف

اسلام آباد۔23جولائی (اے پی پی) وزیراعظم محمد شہباز شریف تکھے ودھدی آبادی کوں ملک کیتے ساریں توں وݙا چیلنج قرار ݙیندیں آکھیے جو آبادی اچ توازن ہی پائیدار قومی ترقی دی ضمانت اے، ودھدی آبادی تے قابو پاوݨ کیتے اقدامات تے بہبودِ آبادی کوں قومی فریضہ سمجھیا ونڄݨا چاہیدے۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف دی زیرِ صدارت ملک اچ بہبودِ آبادی دے حوالے نال اہم جائزہ اجلاس تھیا، اجلاس اچ وفاقی وزیر منصوبہ بندی و ترقی احسن اقبال، وفاقی وزیر اقتصادی امور احد خان چیمہ، وفاقی وزیر قومی صحت سید مصطفیٰ کمال، وفاقی وزیر اطلاعات و نشریات عطاء اللہ تارڑ تے متعلقہ اعلیٰ سرکاری افسراں وی شرکت کیتی۔وزیراعظم آکھیا جو آبادی دی منصوبہ بندی کوں قومی ترقی، معاشی استحکام تے انسانی وسائل دی بہتری نال ہم آہنگ کرݨ دی لوڑھ اے، بہبودِ آبادی دے اقدامات دے حوالے نال صوبیں دے نال رابطے تے ہم آہنگی کوں مزید بہتر بݨایا ونڄے، ودھدی آبادی تے قابو پاوݨ کیتے موثر عوامی آگاہی مہم دا کلیدی کردار اے۔ وزیراعظم نیشنل پاپولیشن کونسل دا اجلاس وقتی سݙاوݨ دی ہدایت کیتی۔اجلاس کوں ملک دی ودھدی آبادی، بہبودِ آبادی تے نیشنل پاپولیشن کونسل دے اجلاس دی تیاریاں دے حوالے نال بریفنگ ݙتی ڳئی۔ اجلاس کوں ݙسایا ڳیا جو نیشنل پاپولیشن کونسل دا اجلاس وقتی سݙوایا ویسی جیں اچ سارے صوبیں، گلگت بلتستان دے وزرائے اعلیٰ، آزاد کشمیر دے وزیراعظم تے ٻئے سارے متعلقہ اداریں دے نمائندے تے سٹیک ہولڈرز شرکت کریسن تاں جو بہبودِ آبادی دے حوالے نال جامع حکمتِ عملی ترتیب ݙتی ونڄ سڳے، نیشنل پاپولیشن کونسل سیکریٹریٹ دے آپریٹنگ طریقہء کار کوں تیارکرڳھدا ڳئے، نیشنل سٹیبلائزیشن پلان 2026-35 تیار کیتا ویندا پئے جیں اچ آبادی ودھݨ دی رفتار کوں گھٹ کرݨ دے حوالے نال قومی فریم ورک پیش کیتا ویسی، ایں پلان دے تحت آبادی اچ ودھارے دی شرح کوں موجودہ 2.55 فیصد توں گھٹ کرتے 2035 تئیں 1.25 فیصد تئیں گھن ونڄݨ دا ہدف رکھیا ویندا پئے، پاپولیشن سٹیبلائیزشن دے نویں فریم ورک دے تحت صحت، تعلیم، نوجوان آبادی، لیبر فورس اچ تریمتاں دی تعداد اچ ودھارے، پیشہ ورانہ تربیت تے سماجی تحفظ تے توجہ مرکوز کیتی ویسی، وفاقی حکومت دے سماجی تحفظ دے کئی اقدامات کوں بہبودِ آبادی نال مشروط کرݨ دے حوالے نال کم دا آغاز کر ݙتا ڳئے۔