وفاقی وزیربحری اموردی بیجنگ اچ چائنا ریلوے الیکٹریفکیشن انجینئرنگ گروپ کمپنی دے نائب صدر نال ملاقات

اسلام آباد۔23جولائی (اے پی پی) وفاقی وزیر بحری امور محمد جنید انوار چوہدری اپݨے دورہ چین دے دوران بیجنگ اچ چائنا ریلوے الیکٹریفکیشن انجینئرنگ گروپ کمپنی دے نائب صدر لی لی نال ملاقات کیتی، جیں اچ پاکستان تے چین وچال بحری رابطیں تے ٹرانسپورٹ انفراسٹرکچر اچ تعاون دے ودھارے تے ڳالھ مہاڑ کیتی۔وزارت توں جاری پریس ریلیز موجب ملاقات اچ ریلوے الیکٹریفکیشن، بندرگاہواں کوں ریلوے نیٹ ورک نال منسلک کرݨ، لاجسٹکس انفراسٹرکچر، اسمارٹ ٹرانسپورٹ سسٹمز تے چین پاکستان اقتصادی راہداری (سی پیک) دے تحت علاقائی تجارت دے ودھارے متعلق مختلف منصوبیں تے تعاون دے امکانات دا جائزہ ڳھدا ڳیا۔وفاقی وزیر محمد جنید انوار چوہدری آکھیا جو چین دی صفِ اول دی انجینئرنگ کمپنیاں دے نال اشتراک نال پاکستان دی بندرگاہواں کوں اندرلے ملک اقتصادی راہداریاں نال جوڑݨ کیتے جدید، موثر تے پائیدار ٹرانسپورٹ نیٹ ورک دی ترقی ممکن تھیسی، جیں توں تجارتی مسابقت اچ ودھارا تے پائیدار اقتصادی ترقی کوں ودھارا ملسی۔ انھاں آکھیا جو حکومتِ پاکستان بندرگاہواں دی جدید خطوط تے ترقی، پائیدار انفراسٹرکچر دے ودھارے تے بین الاقوامی سرمایہ کاری دے حصول کیتے پرعزم اے۔ایں موقع تے ای ای بی دی قیادت پاکستان اچ سرمایہ کاری تے تکنیکی تعاون دے موقع اچ گھاٹی دلچسپی گھندیں جدید انجینئرنگ حل تے بین الاقوامی شراکت داری دے ذریعے ملک دے انفراسٹرکچر دی ترقی اچ کردار ادا کرݨ دے عزم دا اعادہ کیتا۔ ملاقات اچ ݙوہیں فریقاں ریلوے الیکٹریفکیشن، پورٹ لاجسٹکس تے اسمارٹ ٹرانسپورٹ سسٹمز دے ترجیحی منصوبیں تے ادارہ جاتی تعاون مزید تکڑا بݨاوݨ تے اتفاق کیتا۔ وفاقی وزیر چینی عہدیدار لی لی کوں پاکستان دے دورے دی دعوت وی ݙتی تاں جو سرمایہ کاری دے موقع تے ممکنہ انفراسٹرکچر منصوبیں دا جائزہ ڳھدا ونڄ سڳے۔ لی لی دعوت قبول کریندیں پاکستان اچ کمپنی دی سرگرمیاں کوں مزید وسعت ݙیوݨ اچ دلچسپی دا اظہار کیتا۔