سینیٹ دی قائمہ کمیٹی اطلاعات و نشریات دیاں صحافیاں کوں پلاٹاں دی الاٹمنٹ، علاقائی اخبارات دے اشتہاری کوٹے اتے ریڈیو پاکستان دے پنشنرز دے مسائل تے اہم سفارشات

اسلام آباد۔23جولائی (اے پی پی)سینیٹ دی قائمہ کمیٹی برائے اطلاعات و نشریات فلم ”بلھیا“ بارے اہم سفارشات منظور کریندے پروڈیوسرز کوں فلم دا ناں وٹاوݨ اتے قابلِ اعتراض ڈائیلاگ حذف کرݨ دی سفارش کیتی اے، کمیٹی پیکا بارے مقدمات، صحافیاں کوں پلاٹاں دی الاٹمنٹ، علاقائی اخبارات دے اشتہاری کوٹے اتے ریڈیو پاکستان دے پنشنرز دے مسائل تے وی متعلقہ اداریاں کوں ضروری سفارشات کیتن۔ سینیٹ دی قائمہ کمیٹی برائے اطلاعات و نشریات دا اجلاس پاکستان ٹیلی ویژن (پی ٹی وی) ہیڈکوارٹرز اسلام آباد اچ قائم مقام چیئرمین کمیٹی سینیٹر سرمد علی دی اڳواݨی اچ تھئے۔ اجلاس اچ فلم “بلھیا” اچ حضرت بابا بلھے شاہؒ دے ناں اتے تعلیمات دی مبینہ غلط انداز اچ پیشکش، پریوینشن آف الیکٹرانک کرائمز ایکٹ (پیکا) دے تحت نیشنل سائبر کرائم انویسٹی گیشن ایجنسی دے جاری کیتے ڳئے نوٹسز، پیکا بارے مقدمات دی این سی سی آئی اے کوں منتقلی دا جائزہ ڳھدے۔ قائمہ کمیٹی صوبائی اداریاں توں پیکا دے مقدمات این سی سی آئی اے کوں منتقل کرݨ دے معالے تے ہدایت کیتی جو سارے متعلقہ صوبائی حکام کوں خطوط ٻھیڄیے ونڄن تاں جو زیرِ التواء مقدمات دی منتقلی تیکھے مکمل تھیوے اتے سینیٹ دی ذیلی قائمہ کمیٹی برائے اطلاعات و نشریات دی سفارشات تے رپورٹ وی عملدرآمد کیتے ٻھیڄی ونڄے۔ کمیٹی اخباری کالم نگار کوں مبینہ متنازع ریمارکس تے جاری کیتے ڳئے نوٹس دا جائزہ ڳھندے قائم مقام چیئرمین این سی سی آئی اے کوں ہدایت کیتی جو شکایت اتے شکایت کنندہ ݙوہیں دا معاملہ پریس کونسل آف پاکستان کوں بھیڄیا ونڄے۔ اجلاس اچ فیڈرل گورنمنٹ ایمپلائیز ہائوسنگ اتھارٹی ولوں صحافیاں اتے میڈیا ورکرز کیتے فلیٹس اتے پلاٹس دی الاٹمنٹ دے معاملے تے وی بریفنگ ݙتی ڳئی۔ حکام کمیٹی کوں ݙسایا جو میڈیا ورکرز دے کوٹے دے تحت الاٹمنٹ دا عمل مکمل تھی چکیے ٻھل صحافیاں دے کوٹے بارے معاملات حالی وی حل طلب ہین، جیندے تے کمیٹی عدم اطمینان کریندے اپݨیاں سفارشات تے عملدرآمد دی نگرانی اتے مسئلے دے حل کیتے ہک ذیلی کمیٹی ٻݨاوݨ دا فیصلہ کیتے۔ سینیٹر سرمد علی وزارتِ اطلاعات و نشریات کوں ہدایت کیتی جو صحافیاں دے نمائنداں تے مشتمل کمیٹی دا ہک ہفتے اچ نوٹیفکیشن جاری کیتا ونڄے تاں جو ایں معاملے دا جائزہ ڳھن تے ہک مہینے دے اندرو موجودہ پالیسی تے نظرِ ثانی کیتی ونڄے۔ کمیٹی مستقبل دی ہائوسنگ سکیماں اچ صحافیاں اتے میڈیا ورکرز کیتے مختص کوٹا ودھاوݨ دی وی سفارش کیتی ڄݙاں جو صحافیاں کیتے خصوصی ہائوسنگ لون سکیم متعارف کراوݨ یا وفاقی حکومت دی موجودہ ہائوسنگ فنانس سہولتاں اچ انھاں کوں ترجیح ݙیوݨ دی تجویز وی ݙتی ڳئی۔ پریس انفارمیشن ڈیپارٹمنٹ (پی آئی ڈی) ولوں کمیٹی کوں علاقائی اخبارات کیتے مختص اشتہاری کوٹے تے وی بریفنگ ݙتی ڳئی۔ قائم مقام چیئرمین پی آئی ڈی کوں ہدایت کیتی جو 25 فیصد اشتہاری کوٹے تے سختی نال عملدرآمد کیتا ونڄٖے اتے علاقائی زباناں دے اخبارات کوں وی ایںدے اچ رلایا ونڄے تاں جو عوام تئیں معلومات موثر انداز اچ پچا تے انھاں دے اہم کردار کوں منیا ونڄ سڳے۔ اجلاس اچ ریڈیو پاکستان دے پنشنرز کوں درپیش مسائل تے وی تفصیلی تھیا۔ کمیٹی کوں ݙسایا ڳیا جو پنشنرز دے 353 کمیوٹیشن کیسز تاحال زیرِ التواء ہن ڄݙاں جو ریڈیو پاکستان ہݨ وی وفاقی حکومت دی گرانٹ اِن ایڈ نال چلایا ویندا پئے۔ حکام ݙسایا جو وزیراعظم پہلے ہی ریڈیو پاکستان، پاکستان ٹیلی ویژن اتے ایسوسی ایٹڈ پریس آف پاکستان (اے پی پی) بارے زیرِ التواء مسائل دے حل کیتے ہک کمیٹی ٻݨائی اے۔ قائم مقام چیئرمین سینیٹر سرمد علی ہدایت کیتی جو ریڈیو پاکستان دے پنشنرز دی شکایات وی وزیراعظم دی ٻݨائی کمیٹی اچ پیش کیتیاں ونڄن اتے معاملے کوں تیکھے حل کیتا ونڄے۔ اجلاس اچ سینیٹر عبدالشکور، سینیٹر سید وقار مہدی، سینیٹر پرویز رشید اتے سینیٹر جان محمد وی شرکت کیتی۔