پاکستان افغانستان اچ پاکستانی فوجی کارروائیاں بارے ایمنسٹی انٹرنیشنل دی رپورٹ مسترد کر ݙتی

اسلام آباد۔23جولائی(اے پی پی)پاکستان افغانستان اچ پاکستانی فوجی کارروائیاں دے الزامات بارے ایمنسٹی انٹرنیشنل دی حالیہ رپورٹ کوں بلا ثبوت قرار ݙیندے مسترد کر ݙتے اتے آکھیے جو اے دعوے کہیں معتبر ثبوت دے بغیر کیتے ڳئن اتے افغان سرزمین توں اٹھݨ آلی دہشت گردی دی بنیادی وجہ کوں ہک پاسے سٹیا ڳئے۔ ہفتہ وار پریس بریفنگ اچ دفترِ خارجہ دے ترجمان طاہر حسین اندرابی آکھیے جو پاکستان رپورٹ اچ لائے ڳئے الزامات کوں مکمل طور تے مسترد کریندے، پاکستان ولوں کیتی ونڄݨ آلی ہر فوجی کارروائی بین الاقوامی قانون دے مطابق اپݨے حقِ دفاع دے استعمال نال کیتی ڳئی۔ انھاں آکھیا جو تحریک طالبان پاکستان (ٹی ٹی پی)، بلوچستان لبریشن آرمی (بی ایل اے) اتے ٻئے منسلک دہشت گرد گروہ طالبان انتظامیہ دے تحت افغانستان اچ محفوظ ٹھکانے رکھیندن جتھو او پاکستان دے خلاف سرحد پار دہشت گرد حملیاں دی منصوبہ بندی اتے کارروائیاں کریندن۔ ترجمان آکھیا جو افغان سرزمین توں منصوبہ بندی اتے معاونت حاصل کرݨ آلے دہشت گرد حملیاں اچ ہزاراں پاکستانی اپݨیاں جاناں ونڄا چکین۔ انھاں آکھیا جو پاکستان دیاں کارروائیاں صرف دہشت گرداں دے ٹھکانیاں اتے انھاں دے لاجسٹک مراکز کوں نشانہ بݨاوݨ تئیں محدود رہین جِنھاں اچ احتیاط اتے متناسب طاقت دے استعمال دے اصولاں دا پورا خیال رکھیا ڳئے۔ انھاں عالمی برادری تے زور ݙتا جو او خطے اچ عدم استحکام دی اصل وجہ دا نوٹس ڳھنے۔ انھاں ایمنسٹی انٹرنیشنل توں مطالبہ کیا جو او افغان طالبان ولوں دہشت گرد گروہاں دی مسلسل سرپرستی دا وی جائزہ ڳھنے اتے اقوامِ متحدہ دی سلامتی کونسل دیاں متعلقہ قرارداداں اتے دوحہ معاہدے دے تحت طالبان حکومت دی ذمہ داریاں دا احتساب کرے۔ ترجمان یمن دی حوثی ملیشیا ولوں سعودی عرب اتے بحیرہ احمر اچ تجارتی بحری جہازاں دے خلاف حالیہ دھمکیاں وی شدید مذمت کیتی۔ انھاں آکھیا جو پاکستان پاکستانی پرچم بردار بحری جہازاں یا ملک دے سمندری مفادات دے خلاف کہیں وی جارحانہ اقدام کوں قومی سلامتی کیتے سنگین خطرہ منیدے اتے بین الاقوامی قانون دے مطابق اپݨے دفاع اچ سارے ضروری اقدامات دا حق محفوظ رکھیندے۔ ہک سوال دے ولدے اچ طاہر حسین اندرابی آکھیا جو پاکستانی مفادات تے کہیں وی حملے کوں پاکستان تے حملہ ڳݨیا ویسی جیںدا مناسب جواب ݙتا ویسی۔ ترجمان سعودی عرب دی سلامتی، خودمختاری اتے علاقائی سالمیت کیتے پاکستان دی غیر متزلزل حمایت دا اعادہ کریندے مشرقِ وسطیٰ اچ جاری تنازع کوں ٻیا ودھاوݨ دی کوششاں تے چنتا کیتے۔ انھاں آکھیا جو پاکستان خطے اچ کشیدگی گھٹ کرݨ کیتے مسلسل مذاکرات اتے سفارت کاری دی حمایت کریندا پئے۔ ایں سانڳے انھاں ایران دے وزیر خارجہ سکندر مومنی دے حالیہ دورہ پاکستان دا حوالہ ݙتا جیںدے اچ انھاں وزیراعظم محمد شہباز شریف، وزیر داخلہ اتے پاکستان دی عسکری قیادت نال ملاقاتاں کیتن۔ ترجمان آکھیا جو پاکستان علاقائی شراکت داراں نال وی فعال سفارتی رابطے جاری رکھیا ہوئے۔ انھاں آکھیا جو نائب وزیراعظم اتے وزیر خارجہ محمد اسحاق ڈار منیلا اچ اجلاساں دے موقع تے کویت، مصر، اومان اتے روس دے وزرائے خارجہ نال ملین اتے کشیدگی اچ کمی، علاقائی استحکام، بحری سلامتی اتے ݙوطرفہ تعاون تے الائے۔ انھاں آکھیا جو نائب وزیراعظم محمد اسحاق ڈار شنگھائی تعاون تنظیم (ایس سی او) دے وزرائے خارجہ کونسل دے اجلاس اچ پاکستانی وفد دی قیادت وی کریسن جتھاں او رکن ممالک دے اپݨے ہم منصباں نال ݙوطرفہ ملاقاتاں کریسن۔ انھاں آکھیا جو محمد اسحاق ڈار منیلا اچ آسیان ریجنل فورم دے 31 ویں وزارتی اجلاس اچ ی پاکستان دی نمائندگی کیتی اتے علاقائی امن، ڳالھ مہاڑ اتے تعاون کیتے پاکستان دا عزم دوہرایا۔ یورپی کمیشن دی جی ایس پی پلس نگرانی بارے تازہ رپورٹ تے ہک سوال دے جواب اچ ترجمان پاکستان دی قانون سازی اچ پیش رفت اتے جی ایس پی پلس فریم ورک دے تحت 27 بین الاقوامی معاہداں تے مسلسل عملدرآمد دے اعتراف دا خیرمقدم کیتا ٻھل انھاں رپورٹ دے مجموعی بیانیے تے مایوسی ݙکھیندے آکھیا جو ایںدے اچ 2014ء اچ جی ایس پی پلس سکیم اچ شمولیت دے بعد پاکستان دیاں کامیابیاں دا متوازن جائزہ پیش نئیں کیتا ڳیا۔ انھاں آکھیا جو جی ایس پی پلس یورپی یونین نال پاکستان دی اقتصادی شراکت داری دا اہم ستون اے جیرھا برآمدات، روزگار، خواتین دی معاشی شمولیت اتے غربت اچ کمی کیتے معاون ثابت تھئے۔ انھاں بین الاقوامی ذمہ داریاں اتے عملدرآمد کیتے پاکستان دا عزم وی دوہرایا۔ ترجمان آکھیا جو پاکستان قانونی ذرائع توں افغان شہریاں دی سہولت کیتے پرعزم اے اتے ہݨ تک 90 ہزار توں ودھ افغان شہریاں کوں تریڄھے ممالک منتقل تھیوݨ اچ مدد ݙے چکیے، پاکستان اچ قیام کیتے افغان شہریاں کولو قانونی دستاویزات ہووݨ ضروری ہن اتے غیر قانونی طور تے مقیم افراد ملکی قوانین دے مطابق بے دخلی دے عمل نال مشروط ہین ٻھل سلامتی دے خدشات دے باوجود پاکستان عام افغان شہریاں دے خلاف کہیں وی قسم دی نفرت یا عمومی منفی تاثر کوں مسترد کریندے۔