پاکستان دی معیشت دا مستقبل اے آئی، روبوٹکس تے آٹومیشن نال جڑیا ہویا اے، شزا فاطمہ خواجہ

اسلام آباد۔24جولائی (اے پی پی) وفاقی وزیرانفارمیشن ٹیکنالوجی و ٹیلی کمیونیکیشن شزا فاطمہ خواجہ آکھیا جو انڈس راس ایکسپو 2026 کامیاب رہی، عالمی معیشت اچ مسابقت برقرار رکھݨ کیتے پاکستان کوں روایتی صنعتاں کوں جدید آٹومیشن، مصنوعی ذہانت (AI)، روبوٹکس تے خودکار نظاماں نال ہم آہنگ کرݨا ہوسی۔اے ڳالھ انہاں راس (روبوٹکس تے خودمختار نظاماں) ایکسپو 2026 دے اختتام تے ڳالھ مہاڑ کریندے آکھی ۔ انھاں آکھیا جو انڈس راس ایکسپو 2026 کامیاب رہی، جیں اچ 20 ہزار توں ودھ لوکاں شرکت کیتی۔ انھاں منتظمین، شرکاء، صنعتی اداریں، جامعات، میڈیا تے سارے معاون اداریں دا شکریہ ادا کیتا۔انھاں آکھیا جو دنیا تکھے صنعتی معیشت توں نالج اکانومی دی طرف منتقل تھیندی پئی اے، جتھاں مصنوعی ذہانت، بلاک چین، روبوٹکس، خودکار نظام تے ٻئیاں جدید ٹیکنالوجیز ترقی دا بنیادی ذریعہ بݨ چکئن۔ انھاں آکھیا جے پاکستان اپݨی معیشت کوں مستقبل دے تقاضیں موجب تکڑا بݨاوݨا اے تاں صرف ٹیکساں اچ کمی یا بجلی سستی کرݨ کافی نہ تھیسی، بلکہ قومی صنعت کوں جدید آٹومیشن تے ڈیجیٹل ٹیکنالوجی اپناوݨی ہوسی۔ انھاں دا آکھݨ ہئی جو دنیا اچ ہݨ ایجھیاں فیکٹریاں بݨدیاں پئن جتھاں روبوٹس تے خودکار نظام انسانی مداخلت دے بغیر پیداوار جاری رکھیندن، لہٰذا پاکستان کوں وی ایں ہی سمت اچ پیش رفت کرݨی ہوسی۔وفاقی وزیر آکھیا جو ایکسپو دا مقصد صرف جدید ٹیکنالوجی دی نمائش نی بلکہ پاکستان دی قومی صلاحیتاں کوں دنیا دے سامنے پیش کرݨ وی ہئی۔ ایں مقصد کیتے اوپن انویٹیشن ݙتی ڳئی، جیں دے جواب اچ 500 توں ودھ درخواستاں ملیاں ، جِنھاں اچوں 54 کمپنیاں تے 10 اسٹارٹ اپس کوں اپݨی مصنوعات تے ٹیکنالوجی پیش کرݨ دا موقع ݙتا ڳیا۔ انھاں آکھیا جو حکومت صنعت، جامعات تے نوجواناں وچال تکڑے رابطے بݨاوݨ تے کم کریندی پئی اے تاں جو تحقیق، اختراع تے صنعتی ضرورتاں کوں ہک ݙوجھے نال جوڑیا ونڄ سڳے۔