وزیراعظم دا بلوچستان دی ترقی تے خوشحالی کیتے بھرپور وسائل ݙیوݨ دے عزم دا اعادہ، ملک اچ دہشت گردی دے پِچھوں بھارت دا ہتھ اے، چیلنج نال رل تے نبڑݨا ہوسی، شہباز شریف دا ’’بلوچستان نیشنل ورکشاپ‘‘ دے شرکاء نال خطاب

اسلام آباد۔24جولائی (اے پی پی) وزیراعظم محمد شہباز شریف وفاقی حکومت دی طرفوں بلوچستان دی ترقی تے خوشحالی کیتے بھرپور وسائل ݙیوݨ دے عزم دا اعادہ کریندیں آکھیا جو سارے صوبے مساوی ترقی کریسن تاں ملک ترقی کریسی، کراچی توں چمن تئیں ݙو رویہ سڑک دا 300 ارب روپے دا منصوبہ اڳلے ڈڈھ ݙو سال اچ مکمل تھی ویسی، پنجاب این ایف سی ایوارڈ دی مد اچ 150 ارب روپے بلوچستان کوں ݙتن، باقی صوبیں وی بلوچستان دی ترقی کیتے اپݨا بھرپور حصہ پاتے، بلوچستان کوں لیپ ٹاپ تے وظائف دی تقسیم اچ 10 فیصد ودھ کوٹہ ݙتا ویندا پئے، کچھی کینال منصوبے کوں تکھے مکمل کیتا ویسی، پاکستان دے مسئلیں دا حل شفاف حکومتی نظام اچ مضمر اے، ملک اچ دہشت گردی دے پچھوں بھارت دا ہتھ اے، دہشت گردی دے چیلنج نال اساں کوں رل تے نبڑݨا ہوسی، افغانستان کوں سمجھاوݨ دی کوشش کیتی اے جو او دہشت گرد تنظیماں دے خلاف کارروائی کرے تے افغان سرزمین پاکستان دے خلاف استعمال نہ تھیوݨ ݙیوے۔اے ڳالھ انہاں اتھاں ’’بلوچستان نیشنل ورکشاپ‘‘ دے شرکاء نال خطاب کریندیں آکھی۔ تقریب اچ وزیرِدفاع خواجہ محمد آصف، وفاقی وزیرِ منصوبہ بندی و ترقی احسن اقبال، وفاقی وزیرِ اطلاعات و نشریات عطاء اللہ تارڑ، وفاقی وزیرِ قانون و انصاف اعظم نذیر تارڑ، وفاقی وزیرِ تجارت جام کمال، وفاقی وزیرِ پٹرولیم علی پرویز ملک، وزیرِ مملکت خزانہ و محصولات بلال اظہر کیانی سودھے ٻئے وی موجود ہن۔وزیراعظم آکھیا جو اسلام آباد صحیح معنیں اچ چارے صوبیں دے لوکاں دا مسکن اے، بلوچستان توں آئے غیور محبِ وطن پتر تے دھیریں کوں خوش آمدید اکھیندوں، بلوچستان جغرافیائی لحاظ نال ملک دا ساریں توں وݙا صوبہ اے، بلوچستان اچ وسݨ آلے اساݙے بہادر بلوچ تے پختون بھیݨ تے بھراوں تخلیقِ پاکستان اچ کلیدی کردار ادا کیتا، 1947ء اچ بلوچستان دی کئی ریاستاں رضاکارانہ طور تے پاکستان اچ شمولیت اختیار کیتی، 1948ء اچ ٻئیاں ریاستاں دے بلوچ پختون قبائلی رہنماواں وی اڳوں ودھ تے قائدِ اعظم محمد علی جناح ؒ دی قیادت کوں تسلیم کیتا تے پاکستان دا حصہ بݨیے۔وزیراعظم آکھیا جو بلوچستان ملک دی ترقی تے خوشحالی اچ بھرپور کردار ادا کیتے، بلوچستان دی قیادت ذاتی مفاد تے انا کوں ہک پاسے رکھیندیں کھلے دل نال وفاق دی حمایت کیتی، بلوچستان آبادی دے لحاظ نال اگرچہ ملک دا ساریں توں چھوٹا صوبہ اے لیکن جغرافیائی لحاظ نال ساریں توں وݙا صوبہ اے، ݙوجھے صوبیں تے خاص طور تے گنجان علاقیں اچ جیڑھے وسائل تعلیم، صحت تے خوشحالی کیتے استعمال کر تے زیادہ آبادی کوں فیدہ پڄایا ونڄ سڳدے، بلوچستان دی صورتحال ایں حوالے نال مختلف اے، فاصلے شہراں، دیہاتاں تے قصبیں وچال زیادہ ہن، پرے دے علاقیں دی ترقی کیتے طویل فاصلیں پاروں وسائل نسبتاً زیادہ چاہیدن، 2010ء اچ این ایف سی ایوارڈ اچ ایں معاملے کوں تسلیم کیتا ڳیا تے باقی ترائے صوبیں بالخصوص پنجاب رل تے رضاکارانہ طور تے بلوچستان دا مالی حق 100 فیصد ودھاوݨ دے مطالبے کوں پورا کیتا تے ایں اچ ودھ چڑھ تے حصہ پاتا، پنجاب 11 ارب روپے سالانہ ݙتے۔

وزیراعظم آکھیا جو اے کوئی احسان نہ ہئی بلکہ بھرپی دی ہک عظیم مثال ہئی، ݙکھ سکھ ونڈاوݨ دے جذبے دا مظاہرہ کیتا ڳیا، پنجاب 2010ء توں ہݨ تئیں 150 ارب روپے ایں سلسلے اچ ݙے چکیے تے اے سلسلہ ہݨ وی جاری اے، سابق وزیراعظم میاں محمد نواز شریف دے دور اچ بلوچستان دی ترقی تے خوشحالی کیتے بے پناہ وسائل تے منصوبے ݙتے ڳئے، بعد اچ آوݨ آلی حکومتاں تے بالخصوص پی ڈی ایم دی حکومت اچ تے ہݨ وی بلوچستان دے جائز مطالبے کوں پورا کرݨ کیتے انھاں دے بجٹ توں ودھ وسائل ݙتے ڳئن۔وزیراعظم آکھیا جو بلوچستان اچ کساناں کوں کئی کئی گھنٹے بجلی دی بندش دا سامݨا ہئی انھاں دے ٻئے وی مسئلے ہن جِنھاں کوں حل کرݨ کیتے تقریباً 27 ہزار ٹیوب ویلاں کوں شمسی توانائی تے منتقل کیتا ڳیا، 75 ارب روپے دے ایں منصوبے اچ 50 ارب روپے وفاق ݙتے، ایویں ہی کراچی توں چمن تئیں این-25 جیں کوں خونی سڑک آکھیا ویندا ہئی تے روزانہ حادثے تھیندے ہن، ایں پراݨے مطالبے کوں پورا کرݨ کیتے گزریل سال تیل دی قیمت اچ کمی دی مد اچ جمع تھیوݨ آلی رقم نال کراچی توں چمن تئیں ݙو رویہ سڑک بݨاوݨ دا فیصلہ کیتا، 300 ارب روپے دا اے منصوبہ اڳلے ڈڈھ ݙو سال اچ مکمل تھیسی تاں ایں خونی سڑک کوں امن دی سڑک قرار ݙتا ویسی۔وزیراعظم آکھیا جو سارے صوبے مساوی ترقی کریسن تاں ملک ترقی کریسی، اگر ہک صوبہ زیادہ ترقی کریندے تے باقی صوبے پچھوں رہ ویندن تاں اے ملکی ترقی نی تھیندی، ترقی دی دوڑ اچ چارے صوبیں دی ھکو سویں کوششاں دی لوڑھ اے ،وفاقی حکومت ایں سلسلے اچ کوئی کسر چا نہ رکھیسی۔وزیراعظم مستونگ دے سیشن جج عبدالحکیم دی شہادت کوں اندوہناک سانحہ قرار ݙیندیں ہوئیں انھاں دے درجات دی بلندی تے اہلخانہ کیتے صبرِ جمیل دی دعا کیتی۔ انھاں آکھیا جو سیشن جج عبدالحکیم تے انھاں دے نال ہک اہلکار جامِ شہادت نوش کیتا، انھاں آکھیا جو ملک دی حفاظت کیتے عوام دے نال نال افواجِ پاکستان تے قانون نافذ کرݨ الے اداریں دے افسر تے جوان قربانیاں ݙیندے پئن، ہݨ تئیں دہشت گردی مکاوݨ دی جنگ اچ 90 ہزار پاکستانی شہید تھی چکئن، پاکستان اچ دہشت گردی دے پچھوں بھارت دا ہتھ اے تے او وسائل ݙیندا پئے ایں اچ ٻئے وی عوامل شامل ہن، 2017-18ء اچ ملک توں دہشت گردی دا مکمل خاتمہ تھی ڳیا ہئی لیکن ایں دے بعد دہشت گردی ول سِر چاتا، ہک انتہائی منظم سازش دے نال دہشت گردی ول آئی، دہشت گردی اساݙے کیتے ہک چیلنج اے، اساں سارے رل تے ایں دا مقابلہ کرݨا اے۔ افغانستان اساݙا ہمسایہ ملک اے ایں دے نال اساݙی 2 ہزار کلومیٹر مشترکہ سرحد اے۔ افغان رجیم کوں اساں سمجھاوݨ دی بہت کوشش کیتی، جو اساں ہمسائے ہیسے تے اساں رل تے رہݨا اے، خطے اچ امن چاہندوں تاں اتھاں موجود دہشت گرد تنظیماں دے خلاف کارروائی کرو تے افغانستان دی سرزمین پاکستان دے خلاف استعمال کرݨ دی اجازت نہ ݙتی ونڄے، افغان عبوری حکومت انھاں تنظیماں دے خلاف کارروائی کرݨ اچ ناکام رہی اے۔وزیراعظم آکھیا جو افواجِ پاکستان تے قانون نافذ کرݨ آلے ادارے ملک دی حفاظت کیتے کوشاں ہن، اڄوکے ݙینہاں اچ اللہ تعالیٰ پاکستان کوں عظیم کامیابیاں عطا کیتیاں ۔ معرکہِ حق اچ بھارت کوں چار ݙینہاں اچ شکستِ فاش تھئی، ایویں ہی سفارتکاری دے ذریعے پاکستان خطے اچ امن دی بحالی کیتے کلیدی کردار ادا کیتے ایں نال دنیا اچ پاکستان کوں عزت ملی اے، خطے اچ قیامِ امن کیتے موثر سفارتکاری تے دنیا پاکستان کوں قدر دی نگاہ نال ݙیہدی اے، اے عزت تے وقار دشمن کوں ہضم نی تھیندا پیا، ویلھا آ ڳئے جو ملک کوں معاشی ترقی دی دوڑ اچ اڳوں گھن تے ونڄوں، موقع توں فیدہ چاتے اساں کوں چارے صوبیں اچ ترقی تے خوشحالی گھن آوݨی ہوسی ایں کیتے اساں کوں ݙینہہ رات رل تے انتھک محنت کرݨی پوسی، جݙاں چارے صوبے تے 24 کروڑ عوام رل تے کوشش کریسن تاں پاکستان دنیا اچ اپݨا مقام حاصل کریسی تے اساݙی عسکری تے سفارتی کامیابیاں مزید دوبالا تھی ویسن۔ورکشاپ اچ سوال جواب دا سیشن وی تھیا، وزیراعظم شرکاء دے سوالات دے مدلل جواب ݙتے۔ ہک سوال دے جواب اچ وزیراعظم آکھیا جو ایف بی آر اچ بدعنوانی دی وجہ نال ارباں کھرباں روپے دے جیڑھے وسائل خزانے اچ جمع ہووݨے چاہیدے ہن، او نی تھیندے جیں دی وجہ نال غربت تے مسئلے ودھدن تے انھاں مسئلیں کوں حل کرݨ کیتے اساں کوں قرضیں تے قرضے گھنݨے پوندن۔ پاکستان دے مسئلیں دا حل شفاف حکومتی نظام اچ مضمر اے، ایں کیتے اساں ٹیم ورک دے طور تے کم کیتے تے گزریل  سال سیلز ٹیکس تے ٻئے بالواسطہ ٹیکساں دی مد اچ 800 ارب روپے وصول کیتے ڳئن۔ اے وݙی رقم اے جیں دی پہلے مثال نی ملدی، اوہے قوماݨ ترقی کریندن جیڑھیاں فیصلہ کر گھنن جو اساں ہر چیلنج تے مشکل دا مقابلہ کرݨا اے۔ جاپان تے جرمنی دی مثالاں اساݙے سامݨے ہن جو انھاں محنت دے ذریعے دنیا اچ اپݨا ول مقام بݨائے۔ جادو منتر نال نی صرف محنت، دیانت تے امانت دے ذریعے ترقی کیتی ونڄ سڳدی اے۔ اساں کوششاں کریندے پیوں۔ انشاء اللہ رل تے بہتری گھن آؤسوں تاں جو سارے صوبیں دے عام عوام کیتے گھراں دی دہلیز تے خدمات دی ݙیوݨ یقینی بݨایا ونڄ سڳے۔ ماضی دی غلطیاں کوں سدھریسوں تے ترقی دے ثمرات چارے صوبیں کوں منتقل کریسوں۔ شفاف گورننس دے نظام کوں صوبیں اچ وی رائج کریسوں۔کچھی کینال متعلق ہک سوال دے جواب اچ وزیراعظم آکھیا جو آبی ذخیرے دے منصوبیں کیتے اڄوکے مالی سال دے بجٹ اچ 368 ارب روپے مختص کیتے ڳئن، انھاں اچ کچھی کینال دا منصوبہ وی شامل اے، ایں منصوبے کوں تکھے مکمل کیتا ویسی، ایں منصوبے کوں پاکستان کینال دا ناں ݙیواؤں تاں بہتر رہسی۔ضلع چاغی نال تعلق رکھݨ آلی طالبہ خالدہ یوسف دے سوال دے جواب اچ وزیراعظم آکھیا جو آپ دا تعلق وی چاغی نال اے، اساں کوں آپ تے بہت ماݨ اے۔ ماضی اچ میں پنجاب دے وزیراعلیٰ دی حیثیت نال بہترین کارکردگی دا مظاہرہ کرݨ آلے طلبہ و طالبات اچ لیپ ٹاپ ݙتے، انھاں دے ہتھاں اچ کلاشنکوف نی ݙتی۔ اڄ ڈیجیٹل انوویشن، اے آئی تے آئی ٹی دا دور اے، لکھاں لیپ ٹاپ تقسیم کیتے ڳئے، انھاں ٻال ، ٻالڑیاں تے گھراݨیں دی تقدیر بدل ݙتی تے انھاں ملک دی ترقی تے تعلیم کیتے وݙا کلیدی کردار ادا کیتے تے گزریل سال وی پورے ملک اچ میرٹ تے ہک لکھ لیپ ٹاپ تقسیم کیتے ڳئے۔ لیپ ٹاپ تے وظائف دے حوالے نال بلوچستان دا کوٹہ باقی صوبیں توں زیادہ اے۔ ایں دے علاوہ بلوچستان اچ 9 دانش سکولز بݨائے ویندے پئن۔ تعلیم کیتے انڄ انڄ درسگاہواں، کلاس رومز تے کھیݙاں دے میدان ہوسن۔ غریب تے یتیم ٻالاں کوں مفت تعلیم دی سہولت حاصل تھیسی، ہزاراں ٻال تے بالڑیاں فارغ التحصیل تھی تے ڈاکٹرز، انجینئرز بݨ تے قوم دی بھرپور خدمت کریندے پئن۔ بلوچستان دے تعلیمی اداریں کیتے صوبائی حکومت دے نال رل تے سہولتاں ݙیسوں۔ بلوچستان دے طلبہ و طالبات ملک دی ترقی تے خوشحالی اچ بھرپور کردار ادا کریسن تے ملک دشمن عناصر دی بیخ کنی اچ ہراول دستہ ثابت تھیسن، ایں طرح پاکستان وقتی دہشت گردی توں نجات حاصل کر گھنسی۔وزیراعظم آکھیا جو اساں کوں بلوچستان اچ مزید وسائل ݙیوݨے ہن۔ کوئٹہ، قلات تے چمن سودھے بلوچستان دے عام آدمی کوں جݙاں تئیں اے احساس نہ تھیسی جو ایں دی ترقی تے خوشحالی کیتے بلوچستان دی حکومت تے وفاق رل تے پنجاب، خیبرپختونخوا تے سندھ دی ترقی تے خوشحالی وانڳوں سوچیندن ، ایں ویلھے تئیں او مطمئن نہ تھیسی۔ وزیراعظم یقین ݙوایا جو بلوچستان دی ترقی، خوشحالی، تعلیم تے علاج کیتے وسائل ݙیوݨ یقینی بݨایا ویسی، پاکستان کوں دنیا دا ہک طاقتور ترین ملک بݨئیسوں۔ ورکشاپ دے شرکاء دے نال وزیراعظم دا گروپ فوٹو وی تھیا۔