وزیراعظم اتے فیلڈ مارشل پاکستان دے سب توں وݙے ڈیٹا سینٹر اتے اے آئی کلاؤڈ سکائی 47 قراقرم ون دا افتتاح کر ݙتے

اسلام آباد۔24جولائی(اے پی پی)وزیراعظم محمد شہباز شریف اتے چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر پاکستان دے سب توں وݙے ڈیٹا سینٹر اتے اے آئی کلاؤڈ سکائی 47 قراقرم ون دا افتتاح کر ݙتے، وزیراعظم محمد شہباز شریف آکھیے جو متحرک، ترقی پسند اتے شاندار مستقبل کیتے سکائی 47 منصوبہ ہک وݙی پیش رفت اے، مشکلات اتے چیلنجز دا متحد تھی امید، حوصلے اتے عزم نال مقابلہ کروں تاں کوئی وی ہدف پورا کر سڳدے ہیں۔ انہاں اے ڳالھ اسلام آباد اچ پاکستان دے سب توں وݙے ڈیٹا سینٹر اتے اے آئی کلاؤڈ سکائی 47 قراقرم ون دی افتتاحی تقریب نال خطاب اچ آکھی۔

تقریب اچ چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر، وفاقی وزراء اتے ٻنھاں شرکت کیتی۔ وزیراعظم آکھیا جو سکائی 47 ڈیٹا سینٹر قراقرم ون ہک متاثر کن اتے قابلِ تحسین منصوبہ اے، جیڑھا ڳھٹ مدت اچ غیر معمولی عزم، پختہ یقین اتے اعلیٰ مہارت نال مکمل کیتا ڳئے، ڄیکر اساں ایں ماڈل تے ٹردے رہوں تاں نہ صرف ماضی دے نقصان دی بھرپائی کر ڳھنسوں ٻھل مستقبل کیتے وی ودھ متحرک ترقی یافتہ پاکستان ٻݨا سڳسوں جیندی ساکوں وݙی لوڑھ اے، اے کم اوکھا ضرور اے ٻھل ناممکن کائنی ڄیویں جو معرکہِ حق اچ اساں عظیم کامیابی حاصل کیتی اتے اے پاکستان دی تاریخ دا عظیم ترین لمحہ ہئی۔ وزیراعظم آکھیا جݙاں انسان دا عزم پختہ ہووے تاں سب کڄھ ممکن اے، چیلنجز اتے مشکلات آندن ٻھل ایندے مقابلے کیتے امید، حوصلہ اتے ڄذبے دی لوڑھ ہوندی اے اتے ایندے نال معرکہِ حق ڄھیں تاریخی کارنامے سامݨے آندن۔ وزیراعظم آکھیا جو سکائی 47 ڄھیں عظیم منصوبے پاکستان دے مستقبل دی ضمانت ہین، فیلڈ مارشل سید عاصم منیر دی بصیرت افروز قیادت، شراکت دار زیڈ ٹی ای، وفاقی وزیرِ انفارمیشن ٹیکنالوجی اتے سیکرٹری انفارمیشن ٹیکنالوجی کوں بھرپور حمایت اتے خراجِ تحسین پیش کرینداں، قوم کوں سکائی 47 ڄھیاں تحفہ ݙیوݨ تے سارے سٹیک ہولڈرز دا مشکور ہاں، مسلسل محنت اینڄھے عظیم منصوبیاں کوں حقیقت اچ وٹا ݙیندی اے، اینڄھے منصوبے کراچی اتے لاہور اچ وی مکمل کیتے ویسن، سرکاری اداریاں کوں ایں سہولت نال جوڑݨا چاہیدے۔ وزیراعظم آکھیا جو اے منصوبہ پاکستان دے عوام کیتے ہک بہترین تحفہ اے جیہڑا ناقابلِ تسخیر سکیورٹی ݙیسی، ایں منصوبے نال اے امید اتے حوصلہ ملدے جیکر اساں متحد تھی تے کم کروں تاں کوئی وی ہدف ناقابلِ حصول نئیں۔ ایں توں پہلے وزیراعظم محمد شہباز شریف اتے فیلڈ مارشل سید عاصم منیر کوں ڈیٹا سینٹر بارے بریفنگ وی ݙتی ڳئی۔ تقریب نال وفاقی وزیرِ انفارمیشن ٹیکنالوجی شزا فاطمہ خواجہ اتے سی ای او سکائی 47 حسن عباس وی خطاب کیتے۔