سکیورٹی فورسز دے آپریشن اچ گرفتار فتنۃ الہندوستان دے دہشت گرد دے اہم انکشافات

اسلام آباد۔27جولائی (اے پی پی) گرفتار دہشت گرد حبیب اللہ فتنۃ الہندوستان دے دہشت گردی نیٹ ورک توں متعلق ہوشربا انکشافات کیتن۔ تفصیلات دے مطابق فتنۃ الہندوستان دے دہشت گرد حبیب اللہ دا تعلق ضلع خضدار دی تحصیل اورناچ دے علاقے سیراندوہ توں اے۔ فتنۃ الہندوستان دے گرفتار دہشت گرد حبیب اللہ انکشاف کیتا جو دہشت گرد تنظیم ایں کوں کوڑے وعدے تے مالی لالچ ݙے تے بھرتی کیتا، چنل دشت منتقل کر تے ذہن سازی تے بعد اچ سرگڑھ کیمپ اچ تربیت ݙتی ڳئی، سرگڑھ کیمپ اچ اسلحہ، بارودی مواد تے گھات لا تے حملہ کرݨ دی تربیت ݙتی ڳئی، دہشت گرد حملیاں دے بعد شناخت لُکاوݨ تے فرار تھیوݨ دے طریقے وی سکھائے ڳئے، صرف 25 ہزار روپے تے آپݨے بلوچ بھراواں دے خون نال ہاتھ رنگیے۔ فتنۃ الہندوستان دی پراکسی بی وائے سی دے دھرنیاں دے دوران میݙی نشاندہی تھئی، دہشت گرد حبیب اللہ اعتراف کیتا جو اہ اسلحہ، گولہ بارود، دھماکہ خیز مواد، خوراک تے ادویات دہشت گرد گروہاں تئیں پڄیندا رہیے اتے سنارو کیمپ، خضدار، نال تے بیلہ سمیت متعدد حملیاں اچ شریک رہیا، ہر دہشت گرد کارروائی توں پہلے اسلحہ، ہدایات تے رابطے دہشت گرد تنظیم فراہم کریندی رہی، تمام دہشت گرد کارروائیاں اچ حصہ گھݨ دے پیسے ݙتے ویندے ہن، خضدار تے بیلہ دہشت گرد حملے دے بعد (25-25) ہزار روپے بطورِ معاوضہ ݙتے ڳئے۔ خضدار پولیس چیک پوسٹ حملے اچ دہشت گرداں دی فائرنگ توں 2 شہری جاں بحق تھئے، میݙے اکثر ساتھی کم نہ ہووݨ دی وجہ توں دہشت گرد تنظیم اچ شامل تھئے ہن، دہشت گرد تنظیم خواب دا جھانسہ ݙے تے گھن ویندی اے اتے ولا بلیک میل کریندی اے تانجو کوئی وی واپس نہ ونڄ سڳے، جو وی دہشت گرد تنظیم کوں چھوڑݨ دی کوشش کرے ایں کوں مار ݙتا ویندے، دہشت گرد کیمپ اچ کھاوݨ پیوݨ دا بندوبست نئی ہوندا، گزارا قریبی دیہات توں لٹ مار تے ہوندے، گرفتار دہشت گرد دے اعترافی بیان توں اے ڳالھ ہک واری ولا واضح تھی ڳئی اے جو فتنۃ الہندوستان بلوچستان اچ دہشت گردی اچ ملوث اے۔