اسلام آباد۔27جولائی (اے پی پی) پاکستان تنازعہِ کشمیر دے حوالے توں بھارتی وزیرِ دفاع دے انتہائی اشتعال انگیز تے غیر ذمہ دارانہ بیان دی شدید مذمت کیتی اے۔ کشمیر میڈیا سروس دے مطابق وزارتِ خارجہ ہک بیان اچ آکھیا جو بھارتی وزیرِ دفاع راج ناتھ سنگھ دے بیان اچ نہ صرف اقوامِ متحدہ تے بین الاقوامی طور تے تسلیم شدہ تنازعہِ جموں و کشمیر دے حوالے توں حقائق کوں مسخ …
پاکستان دی بھارتی وزیرِ دفاع دے انتہائی اشتعال انگیز بیان دی مذمت
اسلام آباد۔27جولائی (اے پی پی) پاکستان تنازعہِ کشمیر دے حوالے توں بھارتی وزیرِ دفاع دے انتہائی اشتعال انگیز تے غیر ذمہ دارانہ بیان دی شدید مذمت کیتی اے۔ کشمیر میڈیا سروس دے مطابق وزارتِ خارجہ ہک بیان اچ آکھیا جو بھارتی وزیرِ دفاع راج ناتھ سنگھ دے بیان اچ نہ صرف اقوامِ متحدہ تے بین الاقوامی طور تے تسلیم شدہ تنازعہِ جموں و کشمیر دے حوالے توں حقائق کوں مسخ کیتا ڳئے جو اج وی اقوامِ متحدہ دی سلامتی کونسل دے ایجنڈے تے موجود اے، بلکہ ایں توں علاقائی تے بین الاقوامی امن و سلامتی کوں خطرے اچ پاوݨ دی بھارتی حکومت دی سوچی سمجھی پالیسی دی وی عکاسی تھیندی اے۔ ایں طرح دے بیانات مقبوضہ جموں تے کشمیر تے بھارت دے مسلسل قبضے، خطے اچ ایں دی دہشت گردی دی سرپرستی تے آپݨے ملک دے اندر عدمِ استحکام توں توجہ ہٹاوݨ دی کوشش ہن۔ بھارت کوں جارحانہ تے جنگی جنون تے مبنی بیان بازی کریندیں ہوئیں ایہہ یاد رکھݨا چاہیدے جو پاکستانی عوام تے حکومت کہیں وی مہم جوئی کوں ناکام بݨاوݨ کیتے پرعزم ہن جینویں جو گزریل سال آپریشن بنیانِ مرسوس دے دوران پوری پاکستانی قوم تے ایں دی بہادر مسلح افواج ݙکھا ݙتا ہئی۔پاکستان عالمی برادری بالخصوص اقوامِ متحدہ تے زور ݙتا جو او بھارت دے مسلسل جارحانہ رویے دا نوٹس گھنے اتے ایں کوں اقوامِ متحدہ دی سلامتی کونسل دی متعلقہ قرارداداں تے عملدرآمد اچ ناکامی دا ذمہ دار ٹھہراوے جنھاں اچ کشمیریاں کوں حقِ خودارادیت دی ضمانت ݙتی ڳئی اے۔
