پاکستان بھارتی وزیرِ دفاع دے غیر ذمہ دارانہ بیانات کوں ݙو ٹوک انداز اچ مسترد کریندے: وزیرِ دفاع

اسلام آباد۔27جولائی (اے پی پی) وزیرِ دفاع خواجہ محمد آصف آکھیا جو پاکستان بھارتی وزیرِ دفاع دے غیر ذمہ دارانہ بیانات کوں ݙو ٹوک انداز اچ مسترد کریندے، بھارت دے پاکستان تے بے بنیاد الزامات ایں دے ریاستی سرپرستی اچ دہشت گردی دے ریکارڈ دے باعث ناقابلِ اعتبار ہن۔ جموں و کشمیر توں متعلق گمراہ کن تے کوڑے بھارتی بیانیے تے شدید ردِعمل دا اظہار کریندیں ہوئیں وزیرِ دفاع خواجہ محمد آصف سوشل میڈیا پلیٹ فارم ایکس تے آپݨے بیان اچ آکھیا جو بھارت سیاسی پروپیگنڈے دے ذریعے بین الاقوامی سطح تے تسلیم شدہ قانونی حقائق کوں مسخ نئی کر سڳدا، پاکستان بھارتی وزیرِ دفاع دے غیر ذمہ دارانہ بیانات کوں ݙو ٹوک انداز اچ مسترد کریندے، ایجھے بیانات قانونی حقائق کوں سیاسی پروپیگنڈے تے دھونس دے ذریعے مسخ کرݨ دی ہک ٻئی ناکام بھارتی کوشش ہن۔ انھاں آکھیا جو گمراہ کن بھارتی بیانات نہ تاں جموں و کشمیر دی متنازعہ حیثیت تبدیل کر سڳدن اتے نہ خطے دے امن اچ کوئی کردار ادا کر سڳدن۔ جموں و کشمیر بین الاقوامی سطح تے تسلیم شدہ متنازعہ علاقہ اے۔ جموں و کشمیر دے مستقبل دا فیصلہ سلامتی کونسل دی قرارداداں تے کشمیری عوام دی امنگاں دے مطابق ہووݨا چاہیدے۔ خواجہ آصف آکھیا جو بھارت دے پاکستان تے بے بنیاد الزامات ایں دے ریاستی سرپرستی اچ دہشت گردی دے ریکارڈ دے باعث ناقابلِ اعتبار ہن۔ حقیقت اے جو بھارت جنوبی ایشیا اچ دہشت گردی دی سب توں وݙی سرپرست ریاست تے عدمِ استحکام دا بنیادی محرک اے۔ بھارت آپݨے جارحانہ تے توسیع پسندانہ عزائم دے ذریعے پورے خطے کوں یرغمال بݨائی بیٹھے۔ انھاں آکھیا جو بھارت دی غیر ذمہ دارانہ بیان بازی خطے اچ بین الریاستی تصادم دی شدت تے خطرات اچ اضافے دا باعث بݨ سڳدی اے۔ پاکستان امن تے مذاکرات دی آپݨی پالیسی تے قائم اے۔ پاکستان دا اپنی خودمختاری، علاقائی سالمیت تے قومی سلامتی دے تحفظ کیتے عزم غیر متزلزل اے۔