وفاقی وزیرِ پٹرولیم آئل ٹینکر کنٹریکٹرز ایسوسی ایشن دے مسئلیں دے حل کیتے کمیٹی بݨا ݙتی

اسلام آباد۔27جولائی (اے پی پی) وفاقی وزیرِ پٹرولیم علی پرویز ملک نال آئل ٹینکر کنٹریکٹرز ایسوسی ایشن (او ٹی سی اے) دے صدر عابد اللہ آفریدی دی قیادت اچ وفد ملاقات کیتی، ملاقات خوشگوار ماحول اچ تھئی جیں اچ آئل ٹینکر انڈسٹری کوں پیش مسئلیں کوں سانجھی مشاورت نال حل کرݨ تے اتفاق کیتا ڳیا۔وفاقی وزیر ایسوسی ایشن دے تحفظات دا جائزہ گھنݨ تے ہک ہفتے دے اندر سفارشات پیش کرݨ کیتے سپیشل سیکرٹری پٹرولیم دی سربراہی اچ ہک اعلیٰ سطحی کمیٹی تشکیل ݙے ݙتی۔ کمیٹی اچ ڈائریکٹر جنرل (آئل)، آئل اینڈ گیس ریگولیٹری اتھارٹی (اوگرا) دے نمائندے، آئل ٹینکر کنٹریکٹرز ایسوسی ایشن (او ٹی سی اے) دے نمائندے تے آئل کمپنیز ایڈوائزری کونسل (او سی اے سی) دے سیکرٹری جنرل شامل ہوسن۔ملاقات دے دوران او ٹی سی اے دے وفد اپݨے اہم مطالبات پیش کیتے جنھاں اچ وائٹ آئل پائپ لائن دے کوٹے اچ کمی، آئل مارکیٹنگ کمپنیاں (او ایم سیز) دی طرفوں فریٹ کنٹریکٹس دی شفاف تقسیم دا طریقہ کار، فریٹ فارمولے کوں کنزیومر پرائس انڈیکس (سی پی آئی) نال منسلک کرݨا تے کمرشل لوڈنگ دا وقتی خاتمہ شامل ہن۔وفاقی وزیر اوگرا کوں ہدایت کیتی جو وہ سارے متعلقہ فریقاں نال رل تے آئل ٹینکر کنٹریکٹرز دے جائز مسئلیں دے حل سانڳےاقدامات کرے۔ انھاں آئل مارکیٹنگ کمپنیاں کوں وی ہدایت ݙتی جو او فریٹ کنٹریکٹس دی تقسیم متعلق اپݨی تحریری پالیسی وزارت کوں ݙیون تاں جو جے کہیں قسم دی امتیازی پالیسی موجود ہووے تاں ایں دا تدارک کیتا ونڄ سڳے۔انھاں ہدایت کیتی جو اوگرا آئل ٹینکرز دی موثر ٹریکنگ کوں یقینی بݨاوے تے ایں امر کوں یقینی بݨایا ونڄے جو ڈیلرز دی گاݙیاں پرائمری ٹرانسپورٹیشن اچ شامل نہ ہوون۔علی پرویز ملک آکھیا جو حکومت دی اولین ترجیح ملک اچ ایندھن بلا تعطل ݙیوݨ تے عوام کوں سہولتاں ݙیوݨ اے۔