سید نوید قمر دی صدارت اچ پبلک اکائونٹس کمیٹی دا اجلاس

اسلام آباد۔ 03 ستمبر(اے پی پی) پبلک اکائونٹس کمیٹی دا اجلاس پارلیمنٹ ہاؤس اچ کمیٹی دے سینئر رکن سید نوید قمر دی زیرِ صدارت پارلیمنٹ ہاؤس اچ منعقد تھیا۔ اجلاس اچ کمیٹی دے ارکان سودھے متعلقہ سرکاری اداریں دے افسراں شرکت کیتی۔ اجلاس اچ پٹرولیم ڈویژن دے 2023-24 تے 2024-25 دے آڈٹ اعتراضات دا جائزہ گھدا ڳئے۔ اجلاس دے آغاز تے قومی اسمبلی سیکرٹریٹ دے ایڈیشنل سیکرٹری محمد مشتاق ݙسایا جو اعظم خان سواتی ٹھلیاں دی زمین دے حوالے نال پی اے سی دی کارروائی منڳی اے، اے ھک خفیہ دستاویز ہوندی اے، پی اے سی ہی ایں دی اجازت ݙے سڳدی اے۔ جے ایوان اچ اے پیش تھی ونڄے تاں ول ایں دی نقل کوئی وی گھن سڳدے۔ اجلاس دے صدر نشین سید نوید قمر ہدایت کیتی جو جیندے اجلاس دی کارروائی دی نقل منڳدے پئن ایں دی رپورٹ کوں وقتی فائنل کرتے ایوان اچ پیش کر ݙتا ونڄے تاں اے مسئلہ حل تھی ویسی۔ پٹرولیم ڈویژن دی 2024-25 دی آڈٹ رپورٹ دا جائزہ گھندے آڈٹ حکام پی اے سی کوں ݙسایا جو یو ایف جی دی مد اچ 80 ارب روپے دا ضیان تھئے جیندی وجہ اوگرا اپݨی مقررہ حد توں تجاوز کیتا۔ پٹرولیم ڈویژن دی طرفوں ݙسایا ڳیا جو رپورٹ اچ ایں آڈٹ اعتراض دے حوالے نال اعداد و شمار درست کائںی۔ پی اے سی دے استفسار تے پٹرولیم ڈویژن دی طرفوں ݙسایا ڳیا جو بلوچستان کوں 120 ایم ایم سی ایف ٹی گیس ݙتی ویندی اے، اتھاں 36 فیصد توں ودھ ضیان اے، ساݙیاں کوششاں نال انہاں نقصانات اچ کمی آندی پئی اے۔ پی اے سی دے ارکان دا آکھݨ ہئی جو سسٹم توں گیس ݙیوݨ ادھ کر ݙتی ڳئی اے۔ پی اے سی آڈٹ پیرا واپس ڈی اے سی کوں بھجوا ݙتا۔ پی اے سی کوں ݙسایا ڳیا جو سندھ دے شہراں حیدر آباد تے سکھر اچ گیس میٹرز تبدیل کیتے ڳئن جیندی وجہ نال گیس ضیان اچ کمی آندی پئی اے۔ سید حسین طارق آکھیا جو میٹر تبدیل کرݨ دے بعد نقصانات ودھ تے 17 فیصد تھی ڳئن، جتھاں میٹرلڳئن اتھوں دے گیس ضیان دی تفصیل منگوائی ونڄ سڳدی اے۔ سید نوید قمر آکھیا جو چیزاں کوں تفصیلی طور تے ݙیکھݨ دی لوڑھ اے ۔پی اے سی پٹرولیم ڈویژن کوں ہدایت کیتی ایں حوالے نال آڈٹ کوں مطمئن کرو ول اے نبیڑیا ونڄ سڳدے۔