عوام کوں صحت دیاں سہولتاں ݙیوݨ حکومت دی ترجیح، وزیرِ اعظم دا جناح میڈیکل کمپلیکس دے امور بارے جائزہ اجلاس نال خطاب

اسلام آباد۔ 03 ستمبر(اے پی پی)وزیرِ اعظم محمد شہباز شریف آکھیے جو لوکاں کوں صحت دیاں بہترین سہولتاں ݙیوݨ حکومت دی ترجیح اے، صحت دے شعبے اچ اصلاحات کوں تیکھا کیتا ویندا پئے۔ انہاں اے ڳالھ اسلام آباد اچ جناح میڈیکل کمپلیکس و ریسرچ سینٹر اتے فیڈرل گورنمنٹ پولی کلینک فیز 2 ایکسٹینشن دی تعمیر بارے جائزہ اجلاس دی اڳواݨی کریندے آکھی۔ اجلاس اچ مجوزہ جناح میڈیکل کمپلیکس و ریسرچ سینٹر دی عمارت دی تعمیر دے مختلف تعمیری ڈیزائن تے تجویزاں ݙتیاں ڳئن۔ اجلاس کوں پولی کلینک فیز 2 ایکسٹینشن دی تعمیر اچ پیشرفت تے وی بریفنگ ݙتی ڳئی۔ اجلاس اچ سیکٹر جی 11 اچ زیرِ تعمیر فیڈرل گورنمنٹ پولی کلینک ایکسٹینشن کوں جناح میڈیکل کمپلیکس دے پہلے فیز دے طور تے شروع کرݨ دا فیصلہ کیتا ڳئے، ایں فیصلے دا مقصد ہسپتال کوں تیکھے فعال کرݨ اتے شہریاں کوں صحت دیاں بہترین سہولتاں ݙیوݨ اے۔ وزیرِ اعظم ہدایت کیتی جو جناح میڈیکل کمپلیکس دے پہلے فیز کوں مارچ 2027ء تئیں مکمل کیتا ونڄے، جناح میڈیکل کمپلیکس اینڈ ریسرچ سینٹر دے پہلے فیز کوں جدید اتے سٹیٹ آف دی آرٹ ہسپتال بݨاوݨ بارے ہر ممکن اقدامات کیتے ونڄن، ایں ہسپتال اچ جدید اتے ہائی ٹیک مشینری دی تنصیب یقینی بݨائی ونڄے، منصوبے دی پیشرفت دے نال نال تھرڈ پارٹی ویلیڈیشن جاری رکھی ونڄے۔ اجلاس اچ وفاقی وزیرِ اقتصادی امور احد خان چیمہ، وفاقی وزیرِ قومی صحت سید مصطفیٰ کمال، وفاقی وزیرِ پاور ڈویژن سردار اویس احمد خان لغاری اتے متعلقہ اعلیٰ سرکاری افسراں شرکت کیتی۔