قومی اسمبلی دی قائمہ کمیٹی برائے اطلاعات و نشریات دا اجلاس، میڈیا ورکرز دیاݨ تنخواہواں دی ادائیگی اچ دیر تھیوݨ تے چنتا

اسلام آباد۔ 03 ستمبر(اے پی پی)قومی اسمبلی دی قائمہ کمیٹی برائے اطلاعات و نشریات میڈیا ورکرز کوں تنخواہواں دی ادائیگی اچ مسلسل چِرک تھیوݨ تے چنتا کریندے آکھیے جو سرکاری اداریاں دے ذمہ واجبات دی اݙ اچ میڈیا دے ملازماں کوں اوکھ نئٰن ٻھوڳݨا چاہیدا۔ کمیٹی دا اجلاس اسلام آباد اچ پاکستان براڈ کاسٹنگ کارپوریشن ہیڈ کوارٹرز اچ چیئرمین کمیٹی رکنِ قومی اسمبلی پلین بلوچ دی صدارت اچ تھیا۔ کمیٹی آکھیا جو تنخواہواں ویلھے تے ݙیوݨ میڈیا اداریاں دی بنیادی ذمہ داری اے، سارے متعلقہ حکام کوں میڈیا ورکرز دے جائز مالی حقوق دے تحفظ کیتے موثر اقدامات کرݨے چاہیدن، میڈیا ملازماں کوں تنخواہیں بغیر کہیں چِرک دے ݙتیاں ونڄن۔ کمیٹی زیر التواء تنخواہواں اتے میڈیا اداریاں دے ٻئے مالی واجبات دیاں جامع تفصیلات منڳ ڳھدن جو پریس انفارمیشن ڈیپارٹمنٹ پرنٹ اتے الیکٹرانک میڈیا اداریاں کوں تھیوݨ آلیاں ادائیگیاں دی تفصیل ݙیوے ڄنہاں اچ ادا شدہ پیسے، بقیہ ادائیگیاں اتے زیرِ التواء کلیمز دی صورتحال شامل ہووے۔ کمیٹی ٹی وی چینلاں تے نشر تھیوݨ والے مارننگ شوز دے مواد اتے پروگرامنگ، بالخصوص شائستگی، ذمہ داری اتے عوامی مفاد دے مناسب معیار کوں برقرار رکھݨ بارے غور کیتا۔ کمیٹی پاکستان الیکٹرانک میڈیا ریگولیٹری اتھارٹی (پیمرا) کوں مارننگ شوز کیتے جامع اتے واضح ضابطہِ اخلاق ݙیوݨ دی ہدایت کیتی۔ مجوزہ ضابطہِ اخلاق اچ مواد دی نوعیت، زبان، حساس معاملیاں نال نمٹݨ، مہماناں دی شرکت اتے مجموعی ادارتی معیار بارے مناسب رہنما اصول شامل کیتے ونڄن ڄݙاں جو ٹی وی پروگرامنگ کوں متعلقہ قوانین اتے ضابطہ جاتی تقاضیاں دے مطابق ورتݨ تے کم کیتا ونڄے۔ کمیٹی پیمرا کوں ٹی وی چینلاں دے زیرِ التوا واجبات دیاں جامع تفصیلات وی ݙیوݨ دی ہدایت کیتی ڄنہاں اچ بقایا جات دی نوعیت اتے رقم، واجبات دے زیرِ التواء رہوݨ دی مدت اتے انہاں دی وصولی کیتے ریگولیٹر ولوں اقدامات وی شامل ہوون۔ کمیٹی موثر ضابطہ جاتی نگرانی تے زیرِ التوا مالی ذمہ داریاں دے ویلھے سر حل تے زور ݙتا۔ کمیٹی صحت مند اتے ذمہ دار میڈیا دے ودھارے اتے براڈکاسٹرز ولوں پیشہ ورانہ اتے اخلاقی معیار دی پاسداری دا وی آکھیے۔ کمیٹی پی بی سی کوں ریڈیو پاکستان تے ساریاں علاقائی زباناں اچ پروگرامز اتے نویں بلیٹن شروع کرݨ دی وی ہدایت کیتی۔ اجلاس اچ ارکانِ قومی اسمبلی آسیہ ناز تنولی، شاہین، مہتاب اکبر راشدی، سید امین الحق، رعنا انصر، مولانا عبدالغفور حیدری، پارلیمانی سیکرٹری برائے اطلاعات بیرسٹر دانیال چوہدری، سیکرٹری وزارتِ اطلاعات، چیئرپرسن پیمرا اتے پی بی سی و پیمرا دے ٻئے افسراں شرکت کیتی۔