پاکستان کثیرالجہتی نظام تے عالمی معاملیاں اچ اقوامِ متحدہ دے موثر کردار دی حمایت کریندا رہسی ، وزیرِ اعظم شہباز شریف

اسلام آباد۔ 04 ستمبر (اے پی پی) وزیرِ اعظم محمد شہباز شریف آکھیا جو پاکستان کثیرالجہتی نظام تے عالمی معاملیاں اچ اقوامِ متحدہ دے موثر کردار دی حمایت کریندا رہسی۔ اڄوکےعالمی چیلنجاں نال نبڑݨ کیتے اقوامِ متحدہ دے پلیٹ فارم تے کثیرالجہتی تعاون کوں ٻیا مضبوط بݨاوݨ وقت دی اہم لوڑھ اے۔ وزیرِ اعظم آفس دے میڈیا ونگ توں جاری بیان دے مطابق اے ڳالھیں انہاں جمعے کوں اتھاں اقوامِ متحدہ دے سیکرٹری جنرل دے عہدے دے امیدوار سفیر اولارا اوتونو نال ملاقات دے دوران ڳالھ مہاڑ اچ آکھی ڄنہاں وزیرِ اعظم نال اتھاں ملاقات کیتی۔ ایں موقع تے یوگنڈا دے صدر دے خصوصی ایلچی تے یوگنڈا دے سابق وزیرِ اعظم روہاکانا روگونڈا وی انہاں دے نال ہن۔ ملاقات اچ نائب وزیرِ اعظم و وزیرِ خارجہ سینیٹر محمد اسحاق ڈار، وزیرِ اعظم دے معاونِ خصوصی طارق فاطمی تے سیکرٹری خارجہ آمنہ بلوچ وی موجود ہن۔ ملاقات دے دوران وزیرِ اعظم محمد شہباز شریف اقوامِ متحدہ دے منشور دے اصولاں تے مقاصد نال پاکستان دی پختہ وابستگی دا اعادہ کیتا۔ وزیرِ اعظم بین الاقوامی قانون تے بین الاقوامی معاہدیاں دے احترام کوں یقینی بݨاوݨ دی ضرورت تے وی زور ݙتا۔ وزیرِ اعظم آکھیا جو پاکستان کثیرالجہتی نظام تے عالمی امور اچ اقوامِ متحدہ دے موثر کردار دی بھرپور تے مستقل حمایت جاری رکھیسی۔ انہاں ایں ڳالھ تے زور ݙتا جو اڄوکے عالمی چیلنجاں نال نبڑݨ کیتے اقوامِ متحدہ دے پلیٹ فارم تے کثیرالجہتی تعاون کوں ٻیا مضبوط بݨاوݨ وقت دی اہم ضرورت اے۔ وزیرِ اعظم امید ظاہر کیتی جو اقوامِ متحدہ دے آئندہ سیکرٹری جنرل اقوامِ متحدہ دے ترائے بنیادی ستوناں امن تے سلامتی، ترقی تے انسانی حقوق تے باہم مربوط تے متوازن انداز اچ توجہ ݙیسن۔ اولارا اوتونو کثیرالجہتی نظام دے فروغ تے اقوامِ متحدہ دے ترائیں بنیادی ستوناں کیتے پاکستان دی دیرینہ تے نمایاں خذمتاں تے تشکر دا اظہار کیتا۔ انہاں بین الاقوامی امن تے سلامتی کیتے جاری کوششاں اچ پاکستان دی قیادت تے اہم کردار کوں وی سراہیا۔