نائب وزیرِ اعظم اسحاق ڈار نال اقوامِ متحدہ دے سیکرٹری جنرل دے عہدے کیتے امیدوار سفیر اولارا اوتنو دی ملاقات

اسلام آباد۔ 04 ستمبر(اے پی پی)نائب وزیرِ اعظم و وزیرِ خارجہ سینیٹر محمد اسحاق ڈار نال اقوامِ متحدہ دے سیکرٹری جنرل دے عہدے کیتے امیدوار سفیر اولارا اوتنو یوگنڈا دے صدر دے خصوصی ایلچی اتے سابق وزیرِ اعظم روہاکانا روگونڈا نال ملاقات کیتی اتے بدلدی عالمی صورتحال تے کثیرالجہتی نظام کوں درپیش چیلنجاں تے الایا۔ دفترِ خارجہ توں جاری بیان دے مطابق نائب وزیرِ اعظم و وزیرِ خارجہ کثیرالجہتی نظام کیتے پاکستان دا دیرینہ عزم دوہریندے ہوئے ایں نظام کوں ٻیا مضبوط ٻݨاوݨ تے زور ݙتے۔ انہاں آکھیا جو کثیرالجہتی فورمز تے طے پاوݨ والی مفاہمتاں اتے فیصلیاں تے موثر عملدرآمد نال ایں نظام کوں مستحکم کیتا ونڄݨا چاہیدے۔ انہاں بین الاقوامی قانون دے احترام اتے اقوامِ متحدہ دی سلامتی کونسل دیاں قرارداداں بالخصوص فلسطین اتے جموں و کشمیر بارے قرارداداں تے عملدرآمد تے زور ݙتے۔ نائب وزیرِ اعظم و وزیرِ خارجہ امید کیتی جو اقوامِ متحدہ دے آئندہ سیکرٹری جنرل عصرِ حاضر دے عالمی چیلنجاں نال نمٹݨ کیتے اقوامِ متحدہ دی صلاحیت کوں ٻیا مضبوط بݨاوݨ اچ موثر کردار ادا کریسن۔ اولارا اوتنو عالمی امن و سلامتی کیتے پاکستان دیاں دیرینہ خذمتاں کوں سراہیا ڄنہاں اچ اقوامِ متحدہ دے امن مشنز اچ پاکستان دی شرکت وی شامل اے۔ انہاں علاقائی امن و استحکام کیتے پاکستانی قیادت دیاں سفارتی کوششاں کوں وی سراہیا۔ روہاکانا روگونڈا نائب وزیرِ اعظم و وزیرِ خارجہ اسحاق ڈار کوں دورہِ یوگنڈا دی دعوت وی ݙتی۔