184واں آئی بی سی سی فورم مُک ڳئیا، پورے ملک دے امتحانی نظام کوں ٻیا موثر بݨاوݨ کیتے اہم فیصلے

اسلام آباد،اے پی پی ( 05 ستمبر 2026ء) انٹر بورڈز کوآرڈینیشن کمیشن (IBCC) فورم دا ݙو ڈیہوارہ 184واں اجلاس مری اچ اختتام پذیر تھی ڳیا، ڄیندے اچ پاکستان دے امتحانی نظام کوں رٹہ سسٹم توں تصوراتی تے فہم تے مبنی جانچ دی پاسے منتقل کرݨ، شفافیت تے یکسانیت کوں فروغ ݙیوݨ تے پاکستانی تعلیمی اسناد دی بین الاقوامی سنڄاݨ ٻیا بہتر بݨاوݨ کیتے کئی اہم فیصلے کیتے ڳئے۔ فورم اچ ملک بھر دے ثانوی تے اعلیٰ ثانوی تعلیمی بورڈز (BISEs) دے چیئرپرسنز، ٹیکنیکل ایجوکیشن بورڈز، نصاب تے ٹیکسٹ بک بورڈز دے سینئر نمائندیاں شرکت کیتی۔ شرکاء دا خیرمقدم کریندیں ہوئیں نیشنل کوآرڈینیٹر آئی بی سی سی فورم، جناب عنایت اللہ وسیم امتحانی اصلاحات اچ تمام بورڈز دی فعال شرکت تے مشترکہ ذمہ داری دی اہمیت تے زور ݙتا۔ انہاں آکھیا جو آئی بی سی سی فورم ملک بھر دے تعلیمی بورڈز کوں ایہو جہا قومی پلیٹ فارم مہیا کریندے ڄتھاں او ہک ٻئے دے تجربیاں توں فیدہ، کامیاب اقدامات دا تبادلہ تے امتحانی نظام کوں درپیش مشترکہ چیلنجاں دے حل کیتے موثر حکمتِ عملی مرتب کر سڳدن۔ انہاں آکھیا جو بورڈز وچال مضبوط رابطہ تے متفقہ اصلاحات تے موثر عملدرآمد ملک بھر اچ منصفانہ، معیاری تے قابلِ اعتماد امتحانی نظام کیتے ضروری اے۔ اجلاس اچ وزیرِ اعظم پاکستان دی ملک بھر دے امتحانی نظام کوں معیاری تے یکساں بݨاوݨ بارے ہدایتاں تے عملدرآمد کوں خصوصی اہمیت ݙتی ڳئی۔

فورم ایں بارے اسیسمنٹ تے امتحانی طریقۂ کار اچ زیادہ یکسانیت گھن آوݨ دے اقدامات دی منظوری ݙتی، ڄہرے پاکستانی تعلیمی اسناد دی ساکھ تے بین الاقوامی سنڄاݨ کوں ٻیا مستحکم کرݨ اچ وی معاون ثابت تھیسن۔ فورم کوں آگاہ کیتا ڳیا جو سندھ دے تعلیمی بورڈز، فیڈرل بورڈ، میرپور آزاد کشمیر بورڈ، قراقرم بورڈ، آغا خان بورڈ تے ضیاء الدین بورڈ نویں گریڈنگ پالیسی تے عملدرآمد شروع کر ݙتے، ڄیندے تحت کم از کم پاسنگ مارکس 40 فیصد کر ݙتے ڳئن۔ نظرثانی شدہ گریڈنگ فارمولے دے موثر نفاذ کیتے ملک بھر اچ آگاہی سیشنز تے ورکشاپس منعقد کرݨ دا وی فیصلہ کیتا ڳیا۔ طلبہ دے تعلیمی ریکارڈ کوں ٻیا شفاف، قابلِ رسائی تے قابلِ تصدیق بݨاوݨ کیتے فورم SSC تے HSSC سرٹیفکیٹس تے ب فارم/CNIC نمبر شامل کرݨ تے اتفاق کیتا۔

طلبہ دی حوصلہ افزائی کیتے ہک ٻئے اہم اقدام دے طور تے فورم فیصلہ کیتا جو آئی بی سی سی بورڈز دے پوزیشن ہولڈراں کیتے اسکالرشپس تے بیرونِ ملک تعلیمی و مطالعاتی موقعے فراہم کریسی، ڄݙاں جو نمایاں کارکردگی ݙکھاوݨ آلے طلبہ کیتے ونٹر تے سمر کیمپس وی کیتے ویسن تانجو انہاں کوں تعلیمی سرگرمیاں دے نال قیادت، تربیت تے وسیع تر تجربیاں دے موقعے میسر آ سڳن۔ فورم ٻئے 12 دینی مدارس دی اسناد کوں SSC تے HSSC دے مساوی قرار ݙیوݨ دی سفارش کیتی، ڄیندے بعد ایں فریم ورک دے تحت مدارس دی مجموعی تعداد 26 تھی ڳئی اے۔ غیر ملکی امتحانی بورڈز دے طلبہ دی سہولت کیتے وی اہم فیصلہ کیتا ڳیا، ڄیندے مطابق ایہو جھے طلبہ ڄنہاں کم از کم ݙو سائنس مضامین پاس کیتے ہوون، انہاں کوں سائنس گروپ دی مساوات (Equivalence) ݙتی ویسی۔ ایں اقدام توں طلبہ کوں آپݨی آئندہ تعلیمی راہ دے انتخاب اچ زیادہ سہولت ملسی۔ فورم ملک بھر اچ تھیوری تے پریکٹیکل امتحانات کیتے یکساں کیلنڈر تیار کرݨ دے نال نال پریکٹیکل امتحانات کیتے مشترکہ گائیڈ لائنز تے طریقۂ کار وضع کرݨ تے وی اتفاق کیتا تانجو تمام امتحانی بورڈز اچ یکسانیت، شفافیت تے انصاف کوں ٻیا فروغ ݙتا ونڄ سڳے۔ اجلاس دے دوران BISE کوہاٹ، BISE کوئٹہ تے FBISE آپݨے بہترین طریقہ ہائے کار، جدید اقدامات تے انہاں دے نتائج پیش کیتے، تانجو کامیاب ماڈلاں توں ٻئے تعلیمی بورڈز وی فیدہ چا سڳن۔ امتحانی اصلاحات تے ڳالھ مہاڑ کریندیں ہوئے ایگزیکٹو ڈائریکٹر آئی بی سی سی، ڈاکٹر غلام علی ملاح حکومتِ پنجاب ولوں امتحانی بورڈز اچ میرٹ دی بنیاد تے چیئرپرسنز دی تقرری کوں سراہیا۔ انہاں آکھیا جو اہل تے پیشہ ور قیادت دی شمولیت توں آئی بی سی سی فورم دی استعداد اچ ودھارا تھیندا پئے اتے امتحانی نظام کوں رٹہ سسٹم توں تصوراتی تے فہم تے مبنی اسیسمنٹ آلے پاسے منتقل کرݨ دی قومی کوششاں کوں تقویت ملدی پئی اے۔ ڈاکٹر ملاح حکومتِ سندھ تے سندھ دے تعلیمی بورڈز دے چیئرپرسنز ولوں ای مارکنگ (e-Marking) دے نفاذ کوں وی سراہندیں ہوئے ایں کوں امتحانی نظام اچ شفافیت، کارکردگی تے ساکھ بہتر بݨاوݨ دی پاسے ہک اہم پیش رفت قرار ݙتا۔ انہاں آکھیا جو آئی بی سی سی فورم دے ذریعے کیتیاں ونڄݨ آلیاں اصلاحات دا مقصد ایہو جہا امتحانی نظام تشکیل ݙیوݨ ہے ڄہرا یادداشت دے بجائے فہم تے تصوراتی صلاحیت کوں ڄانچے، حقیقی تعلیمی قابلیت دی حوصلہ افزائی کرے، جدید ٹیکنالوجی توں استفادہ کرے تے پاکستانی تعلیمی اسناد دی ملکی تے بین الاقوامی ساکھ کوں ٻیا مستحکم بݨاوے۔ فورم ملک بھر دے امتحانی، ٹیکنیکل، نصابی تے ٹیکسٹ بک بورڈز وچال رابطے تے تعاون کوں ٻیا مضبوط بݨاوݨ تے پاکستان اچ شفاف، ٹیکنالوجی تے مبنی، طلبہ دوست تے بین الاقوامی معیار نال ہم آہنگ امتحانی و اسیسمنٹ نظام دے قیام دے عزم دا اعادہ کیتا۔ اجلاس دی کارروائی سیکریٹری آئی بی سی سی فورم و ڈائریکٹر جنرل آئی بی سی سی، جناب محمد عثمان خان چلائی۔