پنجاب دے دریاواں اچ پاݨی دا بہاؤ معمول دے مطابق، آندے چووی گھنٹیاں اچ اکثر علاقیاں اچ ٻئی بارش دا امکان اے، ترجمان

لاہور۔ 05 ستمبر (اے پی پی) پنجاب دے اکثر دریاواں اچ پاݨی دا بہاؤ معمول دے مطابق اے۔ ترجمان پی ڈی ایم اے دے مطابق دریائے چناب، جہلم، راوی تے ستلج اچ پاݨی دا بہاؤ نارمل سطح تے اے، ڈیرہ غازی خان دیاں رودکوہیاں اچ وی پاݨی دا بہاؤ نارمل اے۔ دریائے سندھ اچ کالاباغ تے چشمہ دے مقام تے نچلے درجے دا سیلاب اے۔ کالاباغ 3 لکھ 15 ہزار تے چشمہ اچ پاݨی دا بہاؤ 2 لکھ 61 ہزار کیوسِک اے۔ نالہ ڈیک کنگرا اچ نچلے درجے دی سیلابی صورتحال اے، ڄݙاں جو تربیلا ڈیم 100 فیصد تے منگلا ڈیم 79 فیصد بھر ڳئے۔ ڈی جی پی ڈی ایم اے آکھیا جو آئندہ 24 گھنٹیاں اچ پنجاب دے اکثر ضلعیاں اچ مون سون بارشاں دا امکان اے۔ گزریل 24 گھنٹیاں اچ لاہور، اٹک، قصور، منڈی بہاؤالدین، اوکاڑہ، فیصل آباد، سرگودھا، مری، راولپنڈی، حافظ آباد تے نارووال اچ مون سون بارشاں ریکارڈ کیتیاں ڳئیاں۔ انہاں شہریاں توں اپیل کیتی جو موسم تے سیلاب دی صورتحال پاروں احتیاطی تدابیر اختیار کرن۔ دریاواں، نہراں تے ندی نالیاں دے اطراف سیر و تفریح توں گریز کرن۔ ٻالاں دا خاص خیال رکھن تے انہاں کوں دریاواں ندی نالیاں اچ ہرگز نہ دھاوݨ ݙیون۔