وفاقی وزیر اورنگزیب خان کھچی دا ادارۂ فروغِ قومی زبان دا دورہ، قومی زبان تے ادب دے فروغ کیتے کتاباں کوں عالمی سطح تے متعارف کرواوݨ تے زور

اسلام آباد، 04 ستمبر(اے پی پی) وفاقی وزیر برائے قومی ورثہ تے ثقافت اورنگزیب خان کھچی ادارۂ فروغِ قومی زبان دا دورہ کریندیں ہوئے قومی زبان، ادب تے علمی سرمائے کوں عالمی سطح تے اجاگر کرݨ دی ضرورت تے زور ݙتے۔ وفاقی وزیر ایگزیکٹو ڈائریکٹر ادارۂ فروغِ قومی زبان ڈاکٹر راشد حمید کوں انہاں دی تحریر کیتی ڳئی پنج نصابی کتاباں دے نصاب دا حصہ بݨݨ تے مبارکباد ݙیندے ہوئیں انہاں دیاں علمی، ادبی تے تدریسی خذمتاں کوں سراہیا۔ وفاقی وزیر اورنگزیب خان کھچی ادارے دی کارکردگی تے اطمینان دا اظہار کریندیں ہوئیں متعلقہ حکام کوں ہدایت کیتی جو ادارۂ فروغِ قومی زبان دے علمی تے تحقیقی کام کوں قومی سطح دے نال نال عالمی سطح تے وی موثر انداز اچ متعارف کرایا ونڄے، تانجو دنیا کوں ادارے دی اہمیت، علمی خذمتاں تے پاکستان دے زبان و ادب دے حوالے نال ایندے کردار توں آگاہی حاصل تھیوے۔ وفاقی وزیر آکھیا جو اردو زبان اچ شائع تھیوݨ آلیاں اہم کتاباں دے ٻیاں زباناں اچ تراجم تے انہاں دیاں نمائشاں کوں ملک دے مختلف شہراں تئیں محدود رکھݨ دے بجائے عالمی سطح تے وی پیش کیتا ونڄے۔ انہاں خصوصاً وسطی ایشیائی ملکاں اچ پاکستانی کتاباں تے علمی سرمائے دیاں نمائشاں منعقد کرݨ دی تجویز ݙتی۔ اورنگزیب خان کھچی ہدایت کیتی جو وسطی ایشیائی ملکاں دی ثقافت تے تاریخ نال متعلق او کتاباں وی انہاں نمائشاں اچ شامل کیتیاں ونڄن ڄنہاں دا اردو اچ ترجمہ تھی ڳئے، بالخصوص انہاں ملکاں دے صدور تے اہم شخصیتاں دی تحریر کیتیاں ڳئیاں کتاباں کوں وی اجاگر کیتا ونڄے۔ انہاں آکھیا جو پاکستان دی ثقافت، تاریخ تے تہذیب دے موضوعاں تے مبنی او کتاباں وی عالمی سطح تے متعارف کرائیاں ونڄن ڄنہاں دے روسی، آذربائیجانی، ازبک تے فارسی زباناں اچ تراجم تھی ڳئن۔ وفاقی وزیر ادارے دی ٻئی بہتری تے کارکردگی کوں موثر بݨاوݨ کیتے متعلقہ حکام کوں مختلف تجویزاں وی ݙتیاں تے ایں ڳالھ تے زور ݙتا جو قومی زبان و ادب دے فروغ کیتے جدید تقاضیاں نال ہم آہنگ اقدامات کیتے ونڄن۔ ایں موقع تے وفاقی وزیر اورنگزیب خان کھچی ممتاز اقبال شناس، ادیب، ماہرِ تعلیم تے ایگزیکٹو ڈائریکٹر ادارۂ فروغِ قومی زبان ڈاکٹر راشد حمید دی علمی تے تدریسی خذمتاں کوں وی سراہیا۔ انہاں ڈاکٹر راشد حمید کوں پنجاب ٹیکسٹ بک بورڈ دے تحت انہاں دی تحریر کیتیاں ڳئیاں نصابی کتاباں دی اشاعت تے پنج کتاباں دے نصاب دا حصہ بݨݨ تے خصوصی مبارکباد ݙتی تے ملک و قوم کیتے انہاں دیاں علمی خذمتاں کوں خراجِ تحسین پیش کیتا۔ ڈاکٹر راشد حمید دی علمی و تدریسی خذمتاں دا ہک اہم سنگِ میل اے جو پنجاب ٹیکسٹ بک بورڈ دے تحت انہاں دی تحریر کیتی ڳئی مطالعۂ پاکستان دی ݙاہویں تے بارہویں جماعت دی اردو نصابی کتاباں شائع تھی ڳئن، ڄݙاں جو انہاں ݙوہائیں کتاباں دے انگریزی تراجم وی منظرِ عام تے آ ڳئن۔ ایں توں پہلے اٹھویں جماعت کیتے انہاں دی تاریخ دی کتاب 2022ء توں نصاب دا حصہ اے۔ ایں طرحاں نصاب دے حوالے نال ڈاکٹر راشد حمید دی شائع شدہ کتاباں دی تعداد پنج تھی ڳئی اے۔ ڈاکٹر راشد حمید دی بطور پرنسپل رائٹر آٹھویں جماعت دی تاریخ دی کتاب انگریزی زبان اچ 2022ء اچ شائع تھئی۔ ہݨ 2026ء اچ ݙاہویں جماعت تے بارہویں جماعت دی مطالعۂ پاکستان دی اردو نصابی کتاباں وی شائع تھی ڳئن، ڄݙاں جو انہاں دے انگریزی تراجم وی منظرِ عام تے آ ڳئن۔ اے امر انہاں دی علمی، تحقیقی تے تصنیفی کاوشاں دا قابلِ تحسین اعتراف اے۔ ایں موقع تے ڈائریکٹر جنرل ادارۂ فروغِ قومی زبان ڈاکٹر مظہر سلیم وی موجود ہن۔ ڈاکٹر راشد حمید تے ڈاکٹر مظہر سلیم وفاقی وزیر برائے قومی ورثہ و ثقافت اورنگزیب خان کھچی کوں ادارے ولوں مختلف کتاباں دے تحائف وی پیش کیتے۔ وفاقی وزیر اورنگزیب خان کھچی ایں عزم دا اظہار کیتا جو قومی زبان، ادب، تاریخ تے ثقافتی ورثے دے فروغ کیتے موثر اقدامات جاری رکھیے ویسن اتے پاکستان دے علمی تے ادبی سرمائے کوں عالمی سطح تے بھرپور انداز اچ متعارف کرایا ویسی۔