قائم مقام صدر سید یوسف رضا گیلانی اسلام آباد سٹاک ایکسچینج ٹاورز اچ ’’فائونڈرز وال‘‘ دا افتتاح کیتا

اسلام آباد۔ 07 ستمبر (اے پی پی) قائم مقام صدر سید یوسف رضا گیلانی سنوار کوں اسلام آباد سٹاک ایکسچینج ٹاورز اچ ’’فائونڈرز وال‘‘ دا افتتاح کیتا تے ایں ادارے دی بنیاد رکھݨ آلیاں تے اہم شخصیتاں کوں خراجِ تحسین پیش کیتا۔ ایں موقع تے قائم مقام صدر پاکستان دی کیپٹل مارکیٹس کوں ٻیا مضبوط بݨاوݨ، سرمایہ کاری اچ عوام دی شمولیت ودھاوݨ تے کاروباری شعبے اچ ایکویٹی فنانسنگ دے ودھ توں ودھ استعمال دی ضرورت تے زور ݙتا۔ سید یوسف رضا گیلانی یاد ݙوایا جو بطور وزیرِ اعظم پاکستان انہاں خود آئی ایس ای ٹاورز دا افتتاح کیتا ہئی۔ انہاں مرحوم احسان الحق پراچہ دیاں خذمتاں کوں وی خراجِ عقیدت پیش کیتا ڄنہاں شہید محترمہ بینظیر بھٹو دی حکومت اچ وزیرِ مملکت برائے خزانہ دی حیثیت نال 1989ء اچ اسلام آباد سٹاک ایکسچینج دے قیام اچ اہم کردار ادا کیتا۔ انہاں اسلام آباد سٹاک ایکسچینج دے پہلے بورڈ آف ڈائریکٹرز کوں وی خراجِ تحسین پیش کیتا ڄنہاں ٹریڈنگ تے سیٹلمنٹ دے ایں بنیادی ڈھانچے دی بنیاد رکھی ڄیندے ݙو دہائیاں توں ودھ عرصے تائیں پاکستان دی خذمت کیتی۔ ایوانِ صدر دے پریس ونگ توں جاری بیان دے مطابق تقریب نال خطاب کریندیں ہوئیں قائم مقام صدر آکھیا جو بانیان دی کندھ پاکستان دی کیپٹل مارکیٹس دی ادارہ جاتی تاریخ تے یادداشت کوں محفوظ رکھݨ دی علامت اے۔ اے انہاں لوکاں دی دور اندیشی دا اعتراف وی اے ڄنہاں سرمایہ تائیں رسائی کوں وسیع کرݨ، معاشی موقعیاں کوں عام کرݨ تے پاکستان دے شمالی علاقیاں کوں ملک دے مالیاتی نظام دے مرکزی دھارے اچ شامل کرݨ کیتے کم کیتا۔ سید یوسف رضا گیلانی ادارے دے نال آپݨی وابستگی دا ذکر کریندے ہوئے آکھیا جو بطور وزیرِ اعظم انہاں کوں آئی ایس ای ٹاورز دا سنگِ بنیاد رکھݨ دا اعزاز حاصل تھیا۔ انہاں دا آکھݨ ہا جو انہاں دا ہمیشہ اے یقین رہ ڳئے جو اسلام آباد صرف ملک دا انتظامی مرکز نئی ٻلکہ اقتصادی سرگرمیاں تے معاشی ترقی دا وی اہم ستون ہووݨا چاہیدے۔آپݨے خطاب توں پہلے قائم مقام صدر پاکستان ایئر فورس ڈے دے موقع تے وی دلی مبارکباد پیش کیتی۔ ایں توں پہلے قائم مقام صدر فیتہ کپ تے ’بانیان دی کندھ‘ دا افتتاح کیتا تے ایں دی تختی دی نقاب کشائی کیتی۔ انہاں چیئرمین ہارون احسان پراچہ ولوں ݙتی ڳئی بریفنگ اچ وی شرکت کیتی اتے بورڈ آف ڈائریکٹرز نال خطاب کیتا۔