وفاقی وزیرِ داخلہ محسن نقوی دا سی ڈی اے دے فیسلیٹیشن سینٹر دا دورہ، شہریاں توں براہ راست مسئلے پچھئے

اسلام آباد۔ 07 ستمبر(اے پی پی) وفاقی وزیرِداخلہ محسن نقوی سی ڈی اے دے فیسلیٹیشن سینٹر دا اچانک دورہ کیتا۔ وفاقی وزیرِ داخلہ فیسلیٹیشن سینٹر اچ موجود شہریاں توں براہ راست مسئلے پچھئے۔ وزیرِ داخلہ فیسلیٹیشن سینٹر اچ ایجنٹاں دی موجودگی دا سخت نوٹس گھندے ایجنٹاں دے خلاف بھرپور ایکشن دا حکم ݙتا تے آکھیا جو فیسلیٹیشن سینٹر اچ کوئی ایجنٹ نظر نی آوݨا چاہیدا۔ وفاقی وزیرِ داخلہ سینئر سٹیزن کاؤنٹر دا وی دورہ کیتا تے بزرگ شہریاں دے مسئلے وقتی حل کرݨ دی ہدایت کیتی۔ وزیرِ داخلہ کاؤنٹرز تے لمبیاں قطاراں، رش تے انتظار تے کاوڑ کیتی تے ہدایت کیتی جو فیسلیٹیشن سینٹر آوݨ آلے شہریاں کوں بہترین انداز نال مینج کیتا ونڄے۔ وفاقی وزیرِ داخلہ عمارت دی تزئین و آرائش دے نال نویں کاؤنٹرز بݨاوݨ دے احکامات ݙتے۔ شہریاں وزیرِ داخلہ نال ڳالھ کریندے آکھیےجو فیسلیٹیشن سینٹر دا نظام ہݨ وی مینول اے، مکمل ڈیجیٹلائزیشن نی تھئی۔ مقررہ تاریخ تے ضروری دستاویزات نی ݙتیاں ویندیاں، ول ول آوݨا پوندے۔ وزیرِ داخلہ محسن نقوی شہریاں دے مسئلے دے ازالے کیتے موقع تے ہی احکامات جاری کیتے۔ وزیرِ داخلہ محسن نقوی آکھیا جو عوام کوں بہتر تے وقتی خذمتاں ݙیوݨ یقینی بݨایا ونڄے، شہریاں کوں غیر ضروری انتظار تے اوکھ دا سامݨا نی ہووݨا چاہیدا، مقررہ تاریخ تے دستاویزات ݙیوݨ کوں یقینی بݨایا ونڄے۔ ڈیجیٹل نظام دے ذریعے شہریاں دے مسئلیں دا فوری تے شفاف حل یقینی بݨایا ونڄے، فیسلیٹیشن سینٹر دے نظام کوں مکمل طور تے ڈیجیٹل بݨایا ونڄے۔ وزیرِ داخلہ محسن نقوی شہریاں کوں یقین ݙیوائے جو ہک مہینے دے اندر واضح بہتری نظرآسی۔