ودھدی عمررسیدہ آبادی، پاکستان اچ جامع نگہداشت دے نظام تے زور، ترکی پاکستان ’سسٹر سٹیز‘ پائلٹ منصوبے دی تجویز

اسلام آباد۔7ستمبر(اے پی پی) پاکستان دی ودھدی عمر رسیدہ آبادی دے مستقبل کوں محفوظ بݨاوݨ کیتے ماہرین ملک اچ بزرگ شہریاں کیتے جامع صحت و نگہداشت دا نظام قائم کرݨ، عمر دوست شہراں دی منصوبہ بندی تے انہاں کوں قومی ترقی دا فعال حصہ بݨاوݨ تے زورݙتے۔ پالیسی ادارہ برائے پائیدار ترقی (SDPI) تے ترکی دے ابنِ سینا انسٹی ٹیوٹ دے اشتراک نال منعقدہ سیمینار اچ ماہرین خبردار کیتا جو پاکستان دی موجودہ نوجوان آبادی اڳلی ترائے ݙہاکیاں اچ تکھے عمر رسیدہ تھی ویسی، جیندے کیتے ہݨ توں ہی پالیسی سازی ضروری اے۔ تقریب دے مہمانِ خصوصی معروف ماہرِ عمر رسیدگی ڈاکٹر کمال آیدِن پاکستان تے ترکی وچال ’’سسٹر سٹیز‘‘ دے پائلٹ منصوبے، ہر صوبے اچ جیریاٹرک تحقیقی ہسپتال قائم کرݨ تے ’’ہیلتھ ایج فرینڈلی سمارٹ پاکستان‘‘ پروگرام شروع کرݨ دی تجویز پیش کیتی۔ SDPI دے ایگزیکٹو ڈائریکٹر ڈاکٹر عابد قیوم سلہری آکھیا جو پاکستان کوں ایہو جیہا جامع ماڈل اپناوݨا چاہیدے جیندے اچ بزرگ شہری وی ترقی دے عمل اچ فعال کردار ادا کرسڳن۔ فاؤنڈیشن فارایجنگ اینڈ انکلیوسیو ڈویلپمنٹ دے چیف ایگزیکٹو سید معیز الدین کاکاخیل ݙسایا جو پاکستان اچ ایں ویلھے 60 سال یا ایں توں ودھ عمر دے تقریباً 1 کروڑ 66 لکھ لوک موجود ہن جنہاں دی تعداد 2050ء تئیں 3 کروڑ 70 لکھ توں تجاوز کرسڳدی اے۔ انہاں بزرگاں کیتے گھر تے نگہداشت، معاون ٹیکنالوجی تے کمیونٹی کیئر دے نظام کوں ترجیح ݙیوݨ تے زور ݙتا۔ ماہرین ایں ڳالھ تے اتفاق کیتا جو بزرگاں کوں ٻوجھ سمجھݨ دی بجائے قومی ترقی دا اثاثہ تصور کرݨا ہوسی۔(ڈاکٹرسعدیہ کمال)