پاکستان دے معاشی مستقبل کیتے ڈیجیٹل تبدیلی کلیدی حیثیت رکھیندی اے، شزہ فاطمہ خواجہ

اسلام آباد۔ 07 ستمبر (اے پی پی) وفاقی وزیر انفارمیشن ٹیکنالوجی و ٹیلی کمیونیکیشن شزہ فاطمہ خواجہ آکھیے جو پاکستان دے معاشی مستقبل کیتے ڈیجیٹل تبدیلی کلیدی حیثیت رکھیندی اے تے پاکستان اوپن سورس ٹیکنالوجی تے اپݨا قومی ڈیجیٹل سٹیک تعمیر کریندا پئے جئیں کوں ٻئی ابھردی ہوئی قوماں دے نال بلا معاوضہ شیئر کیتا ویسی۔ “اساں ڈیجیٹل قوم کیویں تعمیر کیتی” دے موضوع تے منعقدہ لیپ 2026 کانفرنس نال خطاب کریندے انہاں ݙسایا جو حکومت گزریل ݙو سالاں دے دوران “ڈیجیٹل نیشن پاکستان ایکٹ” تے “قومی اے آئی پالیسی” سودھے اہم قانون سازی کیتی اے، تاں جو ٹیکنالوجی دے ایکو سسٹم دی مکمل معاونت کیتی ونڄ سڳے۔ انہاں ٻیا آکھیا جو ملک اچ تکھی رفتار انٹرنیٹ ݙیوݨ کیتے 480 میگاہرٹز دی ریکارڈ سپیکٹرم نیلامی کیتی ڳئی اے ڄݙاں جو ݙو نویاں سب میرین کیبلز دی تنصیب تے فائبر نیٹ ورک اچ وی ودھارا کیتا ڳئے۔ پالیسیاں دے تسلسل کوں یقینی بݨاوݨ اچ خصوصی سرمایہ کاری سہولت کونسل (ایس آئی ایف سی) دا کردار اہم ریہے، ڄݙاں جو ٹیکنالوجی کمپنیاں کیتے خصوصی زونز اچ اڳلے 10 سالاں کیتے ٹیکس استثنیٰ ݙتا ڳئے۔ وفاقی وزیر پاکستان دے تجربیں تے حاصل تھئے اسباق دا ذکر کریندے ݙسایا جو حکومت دا کم سافٹ ویئر بݨاوݨ نی بلکہ معاون قوانین تے پالیسیاں تشکیل ݙیوݨا اے، جیندے کیتے پالیسی سازاں تے عملدرآمد کراوݨ آلے اداریں وچال ہک “ڈیجیٹل گورن ٹیک” ایجنسی دا ہووݨا ضروری اے۔ انہاں واضح اہداف تے توجہ مرکوز رکھݨ، نجی شعبے دی مصنوعات دی تیاری توں پہلے بنیادی ڈیجیٹل ڈھانچہ استوار کرݨ تے ٻیاں قوماں دے نال سانجھے اشتراک نال اڳوں ودھݨ دی اہمیت تے زور ݙتا۔