پاک بحریہ جرأت، عزت و وقار تے امتیاز دے نال اپݨی ذمہ واریاں انجام ݙیندی رہسی، وزیرِاعظم شہباز شریف دا یومِ بحریہ تے پیغام

اسلام آباد۔ 08 ستمبر (اے پی پی) وزیرِاعظم محمد شہباز شریف پاک بحریہ دے شہداء تے غازیاں کوں خراجِ عقیدت پیش کریندے آکھیا جو 8 ستمبر 1965ء دی جنگ دے دوران پاک بحریہ دے عزم، شجاعت تے ثابت قدمی دی یاد تازہ کرݨ آلا قابلِ فخر تے ولولہ انگیز ݙینھ اے، 2025ء دے معرکہ حق دے دوران وی پاک بحریہ ایں جذبے تے اعلیٰ عملی تیاری دا مظاہرہ کیتا، میکوں یقین اے جو پاک بحریہ اپݨی شاندار روایتاں کوں برقرار رکھیندے جرأت، عزت و وقار تے امتیاز دے نال اپݨی ذمہ واریاں انجام ݙیندی رہسی۔ وزیرِاعظم دفتر دے میڈیا ونگ توں یومِ بحریہ تے جاری پیغام اچ وزیرِاعظم آکھیا جو یومِ بحریہ پاکستان دے موقع تے میں پاک بحریہ دے افسراں، جواناں تے اہلکاراں تے انہاں دے اہل خانہ کوں دلی مبارخ ݙینداں ۔ اڄ دے ایں تاریخی ݙینھ اساں پاک بحریہ دے شہداء، غازیاں، سابق اہلکاراں تے موجودہ افسراں و جواناں کوں خراجِ عقیدت پیش کریندوں جنہاں وطنِ عزیز دے دفاع کیتے اپݨی بے مثال خذمتاں انجام ݙتیاں تے اڄ وی جرأت، قربانی تے فرض شناسی دے جذبے دے نال اپݨا فریضہ سرانجام ݙیندے پئن۔ انہاں آکھیا جو 8 ستمبر 1965ء دی جنگ دے دوران پاک بحریہ دے عزم، شجاعت تے ثابت قدمی دی یاد تازہ کرݨ آلا ہک قابلِ فخر تے ولولہ انگیز ݙینھ اے۔ ایں ݙینھ پاک بحریہ بھارتی بحری تنصیب دوارکا دے خلاف تاریخی آپریشن ’سومناتھ‘ کامیابی نال انجام ݙتا۔ ہک وݙی تے بھاری اسلحے نال لیس دشمن قوت دے مقابلے اچ ساݙے بحری جہازاں انتہائی درستگی دے نال کارروائی کریندے دشمن دی اہم ساحلی تنصیبات کوں تباہ کیتا تے سمندر اچ نفسیاتی برتری قائم کیتی۔ بحرِ ہند اچ ساݙی آبدوز ’غازی‘ دی موجودگی دشمن دی نقل و حرکت کوں ٻیا مفلوج کر ݙتا تے بحری جنگ دی تاریخ اچ ہک سنہرا باب رقم کیتا۔ انہاں آکھیا جو 2025ء دے معرکہ حق دے دوران وی پاک بحریہ ایں جذبے تے اعلیٰ عملی تیاری دا مظاہرہ کیتا جیندے پاروں عددی برتری رکھݨ آلا دشمن سمندر اچ کہیں وی جارحانہ کارروائی توں باز ریہا، موجودہ تزویراتی منظرنامے اچ پاک بحریہ دیاں ذمہ واریاں کئی گنا ودھ ڳئن۔ پاک بحریہ ساݙیاں بین الاقوامی بحری مواصلاتی گزرگاہواں تے تجارت کیتے اہم بحری رستیں دے تحفظ اچ کلیدی کردار ادا کریندی پئی اے۔ آبنائے ہرمز تے اڄوکی ودھدی کشیدگی تے بحری سرگرمیاں اچ اوکھ دے تناظر اچ پاک بحریہ ہک واری ول اپݨے عزم دا مظاہرہ کریندے علاقائی سلامتی دی وڳڑدی صورتحال دے باوجود پاکستانی پرچم بردار تجارتی جہازاں بالخصوص پٹرولیم مصنوعات گھن ونڄݨ آلے جہازاں دی بلا تعطل آوںڄ کوں یقینی بݨایا۔ وزیرِاعظم آکھیا جو روایتی سلامتی دے تقاضیں توں ودھ تے پاک بحریہ دنیا بھر اچ پاکستان دی مثبت تے پرامن سنڄاݨ دے ودھارے اچ وی فعال کردار ادا کریندی پئی اے۔ ایں دی ’امن‘ مشق تے ’امن ڈائیلاگ‘ جہیں اقدامات دا مقصد عالمی بحری برادری کوں ’امن کیتے متحد‘ کرݨا اے۔ پاک بحریہ کوں خطے اچ عملی تے تکنیکی تعاون، بحری صنعتی رابطے، سانجھے تربیتی تبادلیں تے بحری سفارت کاری دے تناظر اچ بھرپور خیرسگالی حاصل اے۔ انہاں آکھیا جو اڄ پاک بحریہ ساݙے سمندراں دی ہک مضبوط تے جدید ٹیکنالوجی نال لیس محافظ قوت دے طور تے نمایاں اے جئیں اپݨی قیادت دے تزویراتی وژن تے مقامی ضرورتاں کوں سامݨے رکھیندے وضع کیتے ڳئے جدیدیت دے پروگرام دے تحت نمایاں ترقی حاصل کیتی اے۔ جدید ترین میلجم طرز دے کارویٹس، ہانگور کلاس آبدوز، مختلف نوعیت دے فضائی اثاثیں تے ملکی سطح تے تیار کیتے ڳئے کروز تے بیلسٹک میزائلاں دی کامیاب شمولیت ایں عزم دی عکاس اے جو ابھردے ہوئے بحری چیلنجز نال موثر تے کارآمد انداز اچ نبڑݨ کیتے پاک بحریہ کوں جدید تے مخصوص صلاحیتاں نال لیس کیتا ویندا پئے۔ انہاں آکھیا جو حکومت تے پاکستان دے عوام کوں پاک بحریہ دی پیشہ ورانہ صلاحیت، نظم و ضبط تے عملی تیاری تے مکمل اعتماد اے۔ میکوں یقین اے جو پاک بحریہ اپݨی شاندار روایتاں کوں برقرار رکھیندے جرأت، عزت و وقار تے امتیاز دے نال اپݨی ذمہ واریاں انجام ݙیندی رہسی