وزیراعظم دی خصوصی ریلیف سکیم حقیقی مستحق لوکاں کوں فوری ریلیف ݙیوݨ دا موثر نظام اے، وݙیاں گاݙیاں سکیم اچ شامل کائنی، موٹر سائیکل، رکشہ، چنگچی تے 800 سی سی تئیں گاݙیاں مستفید تھیسن، عطاء اللہ تارڑ

اسلام آباد۔ 14 ستمبر (اے پی پی) وفاقی وزیراطلاعات و نشریات عطاء اللہ تارڑ آکھیا جو وزیراعظم دی خصوصی ریلیف سکیم دا بنیادی مقصد تیل دی قیمتاں اچ ودھارے توں ساریں توں ودھ متاثر تھیوݨ آلے حقیقی مستحق لوکاں کوں فوری ریلیف ݙیوݨ اے، سکیم اچ وݙیاں گاݙیاں کوں شامل نی کیتا ڳیا جݙاں جو موٹر سائیکل، رکشہ، چنگچی تے 800 سی سی تئیں دی گاݙیاں دے مالکان ایں سکیم توں مستفید تھیسن، سکیم کیتے پہلی واری شفاف ڈیجیٹل نظام متعارف کرایا ڳئے، رجسٹریشن تے فیول دے حصول دا عمل ایس ایم ایس دے ذریعے تھیسی۔ اتھاں وفاقی وزراء شزہ فاطمہ خواجہ تے علی پرویز ملک دے رلے وزیراعظم فیول ریلیف سکیم دے حوالے نال پریس کانفرنس اچ ڳالھ کریندے وفاقی وزیراطلاعات آکھیا جو وزیراعظم دی خصوصی ریلیف سکیم دا بنیادی مقصد تیل دی قیمتاں اچ ودھارے توں ساریں توں ودھ متاثر تھیوݨ آلے لوکاں کوں وقتی ریلیف ݙیوݨ اے ۔ ایں سکیم توں صرف مستحق لوک ہی مستفید تھیسن، وݙیاں گاݙیاں کوں ایں اچ شامل نی کیتا ڳیا جݙاں جو موٹر سائیکل، رکشہ، چنگچی تے 800 سی سی تئیں دی گاݙیاں ایں دے دائرہ کار اچ ہن۔ انہاں آکھیا جو ایں نوعیت دا نظام پہلی واری متعارف کرایا ڳئے۔ وفاقی وزیر سکیم دی تفصیلات ݙسیندے آکھیا جو رجسٹریشن کیتے موبائل فون توں REG لکھ تے اسپیس دے بعد شناختی کارڈ نمبر، گاݙی دا رجسٹریشن نمبر، متعلقہ صوبے دا کوڈ تے گاݙی دی رجسٹریشن دی تاریخ درج کر تے 9771 تے ایس ایم ایس بھیجݨاں ہوسی۔ رجسٹریشن دے بعد پٹرول حاصل کرݨ کیتے TOK لکھ تے 9771 تے بھیجݨ توں فیول گھنݨ دی اجازت دا پیغام ملسی ۔ انہاں آکھیا جو سکیم اچ شفاف طریقہ کار اختیار کیتا ڳئے تاں جو صرف حقیقی مستحق لوک ہی ایں توں مستفید تھیسن۔ وزیراعظم سارے متعلقہ وزارتاں تے اداریں کوں سکیم دی موثر نگرانی تے بلا تعطل سہولت ݙیوݨ کیتے 24 گھنٹے دستیاب رہݨ دی ہدایت کیتی اے۔ انہاں آکھیا جو سکیم دی نگرانی کیتے وار روم قائم جݙاں جو عوامی رہنمائی کیتے کال سینٹر وی فعال کیتا ڳئے۔ وفاقی وزیر آکھیا جو وزارتِ اطلاعات و نشریات سکیم توں متعلق عوامی آگاہی کیتے سارے دستیاب ذرائع ابلاغ بروئے کار گھن آندی پئی اے جݙاں جو اہل لوکاں کوں ایس ایم ایس دے ذریعے وی آگاہ کیتا ویسی۔ انہاں آکھیا جو وزیراعظم عام آدمی دی اوکھ دا احساس کریندے خصوصی ریلیف سکیم دا اجراء کیتا جیندی او ذاتی طور تے نگرانی کریندے پئن۔ وفاقی وزیر آکھیا جو وزیراعظم دی ہدایت تے چارے صوبیں، آزاد جموں و کشمیر تے گلگت بلتستان دے چیف سیکرٹریز کوں سکیم دی سٹیئرنگ کمیٹی اچ شامل کیتا ڳئے۔ انہاں آکھیا جو وزیراعظم نائب وزیراعظم کوں صوبیں نال مشاورت دی ذمہ واری ݙتی تے ہدایت کیتی جو پرائس کنٹرول میکنزم تے کمیٹیاں یقینی بݨاون جو سکیم دے اجرا دے بعد کرائیں اچ ودھارا نہ تھیوے تے چنگچی و رکشہ استعمال کرݨ آلے مسافراں کوں زیادہ توں زیادہ ریلیف ملے۔ عطاء اللہ تارڑ آکھیا جو وزیراعظم دی ہدایت تے کفایت شعاری دے اقدامات جاری ہن، مارکیٹس تے ریسٹورنٹس مقررہ اوقات تے بند کیتے ویندے پئن۔ انہاں آکھیا جو گزریل ہنگامی صورتحال دے دوران چاتے ڳئے کفایت شعاری تے سادگی دے کجھ اقدامات جاری ہن جݙاں جو ٻیاں دا جائزہ گھدا ویندا پئے جو کیڑھے اقدامات کوں ول نافذ کرݨ دی لوڑھ اے، ایں حوالے نال فیصلہ وقتی کیتا ویسی ۔ ہک سوال دے جواب اچ وفاقی وزیر آکھیا جو خیبر پختونخوا اچ پی ٹی آئی دی حکومت اے، بہتر ہوندا جے او ماڈل گورننس دیاں مثالاں پیش کریندی جو صوبے اچ غریب عوام کیتے ٹارگٹڈ سبسڈی، اعلیٰ معیار دے ہسپتال، یونیورسٹیاں تے تعلیمی ادارے قائم کیتن۔ انہاں آکھیا جو بدقسمتی توں پی ٹی آئی دی دھرنیں دی کال کھوکھلی اے، ایں دے پچھوں کوئی واضح مطالبہ نظر نی آندا۔ انہاں آکھیا جو پی ٹی آئی خیبر پختونخوا اچ اپݨی حکومت دے دوران کوئی ہک ماڈل منصوبہ ہی ݙسا ݙیوے۔ وفاقی وزیر آکھیا جو وزیراعظم دی ایف بی آر اصلاحات کوں عالمی بینک تے آئی ایم ایف دی مینجنگ ڈائریکٹر تعریف کیتی جݙاں جو پاکستان دی سفارتی کوششاں کوں وی عالمی سطح تے پذیرائی ملدی پئی اے۔ انہاں آکھیا جو وزیراعظم تے فیلڈ مارشل دا دنیا بھر اچ احترام کیتا ویندے۔ انہاں آکھیا جو خیبر پختونخوا اچ پی ٹی آئی دی حکومت کوں ساڈھے 12 سال تھی چکئن تاں جو صوبے اچ کوئی ایجھا انقلابی اقدام نظر نی آندا جئیں کوں ماڈل گورننس دے طور تے پیش کیتا ونڄ سڳے۔ انہاں آکھیا جو پنجاب اچ دانش سکول تے پی کے ایل آئی جیھے منصوبے قائم کیتے ڳئن، دانش سکولاں دے طلبہ اڄ فورسز اچ خدمات انجام ݙیوݨ دے نال ڈاکٹرز تے انجینئرز وی بݨدے پئن جݙاں جو پی ٹی آئی جئیں میٹرو بس منصوبے کوں جنگلہ بس آکھیا، او خود انہاں پشاور اچ شروع کیتی۔ وفاقی وزیر اطلاعات آکھیا جو پی ٹی آئی دے کھوکھلے نعریں دی کوئی حیثیت کائنی، جے خیبر پختونخوا اچ ساڈھے 12 سالہ دورِ حکومت دے دوران کوئی مثالی طرزِ حکمرانی قائم کیتی ڳئی ہوندی تاں اساں آکھدے جو انہاں اپݨے صوبے اچ اعلیٰ ماڈل گورننس قائم کیتی اے۔ انہاں آکھیا جو پی ٹی آئی پہلے بزدار کوں مسلط کیتا، ول محمود خان تے ہݨ سہیل خان آفریدی کوں۔ انہاں آکھیا جو دانش سکول، پی کے ایل آئی تے ٻیاں اصلاحات دی عالمی سطح تے پذیرائی تھئی اے تان جوخیبر پختونخوا حکومت دے گورننس ماڈل دی کوئی ہک نمایاں عالمی کیس سٹڈی وی سامݨے نی آئی۔ ہک سوال دے جواب اچ عطاء اللہ تارڑ آکھیا جو وزیراعظم بجٹ توں پہلے وعدہ کیتا ہئی جو تنخواہ دار طبقے کوں زیادہ توں زیادہ ریلیف ݙیوݨ دی کوشش کیتی ویسی جیندے تحت بجٹ اچ تنخواہ دار طبقے کیتے ٹیکس سلیبز اچ شرح گھٹ کیتی ڳئی۔ انہاں آکھیا جو گھٹ تنخواہ گھنݨ آلے ملازمین تے ٹیکس دی شرح ہک فیصد توں وی گھٹ اے جݙاں جو ٻئے سلیبز اچ وی نمایاں کمی کیتی ڳئی اے، ایں توں علاوہ ایکسپورٹرز وی بجٹ دی تعریف کیتی اے ۔ انہاں آکھیا جو آئی ایم ایف پروگرام اچ راہندے ہوئیں وزیراعظم شہباز شریف دی قیادت اچ ملکی سطح تے کیتیاں ونڄݨ آلیاں اصلاحات کوں عالمی سطح تے تعریف کیتی ڳئی اے جیندے نتیجے اچ معیشت اچ گنجائش پیدا تھئی تے ایں دا ریلیف تلویں سطح تئیں منتقل کیتا ونڄ سڳیا۔ ہک ٻئے سوال دے جواب اچ وفاقی وزیر آکھیا جو جنگی صورتحال پاروں جہازاں دی نقل و حرکت متاثر تھیوݨ نال آر ایل این جی دی سپلائی وی متاثر تھئی جئیں پاروں تھیوݨ آلی بجلی دی لوڈشیڈنگ کوں وزیراعظم دی ہدایت تے ودھ توں ودھ ݙو گھنٹے تئیں محدود کیتا ڳئے۔ انہاں آکھیا جو گزریل عرصے دے دوران بجلی دے شعبے اچ تھیوݨ آضی اصلاحات تاریخی نوعیت دیاں ہن تے مزید لوڈشیڈنگ نہ ودھݨ ݙتی ویسی۔ انہاں آکھیا جو آئی پی پیز دا معاملہ حل کر تے گنجائش پیدا کیتی ڳئی اے تے ہݨ وی پاور سیکٹر اچ اصلاحات جاری ہن۔ انہاں آکھیا جو وزیراعظم سولر دے معاملے تے ذاتی دلچسپی گھندے ایں بحث کوں منطقی انجام تئیں پڄایا جݙاں جو ہݨ توجہ پاور سیکٹر اصلاحات تے مرکوز اے۔ انہاں آکھیا جو موجودہ بحران مکاوݨ دے نال ہی بجلی دے شعبے اچ مزید بہتری آسی۔